൭. അനാമാസവിനിച്ഛയകഥാ

൪൦. ഏവം മച്ഛമംസവിനിച്ഛയം കഥേത്വാ ഇദാനി അനാമാസവിനിച്ഛയം കഥേതും ‘‘അനാമാസ’’ന്തിആദിമാഹ. തത്ഥ ആമസിയതേതി ആമാസം, ന ആമാസം അനാമാസം, അപരാമസിതബ്ബന്തി അത്ഥോ. പാരിപന്ഥികാതി വികുപ്പനികാ, അന്തരായികാതി വുത്തം ഹോതി. നദീസോതേന വുയ്ഹമാനം മാതരന്തി ഏതം ഉക്കട്ഠപരിച്ഛേദദസ്സനത്ഥം വുത്തം. അഞ്ഞാസു പന ഇത്ഥീസു കാരുഞ്ഞാധിപ്പായേന മാതരി വുത്തനയേന പടിപജ്ജന്തസ്സ നേവത്ഥി ദോസോതി വദന്തി. ‘‘മാതര’’ന്തി വുത്തത്താ അഞ്ഞാസു ന വട്ടതീതി വദന്താപി അത്ഥി. ഏത്ഥ ഗണ്ഹാഹീതി ന വത്തബ്ബാതി ഗേഹസ്സിതപേമേന കായപ്പടിബദ്ധേന ഫുസനേ ദുക്കടം സന്ധായ വുത്തം. കാരുഞ്ഞേന പന വത്ഥാദിം ഗഹേതും അസക്കോന്തിം ‘‘ഗണ്ഹാഹീ’’തി വദന്തസ്സപി അവസഭാവപ്പത്തിതോ ഉദകേ നിമുജ്ജന്തിം കാരുഞ്ഞേന സഹസാ അനാമാസന്തി അചിന്തേത്വാ കേസാദീസു ഗഹേത്വാ മോക്ഖാധിപ്പായേന ആകഡ്ഢതോപി അനാപത്തിയേവ. ന ഹി മീയമാനം മാതരം ഉപേക്ഖിതും വട്ടതി. അഞ്ഞാതികായ ഇത്ഥിയാപി ഏസേവ നയോ. ഉക്കട്ഠായ മാതുയാപി ആമാസോ ന വട്ടതീതി ദസ്സനത്ഥം ‘‘മാതര’’ന്തി വുത്തം. തസ്സ കാതബ്ബം പന അഞ്ഞാസമ്പി ഇത്ഥീനം കരോന്തസ്സപി അനാപത്തിയേവ അനാമാസത്തേ വിസേസാഭാവാ.

തിണണ്ഡുപകന്തി ഹിരിവേരാദിമൂലേഹി കേസാലങ്കാരത്ഥായ കതചുമ്ബടകം. താലപണ്ണമുദ്ദികന്തി താലപണ്ണേഹി കതം അങ്ഗുലിമുദ്ദികം. തേന താലപണ്ണാദിമയം കടിസുത്തകണ്ണപിളന്ധനാദി സബ്ബം ന വട്ടതീതി സിദ്ധം. പരിവത്തേത്വാതി അത്തനോ നിവാസനപാരുപനഭാവതോ അപനേത്വാ, ചീവരത്ഥായ പരിണാമേത്വാതി വുത്തം ഹോതി. ചീവരത്ഥായ പാദമൂലേ ഠപേതീതി ഇദം നിദസ്സനമത്തം. പച്ചത്ഥരണവിതാനാദിഅത്ഥമ്പി വട്ടതിയേവ, പൂജാദിഅത്ഥം താവകാലികമ്പി ആമസിതും വട്ടതി. സീസപസാധനദന്തസൂചീതി ഇദം സീസാലങ്കാരത്ഥായ പടപിലോതികാഹി കതസീസപസാധനകഞ്ചേവ ദന്തസൂചിആദി ചാതി ദ്വേ തയോ. സീസപസാധനം സിപാടികോപകരണത്ഥായ ചേവ ദന്തസൂചിം സൂചിഉപകരണത്ഥായ ച ഗഹേതബ്ബന്തി യഥാക്കമം അത്ഥം ദസ്സേതി. കേസകലാപം ബന്ധിത്വാ തത്ഥ തിരിയം പവേസനത്ഥായ കതാ സൂചി ഏവ സീസപസാധനകദന്തസൂചീതി ഏകമേവ കത്വാ സിപാടികായ പക്ഖിപിത്വാ പരിഹരിതബ്ബസൂചിയേവ തസ്സ തസ്സ കിച്ചസ്സ ഉപകരണന്തി സിപാടികസൂചിഉപകരണം, ഏവം വാ യോജനാ കാതബ്ബാ.

പോത്ഥകരൂപന്തി സുധാദീഹി കതം പാരാജികവത്ഥുഭൂതാനം തിരച്ഛാനഗതിത്ഥീനം സണ്ഠാനേന കതമ്പി അനാമാസമേവ. ഇത്ഥിരൂപാനി ദസ്സേത്വാ കതം വത്ഥുഭിത്തിആദിഞ്ച ഇത്ഥിരൂപം അനാമസിത്വാ വളഞ്ജേതും വട്ടതി. ഏവരൂപേ ഹി അനാമാസേ കായസംസഗ്ഗരാഗേ അസതി കായപ്പടിബദ്ധേന ആമസതോ ദോസോ നത്ഥി. ഭിന്ദിത്വാതി ഏത്ഥ ഹത്ഥേന അഗ്ഗഹേത്വാവ കേനചി ദണ്ഡാദിനാ ഭിന്ദിതബ്ബം. ഏത്ഥ ച അനാമാസമ്പി ദണ്ഡപാസാണാദീഹി ഭേദനസ്സ അട്ഠകഥായം വുത്തത്താ, പാളിയമ്പി ആപദാസു മോക്ഖാധിപ്പായസ്സ ആമസനേപി അനാപത്തിയാ വുത്തത്താ ച സപ്പിനിആദിവാളമിഗീഹി ഗഹിതപാണകാനം മോചനത്ഥായ തം തം സപ്പിനിആദിവത്ഥും ദണ്ഡാദീഹി പടിക്ഖിപിത്വാ ഗഹേതും, മാതുആദിം ഉദകേ മീയമാനം വത്ഥാദീഹി ഗഹേതും, അസക്കോന്തിം കേസാദീസു ഗഹേത്വാ കാരുഞ്ഞേന ഉക്ഖിപിതുഞ്ച വട്ടതീതി അയമത്ഥോ ഗഹേതബ്ബോവ. ‘‘അട്ഠകഥായം ‘ന ത്വേവ ആമസിതബ്ബാ’തി ഇദം പന വചനം അമീയമാനം വത്ഥും സന്ധായ വുത്തന്തി അയം അമ്ഹാകം ഖന്തീ’’തി വിമതിവിനോദനിയം (വി. വി. ടീ. ൧.൨൮൧) വുത്തം.

൪൧. മഗ്ഗം അധിട്ഠായാതി ‘‘മഗ്ഗോ അയ’’ന്തി മഗ്ഗസഞ്ഞം ഉപ്പാദേത്വാതി അത്ഥോ. പഞ്ഞപേത്വാ ദേന്തീതി ഇദം സാമീചിവസേന വുത്തം, തേഹി പന ‘‘ആസനം പഞ്ഞപേത്വാവ നിസീദഥാ’’തി വുത്തേ സയമേവ പഞ്ഞപേത്വാ നിസീദിതും വട്ടതി. തത്ഥ ജാതകാനീതി അച്ഛിന്ദിത്വാ ഭൂതഗാമഭാവേനേവ ഠിതാനി. ‘‘കീളന്തേനാ’’തി വുത്തത്താ സതി പച്ചയേ ആമസന്തസ്സ അനാപത്തി, ഇദഞ്ച ഗിഹിസന്തകം സന്ധായ വുത്തം, ഭിക്ഖുസന്തകം പന പരിഭോഗാരഹം സബ്ബഥാ ആമസിതും ന വട്ടതി ദുരൂപചിണ്ണത്താ. താലപനസാദീനീതി ചേത്ഥ ആദി-സദ്ദേന നാളികേരലബുജതിപുസഅലാബുകുമ്ഭണ്ഡപുസ്സഫലഏളാലുകഫലാനം സങ്ഗഹോ ദട്ഠബ്ബോ. ‘‘യഥാവുത്തഫലാനംയേവ ചേത്ഥ കീളാധിപ്പായേന ആമസനം ന വട്ടതീ’’തി വുത്തത്താ പാസാണസക്ഖരാദീനി കീളാധിപ്പായേനപി ആമസിതും വട്ടതി. അനുപസമ്പന്നാനം ദസ്സാമീതി ഇദം അപടിഗ്ഗഹേത്വാ ഗഹണം സന്ധായ വുത്തം. അത്തനോപി അത്ഥായ പടിഗ്ഗഹേത്വാ ഗഹണേ ദോസോ നത്ഥി അനാമാസത്താഭാവാ.

൪൨. മുത്താതി (മ. നി. ടീ. ൧.൨ പഥവീവാരവണ്ണനാ; സാരത്ഥ. ടീ. ൨.൨൮൧) ഹത്ഥികുമ്ഭജാതികാ അട്ഠവിധാ മുത്താ. തഥാ ഹി ഹത്ഥികുമ്ഭം, വരാഹദാഠം, ഭുജഗസീസം, വലാഹകം, വേളു, മച്ഛസിരോ, സങ്ഖോ, സിപ്പീതി അട്ഠ മുത്തായോനിയോ. തത്ഥ ഹത്ഥികുമ്ഭജാ പീതവണ്ണാ പഭാഹീനാ. വരാഹദാഠാ വരാഹദാഠാവണ്ണാവ. ഭുജഗസീസജാ നീലാദിവണ്ണാ സുവിസുദ്ധാ വട്ടലാ ച. വലാഹകജാ ഭാസുരാ ദുബ്ബിഭാഗാ രത്തിഭാഗേ അന്ധകാരം വിധമേന്തിയോ തിട്ഠന്തി, ദേവൂപഭോഗാ ഏവ ച ഹോന്തി. വേളുജാ കരകഫലസമാനവണ്ണാ ന ഭാസുരാ, തേ ച വേളൂ അമനുസ്സഗോചരേയേവ പദേസേ ജായന്തി. മച്ഛസിരജാ പാഠീനപിട്ഠിസമാനവണ്ണാ വട്ടലാ ലഘവോ ച തേജവന്താ ഹോന്തി പഭാവിഹീനാ ച, തേ ച മച്ഛാ സമുദ്ദമജ്ഝേയേവ ജായന്തി. സങ്ഖജാ സങ്ഖഉദരച്ഛവിവണ്ണാ കോലഫലപ്പമാണാപി ഹോന്തി പഭാവിഹീനാവ. സിപ്പിജാ പഭാവിസേസയുത്താ ഹോന്തി നാനാസണ്ഠാനാ. ഏവം ജാതിതോ അട്ഠവിധാസു മുത്താസു യാ മച്ഛസങ്ഖസിപ്പിജാ, താ സാമുദ്ദികാ. ഭുജഗജാപി കാചി സാമുദ്ദികാ ഹോന്തി, ഇതരാ അസാമുദ്ദികാ. യസ്മാ ബഹുലം സാമുദ്ദികാവ മുത്താ ലോകേ ദിസ്സന്തി, തത്ഥാപി സിപ്പിജാവ, ഇതരാ കദാചി കാചി, തസ്മാ സമ്മോഹവിനോദനിയം (വിഭ. അട്ഠ. ൧൭൩) ‘‘മുത്താതി സാമുദ്ദികാ മുത്താ’’തി വുത്തം.

മണീതി വേളുരിയാദിതോ അഞ്ഞോ ജോതിരസാദിഭേദോ സബ്ബോ മണി. വേളുരിയോതി അല്ലവേളുവണ്ണോ മണി, ‘‘മജ്ജാരക്ഖിമണ്ഡലവണ്ണോ’’തിപി വദന്തി. സങ്ഖോതി സാമുദ്ദികസങ്ഖോ. സിലാതി മുഗ്ഗവണ്ണാ അതിസിനിദ്ധാ കാളസിലാ. മണിവോഹാരം അഗതാ രത്തസേതാദിവണ്ണാ സുമട്ഠാപി സിലാ അനാമാസാ ഏവാതി വദന്തി. സാരത്ഥദീപനിയം (സാരത്ഥ. ടീ. ൨.൨൮൧) പന ‘‘സങ്ഖോതി സാമുദ്ദികസങ്ഖോ. സിലാതി കാളസിലാപണ്ഡുസിലാസേതസിലാദിഭേദാ സബ്ബാപി സിലാ’’തി വുത്തം. പവാളം സമുദ്ദതോ ജാതനാതിരത്തമണി. രജതന്തി കഹാപണമാസാദിഭേദം ജതുമാസാദിം ഉപാദായ സബ്ബം വുത്താവസേസരൂപിയം ഗഹിതം. ജാതരൂപന്തി സുവണ്ണം. ലോഹിതങ്കോതി രത്തമണി. മസാരഗല്ലന്തി കബരവണ്ണോ മണി. ‘‘മരകത’’ന്തിപി വദന്തി.

ഭണ്ഡമൂലത്ഥായാതി പത്തചീവരാദിമൂലത്ഥായ. കുട്ഠരോഗസ്സാതി നിദസ്സനമത്തം. തായ വൂപസമേതബ്ബസ്സ യസ്സ കസ്സചി രോഗസ്സ അത്ഥായ വട്ടതിയേവ. ‘‘ഭേസജ്ജത്ഥഞ്ച അവിദ്ധായേവ മുത്താ വട്ടതീ’’തി തീസുപി ഗണ്ഠിപദേസു വുത്താ. ഭേസജ്ജത്ഥായ പിസിത്വാ യോജിതാനം മുത്താനം രതനഭാവവിജഹനതോ ഗഹണക്ഖണേപി രതനാകാരേന അപേക്ഖാഭാവാ ‘‘ഭേസജ്ജത്ഥായ പന വട്ടതീ’’തി വുത്തം. യാവ പന താ മുത്താ രതനരൂപേന തിട്ഠന്തി, താവ ആമസിതും ന വട്ടന്തി. ഏവം അഞ്ഞമ്പി രതനപാസാണം പിസിത്വാ ഭേസജ്ജേ യോജനത്ഥായ ഗഹേതും വട്ടതി ഏവ. ജാതരൂപരജതം പന മിസ്സേത്വാ യോജനഭേസജ്ജത്ഥായപി സമ്പടിച്ഛിതും ന വട്ടതി. ഗഹട്ഠേഹി യോജേത്വാ ദിന്നമ്പി യദി ഭേസജ്ജേ സുവണ്ണാദിരൂപേന തിട്ഠതി, വിയോജേതുഞ്ച സക്കാ, താദിസം ഭേസജ്ജമ്പി ന വട്ടതി. തം അബ്ബോഹാരികത്തഗതഞ്ചേ വട്ടതി. ‘‘ജാതിഫലികം ഉപാദായാ’’തി വുത്തത്താ സൂരിയകന്തചന്ദകന്താദികം ജാതിപാസാണം മണിമ്ഹി ഏവ സങ്ഗഹിതന്തി ദട്ഠബ്ബം. ആകരമുത്തോതി ആകരതോ മുത്തമത്തോ. ഭണ്ഡമൂലത്ഥം സമ്പടിച്ഛിതും വട്ടതീതി ഇമിനാവ ആമസിതുമ്പി വട്ടതീതി ദസ്സേതി. പചിത്വാ കതോതി കാചകാരേഹി പചിത്വാ കതോ.

ധമനസങ്ഖോ ച ധോതവിദ്ധോ ച രതനമിസ്സോ ചാതി യോജേതബ്ബം. വിദ്ധോതിആദിഭാവേന കതഛിദ്ദോ. രതനമിസ്സോതി കഞ്ചനലതാദിവിചിത്തോ മുത്താദിരതനഖചിതോ ച. ഏതേന ധമനസങ്ഖതോ അഞ്ഞോ രതനസമ്മിസ്സോ അനാമാസോതി ദസ്സേതി. സിലായമ്പി ഏസേവ നയോ. പാനീയസങ്ഖോതി ഇമിനാ ഥാലകാദിആകാരേന കതസങ്ഖമയഭാജനാനി ഭിക്ഖൂനം സമ്പടിച്ഛിതും വട്ടന്തീതി സിദ്ധം. സേസന്തി രതനമിസ്സം ഠപേത്വാ അവസേസം. മുഗ്ഗവണ്ണംയേവ രതനസമ്മിസ്സം കരോന്തി, ന അഞ്ഞന്തി ആഹ ‘‘മുഗ്ഗവണ്ണാവാ’’തി, മുഗ്ഗവണ്ണാ രതനസമ്മിസ്സാവ ന വട്ടതീതി വുത്തം ഹോതി. സേസാതി രതനസമ്മിസ്സം ഠപേത്വാ അവസേസാ സിലാ.

ബീജതോ പട്ഠായാതി ധാതുപാസാണതോ പട്ഠായ. സുവണ്ണചേതിയന്തി ധാതുകരണ്ഡകം. പടിക്ഖിപീതി ‘‘ധാതുട്ഠപനത്ഥായ ഗണ്ഹഥാ’’തി അവത്വാ ‘‘തുമ്ഹാകം ഗണ്ഹഥാ’’തി പേസിതത്താ പടിക്ഖിപി. വിമതിവിനോദനിയം (വി. വി. ടീ. ൧.൨൮൧) പന ‘‘പടിക്ഖിപീതി സുവണ്ണമയസ്സ ധാതുകരണ്ഡകസ്സ ബുദ്ധാദിരൂപസ്സ ച അത്തനോ സന്തകകരണേ നിസ്സഗ്ഗിയത്താ വുത്ത’’ന്തി വുത്തം. സുവണ്ണബുബ്ബുളകന്തി സുവണ്ണതാരകം. ‘‘രൂപിയഛഡ്ഡകട്ഠാനേ’’തി വുത്തത്താ രൂപിയഛഡ്ഡകസ്സ ജാതരൂപരജതം ആമസിത്വാ ഛഡ്ഡേതും വട്ടതീതി വുത്തം. കേളാപയിതുന്തി ആമസിത്വാ ഇതോ ചിതോ ച സഞ്ചാരേതും. വുത്തന്തി മഹാഅട്ഠകഥായം വുത്തം. കചവരമേവ ഹരിതും വട്ടതീതി ഗോപകാ വാ ഹോന്തു അഞ്ഞേ വാ, ഹത്ഥേനപി പുഞ്ഛിത്വാ കചവരം അപനേതും വട്ടതി, ‘‘മലമ്പി പമജ്ജിതും വട്ടതിയേവാ’’തി സാരത്ഥദീപനിയം (സാരത്ഥ. ടീ. ൨.൨൮൧) വുത്തം. വിമതിവിനോദനിയം (വി. വി. ടീ. ൧.൨൮൧) പന ‘‘കചവരമേവ ഹരിതും വട്ടതീതി ഗോപകാ വാ ഹോന്തു അഞ്ഞേ വാ, ഹത്ഥേനപി പുഞ്ഛിത്വാ കചവരം അപനേതും വട്ടതി, മലമ്പി മജ്ജിതും വട്ടതി ഏവാതി വദന്തി, തം അട്ഠകഥായ ന സമേതി കേളായനസദിസത്താ’’തി വുത്തം. കഥം ന സമേതി? മഹാഅട്ഠകഥായം ചേതിയഘരഗോപകാ രൂപിയഛഡ്ഡകട്ഠാനേ ഠിതാതി തേസംയേവ കേളായനം അനുഞ്ഞാതം, ന അഞ്ഞേസം, തസ്മാ ‘‘ഗോപകാ വാ ഹോന്തു അഞ്ഞേ വാ’’തി വചനം മഹാഅട്ഠകഥായ ന സമേതി.

കുരുന്ദിയം പന തമ്പി പടിക്ഖിത്തം, സുവണ്ണചേതിയേ കചവരമേവ ഹരിതും വട്ടതീതി ഏത്തകമേവ അനുഞ്ഞാതം, തസ്മാ സാവധാരണം കത്വാ വുത്തത്താ ‘‘ഹത്ഥേനപി പുഞ്ഛിത്വാ’’തി ച ‘‘മലമ്പി പമജ്ജിതും വട്ടതി ഏവാ’’തി ച വചനം കുരുന്ദട്ഠകഥായ ന സമേതി, തസ്മാ വിചാരേതബ്ബമേതന്തി. ആരകൂടലോഹന്തി സുവണ്ണവണ്ണോ കിത്തിമലോഹവിസേസോ. തിവിധഞ്ഹി കിത്തിമലോഹം – കംസലോഹം വട്ടലോഹം ആരകൂടലോഹന്തി. തത്ഥ തിപുതമ്ബേ മിസ്സേത്വാ കതം കംസലോഹം നാമ, സീസതമ്ബേ മിസ്സേത്വാ കതം വട്ടലോഹം, രസതുത്ഥേഹി രഞ്ജിതം തമ്ബം ആരകൂടലോഹം നാമ. ‘‘പകതിരസതമ്ബേ മിസ്സേത്വാ കതം ആരകൂട’’ന്തി ച സാരത്ഥദീപനിയം (സാരത്ഥ. ടീ. ൨.൨൮൧) വുത്തം. തം പന ‘‘ജാതരൂപഗതിക’’ന്തി വുത്തത്താ ഉഗ്ഗണ്ഹതോ നിസ്സഗ്ഗിയമ്പി ഹോതീതി കേചി വദന്തി, രൂപിയേസു പന അഗണിതത്താ നിസ്സഗ്ഗിയം ന ഹോതി, ആമസനേ സമ്പടിച്ഛനേ ച ദുക്കടമേവാതി വേദിതബ്ബം. സബ്ബോപി കപ്പിയോതി യഥാവുത്തസുവണ്ണാദിമയാനം സേനാസനപരിക്ഖാരാനം ആമസനഗോപനാദിവസേന പരിഭോഗോ സബ്ബഥാ കപ്പിയോതി അധിപ്പായോ. തേനാഹ ‘‘തസ്മാ’’തിആദി. ‘‘ഭിക്ഖൂനം ധമ്മവിനയവണ്ണനട്ഠാനേ’’തി വുത്തത്താ സങ്ഘികമേവ സുവണ്ണാദിമയം സേനാസനം സേനാസനപരിക്ഖാരാ ച വട്ടന്തി, ന പുഗ്ഗലികാനീതി ഗഹേതബ്ബം. പടിജഗ്ഗിതും വട്ടന്തീതി സേനാസനപടിബന്ധതോ വുത്തം.

൪൩. സാമികാനം പേസേതബ്ബന്തി സാമികാനം സാസനം പേസേതബ്ബം. ഭിന്ദിത്വാതി പഠമമേവ അനാമസിത്വാ പാസാണാദിനാ കിഞ്ചിമത്തം ഭേദം കത്വാ പച്ഛാ കപ്പിയഭണ്ഡത്ഥായ അധിട്ഠഹിത്വാ ഹത്ഥേന ഗഹേതും വട്ടതി. തേനാഹ ‘‘കപ്പിയഭണ്ഡം കരിസ്സാമീതി സമ്പടിച്ഛിതും വട്ടതീ’’തി. ഏത്ഥാപി തഞ്ച വിയോജേത്വാ ആമസിതബ്ബം. ഫലകജാലികാദീനീതി ഏത്ഥ സരപരിത്താണായ ഹത്ഥേന ഗഹേതബ്ബം. കിടികാഫലകം അക്ഖിരക്ഖണത്ഥായ അയലോഹാദീഹി ജാലാകാരേന കത്വാ സീസാദീസു പടിമുഞ്ചിതബ്ബം ജാലികം നാമ. ആദി-സദ്ദേന കവചാദികം സങ്ഗണ്ഹാതി. അനാമാസാനീതി മച്ഛജാലാദിപരൂപരോധം സന്ധായ വുത്തം, ന സരപരിത്താണം തസ്സ ആവുധഭണ്ഡത്താഭാവാ. തേന വക്ഖതി ‘‘പരൂപരോധനിവാരണഞ്ഹീ’’തിആദി (വി. സങ്ഗ. അട്ഠ. ൪൩). ആസനസ്സാതി ചേതിയസ്സസമന്താ കതപരിഭണ്ഡസ്സ. ബന്ധിസ്സാമീതി കാകാദീനം അദൂസനത്ഥായ ബന്ധിസ്സാമി.

‘‘ഭേരിസങ്ഘാടോതി സങ്ഘടിതചമ്മഭേരീ. വീണാസങ്ഘാടോതി സങ്ഘടിതചമ്മവീണാ’’തി സാരത്ഥദീപനിയം (സാരത്ഥ. ടീ. ൨.൨൮൧) വുത്തം. ‘‘ചമ്മവിനദ്ധാ വീണാഭേരിആദീനീ’’തി മഹാഅട്ഠകഥായം വുത്തവചനതോ വിസേസാഭാവാ ‘‘കുരുന്ദിയം പനാ’’തിആദിനാ തതോ വിസേസസ്സ വത്തുമാരദ്ധത്താ ച ഭേരിആദീനം വിനദ്ധോപകരണസമൂഹോ ഭേരിവീണാസങ്ഘാടോതി വേദിതബ്ബോ ‘‘സങ്ഘടിതബ്ബോതി സങ്ഘാടോ’’തി കത്വാ. തുച്ഛപോക്ഖരന്തി അവിനദ്ധചമ്മഭേരിവീണാനം പോക്ഖരം. ആരോപിതചമ്മന്തി പുബ്ബേ ആരോപിതം ഹുത്വാ പച്ഛാ തതോ അപനേത്വാ വിസും ഠപിതമുഖചമ്മമത്തം, ന സേസോപകരണസഹിതം, തം പന സങ്ഘാതോതി അയം വിസേസോ. ഓനഹിതുന്തി ഭേരിപോക്ഖരാദീനി ചമ്മം ആരോപേത്വാ ചമ്മവദ്ധിആദീഹി സബ്ബേഹി ഉപകരണേഹി വിനന്ധിതും. ഓനഹാപേതുന്തി തഥേവ അഞ്ഞേഹി വിനന്ധാപേതും.

ഇതി വിനയസങ്ഗഹസംവണ്ണനാഭൂതേ വിനയാലങ്കാരേ

അനാമാസവിനിച്ഛയകഥാലങ്കാരോ നാമ

സത്തമോ പരിച്ഛേദോ.