പാചിത്തിയകഥാ

൮൮൯. സമ്പജാനമുസാവാദേ, പാചിത്തിയമുദീരിതം;

ദവാ രവാ ഭണന്തസ്സ, ന ദോസുമ്മത്തകാദിനോ.

൮൯൦. അഞ്ഞത്ഥാപത്തിയോ പഞ്ച, മുസാവാദസ്സ കാരണാ;

സമുട്ഠാനാദയോ സബ്ബേ, അദിന്നാദാനതുല്യകാ.

സമ്പജാനമുസാവാദകഥാ.

൮൯൧. ജാതിആദീസു വുത്തേസു, ദസസ്വക്കോസവത്ഥുസു;

ഭൂതേന വാ അഭൂതേന, യേന കേനചി വത്ഥുനാ.

൮൯൨. യായ കായചി ഭാസായ, ഹത്ഥമുദ്ദായ വാ പന;

പാരാജികമനാപന്നം, ഭിക്ഖുമാപന്നമേവ വാ.

൮൯൩. അഞ്ഞത്രഞ്ഞാപദേസേന, ഓമസന്തസ്സ ഭിക്ഖുനോ;

തത്ഥ പാചിത്തിയാപത്തി, സമ്ബുദ്ധേന പകാസിതാ.

൮൯൪. തേഹേവഞ്ഞാപദേസേന, പാളിമുത്തപദേഹിപി;

സബ്ബത്ഥാനുപസമ്പന്നം, അക്കോസന്തസ്സ ദുക്കടം.

൮൯൫. അനക്കോസിതുകാമസ്സ, കേവലം ദവകമ്യതാ;

വദതോ പന സബ്ബത്ഥ, ദുബ്ഭാസിതമുദീരിതം.

൮൯൬. പവിട്ഠാനുപസമ്പന്ന-ട്ഠാനേ ഇധ ച ഭിക്ഖുനീ;

അനാപത്തി പുരക്ഖത്വാ, അത്ഥധമ്മാനുസാസനിം.

൮൯൭. വദതോ പന ഭിക്ഖുസ്സ, സമുട്ഠാനാദയോ നയാ;

അനന്തരസമാ വുത്താ, ദുക്ഖാ ഹോതേത്ഥ വേദനാ.

ഓമസവാദകഥാ.

൮൯൮. ആപത്തി ഭിക്ഖുപേസുഞ്ഞേ, ദുവിധാകാരതോ സിയാ;

അത്തനോ പിയകാമസ്സ, പരഭേദത്ഥിനോപി വാ.

൮൯൯. അക്കോസന്തസ്സ പരിയായ-പാളിമുത്തനയേഹി ച;

വചനസ്സുപസംഹാരേ, ഹോതി ആപത്തി ദുക്കടം.

൯൦൦. തഥാ അനുപസമ്പന്ന-അക്കോസം ഹരതോപി ച;

ഠിതാ അനുപസമ്പന്ന-ട്ഠാനേ ഇധ ച ഭിക്ഖുനീ.

൯൦൧. ന ചേവ പിയകാമസ്സ, ന ച ഭേദത്ഥിനോപി വാ;

പാപാനം ഗരഹത്ഥായ, വദന്തസ്സ ച ഭിക്ഖുനോ.

൯൦൨. തഥാ ഉമ്മത്തകാദീനം, അനാപത്തീതി ദീപിതാ;

സമുട്ഠാനാദയോ സബ്ബേ, അദിന്നാദാനസാദിസാ.

പേസുഞ്ഞകഥാ.

൯൦൩. ഠപേത്വാ ഭിക്ഖുനിം ഭിക്ഖും, അഞ്ഞേന പിടകത്തയം;

ധമ്മം സഹ ഭണന്തസ്സ, തസ്സ പാചിത്തിയം സിയാ.

൯൦൪. രാജോവാദാദയോ വുത്താ, മഹാപച്ചരിയാദിസു;

അനാരുള്ഹേസു സങ്ഗീതിം, ആപത്തിജനകാതി ഹി.

൯൦൫. ദുക്കടം ഹോതി ഭിക്ഖുസ്മിം, തഥാ ഭിക്ഖുനിയാപി ച;

ഭിക്ഖുസ്സാനുപസമ്പന്ന-സഞ്ഞിനോ വിമതിസ്സ വാ.

൯൦൬. ഏകതോ ഉദ്ദിസാപേതി, സജ്ഝായം വാ കരോതി യോ;

ഭണന്തം പഗുണം ഗന്ഥം, ഓപാതേതി ച യോ പന.

൯൦൭. തസ്സ ചാനുപസമ്പന്ന-സന്തികേ ഗണ്ഹതോപി ച;

ഉദ്ദേസം തു അനാപത്തി, ഭണനേ തേന ഏകതോ.

൯൦൮. വാചതോ ച സമുട്ഠാതി, വാചാചിത്തദ്വയാപി ച;

സമുട്ഠാനമിദം വുത്തം, പദസോധമ്മസഞ്ഞിതം.

പദസോധമ്മകഥാ.

൯൦൯. സബ്ബച്ഛന്നപരിച്ഛന്നേ, നിപജ്ജേയ്യ സചേ പന;

യേഭുയ്യേന പരിച്ഛന്നേ, ഛന്നേ സേനാസനേപി വാ.

൯൧൦. തിസ്സന്നം പന രത്തീനം, ഉദ്ധം യോ പന രത്തിയം;

ഠപേത്വാ ഭിക്ഖും അഞ്ഞേന, തസ്സ പാചിത്തിയം സിയാ.

൯൧൧. വത്ഥും യം പന നിദ്ദിട്ഠം, മേഥുനസ്സ പഹോനകം;

ആപത്യന്തമസോ തേന, തിരച്ഛാനഗതേനപി.

൯൧൨. നിപന്നേ ഉപസമ്പന്നേ, ഇതരോ ചേ നിപജ്ജതി;

ഇതരസ്മിം നിപന്നേ വാ, സചേ ഭിക്ഖു നിപജ്ജതി.

൯൧൩. ഉഭിന്നം ഉട്ഠഹിത്വാ വാ, നിപജ്ജനപയോഗതോ;

ആപത്താനുപസമ്പന്ന-ഗണനായപി വാ സിയാ.

൯൧൪. സചേ പിധായ വാ ഗബ്ഭം, നിപജ്ജതിപിധായ വാ;

ആപത്തത്ഥങ്ഗതേ സൂരിയേ, ചതുത്ഥദിവസേ സിയാ.

൯൧൫. ദിയഡ്ഢഹത്ഥുബ്ബേധേന, പാകാരചയനാദിനാ;

പരിക്ഖിത്തമ്പി തം സബ്ബം, പരിക്ഖിത്തന്തി വുച്ചതി.

൯൧൬. ഭിക്ഖുസ്സന്തമസോ ദുസ്സ-കുടിയം വസതോപി ച;

സഹസേയ്യായ ആപത്തി, ഹോതീതി പരിദീപിതോ.

൯൧൭. സബ്ബച്ഛന്നപരിച്ഛന്ന-യേഭുയ്യാദിപ്പഭേദതോ;

സത്ത പാചിത്തിയാനേത്ഥ, ദട്ഠബ്ബാനി സുബുദ്ധിനാ.

൯൧൮. അഡ്ഢച്ഛന്നപരിച്ഛന്നേ, ദുക്കടം പരിദീപിതം;

സബ്ബചൂളപരിച്ഛന്ന-ഛന്നാദീഹിപി പഞ്ചധാ.

൯൧൯. അനാപത്തി ദിരത്തം വാ, തിരത്തം വസതോ സഹ;

അരുണസ്സ പുരേയേവ, തതിയായ ച രത്തിയാ.

൯൨൦. നിക്ഖമിത്വാ വസന്തസ്സ, പുന സദ്ധിഞ്ച ഭിക്ഖുനോ;

തഥാ സബ്ബപരിച്ഛന്ന-സബ്ബച്ഛന്നാദികേപി ച.

൯൨൧. ഏവം അനുപസമ്പന്നേ, നിപന്നേപി നിസീദതോ;

സേസാ ഏളകലോമേന, സമുട്ഠാനാദയോ സമാ.

സഹസേയ്യകഥാ.

൯൨൨. സചേ തദഹുജാതായ, അപി യോ മാനുസിത്ഥിയാ;

സഹസേയ്യം പകപ്പേയ്യ, തസ്സ പാചിത്തിയം സിയാ.

൯൨൩. ദിസ്സമാനകരൂപായ, യക്ഖിയാ പേതിയാ സഹ;

രത്തിയം യോ നിപജ്ജേയ്യ, ദേവിയാ പണ്ഡകേന വാ.

൯൨൪. മേഥുനവത്ഥുഭൂതായ, തിരച്ഛാനഗതിത്ഥിയാ;

വത്ഥൂനം ഗണനായസ്സ, ഹോതി ആപത്തി ദുക്കടം.

൯൨൫. ഇധേകദിവസേനേവ, ആപത്തി പരിദീപിതാ;

സേസോ അനന്തരേ വുത്ത-സദിസോവ വിനിച്ഛയോ.

ദുതിയസഹസേയ്യകഥാ.

൯൨൬. ഉദ്ധം ഛപ്പഞ്ചവാചാഹി, വിഞ്ഞും പുരിസവിഗ്ഗഹം;

വിനാ ധമ്മം ഭണന്തസ്സ, ഹോതി പാചിത്തി ഇത്ഥിയാ.

൯൨൭. ഗാഥാപാദോ പനേകോവ, ഏകവാചാതി സഞ്ഞിതോ;

പദസോധമ്മം നിദ്ദിട്ഠം, ധമ്മമട്ഠകഥമ്പി വാ.

൯൨൮. ഛന്നം ഉപരി വാചാനം, പദാദീനം വസാ പന;

ദേസേന്തസ്സ സിയാപത്തി, പദാദിഗണനായ ച.

൯൨൯. നിമ്മിനിത്വാ ഠിതേനാപി, സദ്ധിം പുരിസവിഗ്ഗഹം;

യക്ഖേനപി ച പേതേന, തിരച്ഛാനഗതേനപി.

൯൩൦. ഠിതസ്സ മാതുഗാമസ്സ, ധമ്മം യോ പന ഭാസതി;

ഛന്നം ഉപരി വാചാനം, തസ്സ പാചിത്തിയം സിയാ.

൯൩൧. പുരിസേ ഇത്ഥിസഞ്ഞിസ്സ, വിമതിസ്സ ച പണ്ഡകേ;

ഉത്തരി ഛഹി വാചാഹി, വദതോ ഹോതി ദുക്കടം.

൯൩൨. ഇത്ഥിരൂപം ഗഹേത്വാന, ഠിതാനം ഭാസതോപി ച;

ദുക്കടം യക്ഖിപേതീനം, തിരച്ഛാനഗതിത്ഥിയാ.

൯൩൩. പുരിസേ സതി വിഞ്ഞുസ്മിം, സയം ഉട്ഠായ വാ പുന;

ദേസേന്തസ്സ നിസീദിത്വാ, മാതുഗാമസ്സ വാ തഥാ.

൯൩൪. അഞ്ഞിസ്സാ പുന അഞ്ഞിസ്സാ, ഇത്ഥിയാ ഭണതോപി ച;

ഛഹി പഞ്ചഹി വാചാഹി, അനാപത്തി പകാസിതാ.

൯൩൫. പദസോധമ്മതുല്യാവ, സമുട്ഠാനാദയോ മതാ;

അയമേവ വിസേസോതി, ക്രിയാക്രിയമിദം പന.

ധമ്മദേസനാകഥാ.

൯൩൬. മഹഗ്ഗതം പണീതം വാ, ആരോചേന്തസ്സ ഭിക്ഖുനോ;

ഠപേത്വാ ഭിക്ഖുനിം ഭിക്ഖും, ഭൂതേ പാചിത്തിയം സിയാ.

൯൩൭. നോ ചേ ജാനാതി സോ വുത്തം, ആരോചേന്തസ്സ ഭിക്ഖുനോ;

പരിയായവചനേ ചസ്സ, ഹോതി ആപത്തി ദുക്കടം.

൯൩൮. അനാപത്തി തഥാരൂപേ, കാരണേ സതി ഭാസതോ;

സബ്ബസ്സപി ച സീലാദിം, വദതോ ആദികമ്മിനോ.

൯൩൯. ഉമ്മത്തകപദം ഏത്ഥ, ന വുത്തം തദസമ്ഭവാ;

ഭൂതാരോചനകം നാമ, സമുട്ഠാനമിദം മതം.

൯൪൦. കായതോ വാചതോ കായ-വാചതോ ച തിധാ സിയാ;

കുസലാബ്യാകതേഹേവ, ദ്വിചിത്തഞ്ച ദ്വിവേദനം.

ഭൂതാരോചനകഥാ.

൯൪൧. ആപത്തിം പന ദുട്ഠുല്ലം, ആരോചേന്തസ്സ ഭിക്ഖുനോ;

ആപത്താനുപസമ്പന്നേ, ഠപേത്വാ ഭിക്ഖുസമ്മുതിം.

൯൪൨. സങ്ഘാദിസേസമാപന്നോ, മോചേത്വാ അസുചിം അയം;

ഘടേത്വാ വത്ഥുനാപത്തിം, വദന്തസ്സേവ വജ്ജതാ.

൯൪൩. ഇധ സങ്ഘാദിസേസാവ, ദുട്ഠുല്ലാപത്തിയോ മതാ;

തസ്മാ സുദ്ധസ്സ ദുട്ഠുല്ലം, വദം പാചിത്തിയം ഫുസേ.

൯൪൪. അദുട്ഠുല്ലായ ദുട്ഠുല്ല-സഞ്ഞിനോ വിമതിസ്സ വാ;

ആപത്തിയോപി വാ സേസാ, ആരോചേന്തസ്സ ദുക്കടം.

൯൪൫. തഥാ അനുപസമ്പന്നേ, ദുട്ഠുല്ലം പഞ്ചധാ മതം;

അജ്ഝാചാരമദുട്ഠുല്ലം, ആരോചേതും ന വട്ടതി.

൯൪൬. വത്ഥും വാ പന ആപത്തിം, ആരോചേന്തസ്സ കേവലം;

അനാപത്തീതി ഞാതബ്ബം, ഭിക്ഖുസമ്മുതിയാ തഥാ.

൯൪൭. ഏവമുമ്മത്തകാദീനം, സമുട്ഠാനാദയോ നയാ;

അദിന്നാദാനതുല്യാവ, വേദനാ ദുക്ഖവേദനാ.

ദുട്ഠുല്ലാരോചനകഥാ.

൯൪൮. ഖണേയ്യ വാ ഖണാപേയ്യ, പഥവിം യോ അകപ്പിയം;

ഭേദാപേയ്യ ച ഭിന്ദേയ്യ, തസ്സ പാചിത്തിയം സിയാ.

൯൪൯. സയമേവ ഖണന്തസ്സ, പഥവിം പന ഭിക്ഖുനോ;

പഹാരസ്മിം പഹാരസ്മിം, പാചിത്തിയമുദീരിതം.

൯൫൦. ആണാപേന്തസ്സ ഏകാവ, ദിവസം ഖണതോപി ച;

പുനപ്പുനാണാപേന്തസ്സ, വാചതോ വാചതോ സിയാ.

൯൫൧. ‘‘ഖണ പോക്ഖരണിം വാപിം, ആവാടം ഖണ കൂപകം’’;

ഇച്ചേവം തു വദന്തസ്സ, കോചി ദോസോ ന വിജ്ജതി.

൯൫൨. ‘‘ഇമം ഖണ ച ഓകാസം, ഇധ പോക്ഖരണിം ഖണ;

ഇമസ്മിം ഖണ ഓകാസേ’’, വത്തുമേവം ന വട്ടതി.

൯൫൩. ‘‘കന്ദം ഖണ കുരുന്ദം വാ, ഥൂണം ഖണ ച ഖാണുകം;

മൂലം ഖണ ച താലം വാ’’, ഏവം വദതി വട്ടതി.

൯൫൪. ‘‘ഇമം മൂലം ഇമം വല്ലിം, ഇമം താലം ഇമം നളം;

ഖണാ’’തി നിയമേത്വാന, വത്തും പന ന വട്ടതി.

൯൫൫. ഉസ്സിഞ്ചിതും സചേ സക്കാ, ഘടേഹി തനുകദ്ദമോ;

ഭിക്ഖുനാ അപനേതബ്ബോ, ബഹലം ന ച വട്ടതി.

൯൫൬. ഭിജ്ജിത്വാ നദിയാദീനം, പതിതം തോയസന്തികേ;

തടം വട്ഠം വികോപേതും, ചാതുമാസമ്പി വട്ടതി.

൯൫൭. സചേ പതതി തോയസ്മിം, ദേവേ വുട്ഠേപി വട്ടതി;

ചാതുമാസമതിക്കന്തേ, തോയേ ദേവോ ഹി വസ്സതി.

൯൫൮. പാസാണപിട്ഠിയം സോണ്ഡിം, ഖണന്തി യദി തത്ഥ തു;

രജം പതതി ചേ പുബ്ബം, പച്ഛാ ദേവോഭിവസ്സതി.