൮. വത്തക്ഖന്ധകോ

ആഗന്തുകവത്തകഥാവണ്ണനാ

൩൫൭. വത്തക്ഖന്ധകേ പത്ഥരിതബ്ബന്തി ആതപേ പത്ഥരിതബ്ബം. പാളിയം അഭിവാദാപേതബ്ബോതി വന്ദനത്ഥായ വസ്സം പുച്ഛനേന നവകോ സയമേവ വന്ദതീതി വുത്തം. നില്ലോകേതബ്ബോതി ഓലോകേതബ്ബോ.

ആഗന്തുകവത്തകഥാവണ്ണനാ നിട്ഠിതാ.

ആവാസികവത്തകഥാവണ്ണനാ

൩൫൯. ‘‘യഥാഭാഗ’’ന്തി ഠപിതട്ഠാനം അനതിക്കമിത്വാ മഞ്ചപീഠാദിം പപ്ഫോടേത്വാ പത്ഥരിത്വാ ഉപരി പച്ചത്ഥരണം ദത്വാ ദാനമ്പി സേനാസനപഞ്ഞാപനമേവാതി ദസ്സേന്തോ ആഹ ‘‘പപ്ഫോടേത്വാ ഹി പത്ഥരിതും പന വട്ടതിയേവാ’’തി.

ആവാസികവത്തകഥാവണ്ണനാ നിട്ഠിതാ.

അനുമോദനവത്തകഥാവണ്ണനാ

൩൬൨. പഞ്ചമേ നിസിന്നേതി അനുമോദനത്ഥായ നിസിന്നേ. ന മഹാഥേരസ്സ ഭാരോ ഹോതീതി അനുമോദകം ആഗമേതും ന ഭാരോ. അജ്ഝിട്ഠോവ ആഗമേതബ്ബോതി അത്തനാ അജ്ഝിട്ഠേഹി ഭിക്ഖൂഹി അനുമോദന്തേയേവ നിസീദിതബ്ബന്തി അത്ഥോ.

അനുമോദനവത്തകഥാവണ്ണനാ നിട്ഠിതാ.

ഭത്തഗ്ഗവത്തകഥാവണ്ണനാ

൩൬൪. മനുസ്സാനം പരിവിസനട്ഠാനന്തി യത്ഥ അന്തോവിഹാരേപി മനുസ്സാ സപുത്തദാരാ ആവസിത്വാ ഭിക്ഖൂ നേത്വാ ഭോജേന്തി. ആസനേസു സതീതി നിസീദനട്ഠാനേസു സന്തേസു. ഇദം, ഭന്തേ, ആസനം ഉച്ചന്തി ആസന്നേ സമഭൂമിഭാഗേ പഞ്ഞത്തം ഥേരാസനേന സമകം ആസനം സന്ധായ വുത്തം, ഥേരാസനതോ പന ഉച്ചതരേ ആപുച്ഛിത്വാപി നിസീദിതും ന വട്ടതി. യദി തം ആസന്നമ്പി നീചതരം ഹോതി, അനാപുച്ഛാപി നിസീദിതും വട്ടതി. മഹാഥേരസ്സേവ ആപത്തീതി ആസനേന പടിബാഹനാപത്തിയാ ആപത്തി. അവത്ഥരിത്വാതി പാരുതസങ്ഘാടിം അവത്ഥരിത്വാ, അനുക്ഖിപിത്വാതി അത്ഥോ.

പാളിയം ‘‘ഉഭോഹി ഹത്ഥേഹി…പേ… ഓദനോ പടിഗ്ഗഹേതബ്ബോ’’തി ഇദം ഹത്ഥതലേ വാ പച്ഛിപിട്ഠിആദിദുസ്സണ്ഠിതാധാരേ വാ പത്തം ഠപേത്വാ ഓദനസ്സ ഗഹണകാലേ പത്തസ്സ അപതനത്ഥായ വുത്തം, സുസജ്ജിതേ പന ആധാരേ പത്തം ഠപേത്വാ ഏകേന ഹത്ഥേന തം പരാമസിത്വാപി ഓദനം പടിഗ്ഗഹേതും വട്ടതി ഏവ. ഉഭോഹി ഹത്ഥേഹി…പേ… ഉദകം പടിഗ്ഗഹേതബ്ബന്തി ഏത്ഥാപി ഏസേവ നയോ.

ഹത്ഥധോവനഉദകന്തി ഭോജനാവസാനേ ഉദകം. തേനാഹ ‘‘പാനീയം പിവിത്വാ ഹത്ഥാ ധോവിതബ്ബാ’’തി. തേന പരിയോസാനേ ധോവനമേവ പടിക്ഖിത്തം, ഭോജനന്തരേ പന പാനീയപിവനാദിനാ നയേന ഹത്ഥം ധോവിത്വാ പുന ഭുഞ്ജിതും വട്ടതീതി ദസ്സേതി. പോത്ഥകേസു പന ‘‘പാനീയം പിവിത്വാ ഹത്ഥാ ന ധോവിതബ്ബാ’’തി ലിഖന്തി, തം പുരിമവചനേന ന സമേതി പരിയോസാനേ ഉദകസ്സേവ ‘‘ഹത്ഥധോവനഉദക’’ന്തി വുത്തത്താ. സചേ മനുസ്സാ ധോവഥ, ഭന്തേതിആദി നിട്ഠിതഭത്തം നിസിന്നം ഥേരം സന്ധായ വുത്തം. ധുരേ ദ്വാരസമീപേ.

ഭത്തഗ്ഗവത്തകഥാവണ്ണനാ നിട്ഠിതാ.

പിണ്ഡചാരികവത്തകഥാദിവണ്ണനാ

൩൬൬. പാളിയം ഠാപേതി വാതി തിട്ഠ ഭന്തേതി വദന്തി.

൩൬൭. അത്ഥി, ഭന്തേ, നക്ഖത്തപദാനീതി നക്ഖത്തപദവിസയാനി ഞാതാനി അത്ഥി, അസ്സയുജാദിനക്ഖത്തം ജാനാഥാതി അധിപ്പായോ. തേനാഹ ‘‘ന ജാനാമ, ആവുസോ’’തി. അത്ഥി, ഭന്തേ, ദിസാഭാഗന്തി ഏത്ഥാപി ഏസേവ നയോ. കേനജ്ജ, ഭന്തേ, യുത്തന്തി കേന നക്ഖത്തേന ചന്ദോ യുത്തോതി അത്ഥോ.

൩൬൯. അങ്ഗണേതി അബ്ഭോകാസേ. ഏവമേവ പടിപജ്ജിതബ്ബന്തി ഉദ്ദേസദാനാദി ആപുച്ഛിതബ്ബന്തി ദസ്സേതി.

൩൭൪. നിബദ്ധഗമനത്ഥായാതി അത്തനോവ നിരന്തരഗമനത്ഥായ. ഊഹദിതാതി ഏത്ഥ ഹദ-ധാതുസ്സ വച്ചവിസ്സജ്ജനത്ഥതായാഹ ‘‘ബഹി വച്ചമക്ഖിതാ’’തി.

പിണ്ഡചാരികവത്തകഥാദിവണ്ണനാ നിട്ഠിതാ.

വത്തക്ഖന്ധകവണ്ണനാനയോ നിട്ഠിതോ.