൩. നഗ്ഗവഗ്ഗോ

൧. പഠമാദിസിക്ഖാപദവണ്ണനാ

൮൮൩-൮൮൭. തതിയവഗ്ഗസ്സ പഠമദുതിയാനി ഉത്താനാനി.

൮൯൩. തതിയേ വിസിബ്ബേത്വാതി വിജടേത്വാ. ധുരം നിക്ഖിത്തമത്തേതി വിസിബ്ബനദിവസതോ പഞ്ച ദിവസേ അതിക്കാമേത്വാ ധുരം നിക്ഖിത്തമത്തേ. അന്തോപഞ്ചാഹേ പന ധുരനിക്ഖേപേപി അനാപത്തി ഏവ ‘‘അഞ്ഞത്ര ചതൂഹപഞ്ചാഹാ’’തി വുത്തത്താ. ഉപസമ്പന്നായ ചീവരം സിബ്ബനത്ഥായ വിസിബ്ബേത്വാ പഞ്ചഹാതിക്കമോ, അനനുഞ്ഞാതകാരണാ ധുരനിക്ഖേപോതി ദ്വേ അങ്ഗാനി.

൯൦൦. ചതുത്ഥേ പഞ്ചന്നം ചീവരാനം അപരിവത്തനം, അനനുഞ്ഞാതകാരണാ പഞ്ചാഹാതിക്കമോതി ദ്വേ അങ്ഗാനി.

൯൦൩. പഞ്ചമം ഉത്താനമേവ.

൯൦൯. ഛട്ഠേ വികപ്പനുപഗസ്സ സങ്ഘേ പരിണതതാ, വിനാ ആനിസംസദസ്സനേന അന്തരായകരണന്തി ദ്വേ അങ്ഗാനി.

൯൧൧. സത്തമം ഉത്താനമേവ.

൯൧൬. അട്ഠമേ കുമ്ഭഥൂണം നാമ കുമ്ഭസദ്ദോ, തേന കീളന്തീതി കുമ്ഭഥൂണികാ. തേനാഹ ‘‘ഘടകേന കീളനകാ’’തി. ദീഘനികായട്ഠകഥായം പന ‘‘ചതുരസ്സഅമ്ബണകതാള’’ന്തി വുത്തം. തഞ്ഹി രുക്ഖസാരാദിമയം അന്തോഛിദ്ദം ചതൂസു പസ്സേസു ചമ്മോനദ്ധം വാദിതഭണ്ഡം, യം ‘‘ബിമ്ബിസക’’ന്തിപി വുച്ചതി, തം വാദേന്താപി കുമ്ഭഥൂണികാ. തേനാഹ ‘‘ബിമ്ബിസകവാദിതകാതിപി വദന്തീ’’തി.

൯൧൮. പാളിയം കപ്പകതന്തി കപ്പകതം നിവാസനപാരുപനൂപഗം. സമണചീവരതാ, അനനുഞ്ഞാതാനം ദാനന്തി ദ്വേ അങ്ഗാനി.

൯൨൧-൯൩൧. നവമദസമാനി ഉത്താനാനേവ.

നിട്ഠിതോ നഗ്ഗവഗ്ഗോ തതിയോ.