൮. അനുരുദ്ധസംയുത്തം

൧. രഹോഗതവഗ്ഗോ

൧-൨. പഠമരഹോഗതസുത്താദിവണ്ണനാ

൮൯൯-൯൦൦. ഛത്തിംസായ ഠാനേസൂതി അജ്ഝത്തം കായേ സമുദയധമ്മാനുപസ്സീ, വയോ, സമുദയവയോ, ബഹിദ്ധാ സമുദയോ, വയോ, സമുദയവയോ, അജ്ഝത്തബഹിദ്ധാ സമുദയോ, വയോ, സമുദയവയധമ്മാനുപസ്സീതി നവ അനുപസ്സനാ, തഥാ വേദനായ ചിത്തേ ധമ്മേസൂതി ഏവം ഛത്തിംസായ ഠാനേസു. ദുതിയേ ദ്വാദസസു ഠാനേസൂതി കായേ അജ്ഝത്തം ബഹിദ്ധാ അജ്ഝത്തബഹിദ്ധാ, വേദനായ ചിത്തേ ധമ്മേസൂതി ഏവം ദ്വാദസസു ഠാനേസു.

൩. സുതനുസുത്തവണ്ണനാ

൯൦൧. ഇമായ പാളിയാതി ഇമായ ഹീനത്തികപാളിയാ. ഇമേ ധമ്മാ ഹീനാ ലാമകട്ഠേന. ഇമേ ധമ്മാ മജ്ഝിമാ ഹീനപണീതാനം മജ്ഝേ ഭവാതി. ഉത്തമട്ഠേന അത്തപ്പകട്ഠേന പധാനഭാവം നീതാതി പണീതാ.

൪-൭. പഠമകണ്ഡകീസുത്താദിവണ്ണനാ

൯൦൨-൯൦൫. കണ്ഡകാ ഏതിസ്സാ അത്ഥീതി കണ്ഡകീ, കരമന്ദഗച്ഛോ. ഓസധിഭാവാപേക്ഖായ ഇത്ഥിലിങ്ഗനിദ്ദേസോ, തബ്ബഹുലതായ തം വനം ‘‘കണ്ഡകീവന’’ന്തേവ പഞ്ഞായിത്ഥ. സഹസ്സലോകന്തി സഹസ്സചക്കവാളലോകം. ദസചക്കവാളസഹസ്സം ഏകാവജ്ജനസ്സ ആപാഥം ആഗച്ഛതി തഥാ ആലോകവഡ്ഢനസ്സ കതത്താ.

൯. അമ്ബപാലിവനസുത്തവണ്ണനാ

൯൦൭. അരഹത്തഭാവദീപകന്തി അരഹത്തസ്സ അത്ഥിഭാവദീപകം. ‘‘അരഹത്തഭാവദീപിക’’ന്തി വാ പാഠോ.

രഹോഗതവഗ്ഗവണ്ണനാ നിട്ഠിതാ.

൨. ദുതിയവഗ്ഗവണ്ണനാ

൯൦൯-൯൨൨. ദസബലഞാണന്തി ദസവിധബലഞാണം. ഏകദേസേനാതി പദേസവസേന. സാവകാനമ്പി അത്തനോ അഭിനീഹാരാനുരൂപം ഞാണം പവത്തതീതി തേ കാലപദേസവസേന ചേവ യഥാപരിചയസത്തപദേസവസേന ച ഠാനാനീതി ജാനന്തി, സമ്മാസമ്ബുദ്ധാനം പന അനന്തഞാണതായ സബ്ബത്ഥേവ അപ്പടിഹതമേവ ഞാണന്തി ആഹ – ‘‘സബ്ബഞ്ഞുബുദ്ധാനം പനാ’’തിആദി. ഏതം ദസബലഞാണം അനന്തവിസയത്താ നിപ്പദേസം അനൂനതായ സബ്ബാകാരപരിപൂരം.

ദുതിയവഗ്ഗവണ്ണനാ നിട്ഠിതാ.

അനുരുദ്ധസംയുത്തവണ്ണനാ നിട്ഠിതാ.