൨. പാരിവാസികക്ഖന്ധകോ

പാരിവാസികവത്തകഥാവണ്ണനാ

൭൫. പാരിവാസികക്ഖന്ധകേ അന്തമസോ മൂലായപടികസ്സനാരഹാദീനമ്പീതി ആദി-സദ്ദേന മാനത്താരഹമാനത്തചാരികഅബ്ഭാനാരഹേ സങ്ഗണ്ഹാതി. തേ ഹി പാരിവാസികാനം, പാരിവാസികാ ച തേസം പകതത്തട്ഠാനേ ഏവ തിട്ഠന്തി. അധോതപാദട്ഠപനകന്തി യത്ഥ ഠത്വാ പാദേ ധോവന്തി, താദിസം ദാരുഫലകഖണ്ഡാദിം. പാദഘംസനന്തി സക്ഖരകഥലാദിം. ‘‘വത്തം കരോന്തീ’’തി ഏത്തകമത്തസ്സേവ വുത്തത്താ സദ്ധിവിഹാരികാദീഹിപി അഭിവാദനാദിം കാതും ന വട്ടതി.

‘‘പാരിസുദ്ധിഉപോസഥേ കരിയമാനേ’’തി ഇദം പവാരണാദിവസേസു സങ്ഘേ പവാരേന്തേ അനുപഗതഛിന്നവസ്സാദീഹി കരിയമാനപാരിസുദ്ധിഉപോസഥമ്പി സന്ധായ വുത്തം. അത്തനോ പാളിയാതി നവകാനം പുരതോ.

‘‘പാരിവാസികസ്സേവാ’’തി ഇദം അബ്ഭാനാരഹപരിയോസാനേ സബ്ബേ ഗരുകട്ഠേ സന്ധായ വുത്തം. തേസമ്പി പച്ചേകം ഓണോജനസ്സ അനുഞ്ഞാതത്താ തദവസേസാ പകതത്താ ഏവ തം ന ലഭന്തി.

ചതുസ്സാലഭത്തന്തി ഭോജനസാലായ പടിപാടിയാ ദിയ്യമാനഭത്തം. ഹത്ഥപാസേ ഠിതേനാതി ദായകസ്സ ഹത്ഥപാസേ പടിഗ്ഗഹണരുഹനട്ഠാനേതി അധിപ്പായോ. മഹാപേളഭത്തേപീതി മഹന്തേസു ഭത്തപച്ഛിആദിഭാജനേസു ഠപേത്വാ ദിയ്യമാനഭത്തേസുപി.

൭൬. പാപിട്ഠതരാതി പാരാജികാപത്തീതി ഉക്കംസവസേന വുത്തം. സഞ്ചരിത്താദിപണ്ണത്തിവജ്ജതോ പന സുക്കവിസ്സട്ഠാദികാ ലോകവജ്ജാവ, തത്ഥാപി സങ്ഘഭേദാദികാ പാപിട്ഠതരാ ഏവ.

‘‘കമ്മന്തി പാരിവാസികകമ്മവാചാ’’തി ഏതേന കമ്മഭൂതാ വാചാതി കമ്മവാചാ-സദ്ദസ്സ അത്ഥോപി സിദ്ധോതി വേദിതബ്ബോ. സവചനീയന്തി ഏത്ഥ ‘‘സദോസ’’ന്തി (സാരത്ഥ. ടീ. ചൂളവഗ്ഗ. ൩.൭൬) അത്ഥം വദതി. അത്തനോ വചനേ പവത്തനകമ്മന്തി ഏവമേത്ഥ അത്ഥോ ദട്ഠബ്ബോ, ‘‘മാ പക്കമാഹീ’’തി വാ ‘‘ഏഹി വിനയധരാനം സമ്മുഖീഭാവ’’ന്തി വാ ഏവം അത്തനോ ആണായ പവത്തനകകമ്മം ന കാതബ്ബന്തി അധിപ്പായോ. ഏവഞ്ഹി കേനചി സവചനീയേ കതേ അനാദരേന അതിക്കമിതും ന വട്ടതി, ബുദ്ധസ്സ സങ്ഘസ്സ ആണാ അതിക്കന്താ നാമ ഹോതി.

രജോഹതഭൂമീതി പണ്ണസാലാവിസേസനം. പച്ചയന്തി വസ്സാവാസികചീവരം. സേനാസനം ന ലഭതീതി വസ്സഗ്ഗേന ന ലഭതി.

അപണ്ണകപടിപദാതി അവിരദ്ധപടിപദാ. സചേ വായമന്തോപീതി ഏത്ഥ അവിസയഭാവം ഞത്വാ അവായമന്തോപി സങ്ഗയ്ഹതി.

൮൧. അവിസേസേനാതി പാരിവാസികുക്ഖിത്തകാനം സാമഞ്ഞേന. പഞ്ചവണ്ണച്ഛദനബദ്ധട്ഠാനേസൂതി പഞ്ചപ്പകാരച്ഛദനേഹി ഛന്നട്ഠാനേസു.

ഓബദ്ധന്തി ഉട്ഠാനാദിബ്യാപാരപടിബദ്ധം. പീളിതന്തി അത്ഥോ. മഞ്ചേ വാ പീഠേ വാതി ഏത്ഥ വാ-സദ്ദോ സമുച്ചയത്ഥോ, തേന തട്ടികാചമ്മഖണ്ഡാദീസു ദീഘാസനേസുപി നിസീദിതും ന വട്ടതീതി ദീപിതം ഹോതി.

ന വത്തഭേദദുക്കടന്തി വുഡ്ഢതരസ്സ ജാനന്തസ്സാപി വത്തഭേദേ ദുക്കടം നത്ഥീതി ദസ്സേതി. ‘‘വത്തം നിക്ഖിപാപേത്വാ’’തി ഇദം പാരിവാസാദിമേവ സന്ധായ വുത്തം.

പാരിവാസികവത്തകഥാവണ്ണനാ നിട്ഠിതാ.

പാരിവാസികക്ഖന്ധകവണ്ണനാനയോ നിട്ഠിതോ.