൩. മാതുഗാമസംയുത്തം

൧. പഠമപേയ്യാലവഗ്ഗോ

൧-൨. മാതുഗാമസുത്താദിവണ്ണനാ

൨൮൦-൨൮൧. അഗുണങ്ഗേഹീതി അഗുണകോട്ഠാസേഹി. രൂപയതീതി രൂപം, സരീരരൂപം. സരീരരൂപം പാസംസം ഏതസ്സ അത്ഥീതി രൂപവാ, തപ്പടിക്ഖേപേന ന ച രൂപവാ, സമ്പന്നരൂപോ ന ഹോതീതി അത്ഥോ. ഞാതികുലതോ അഞ്ഞതോ വാ ആഗതായ ഭോഗസമ്പദായ അഭാവേന ന ഭോഗസമ്പന്നോ. ദുസ്സീലോതി നിസ്സീലോ. നിസ്സീലതായ ഏവ ചസ്സാ പുബ്ബുട്ഠായിതാദിആചാരാഭാവോ വുത്തോ. ആലസിയോതി ആലസിയതായ യുത്തോ. പജഞ്ചസ്സ ന ലഭതീതി പജാഭാവസീസേന തസ്സാ പരിവാരഹാനി വുത്താ. പരിവത്തേതബ്ബന്തി പുരിസവസേന പരിവത്തേതബ്ബം.

മാതുഗാമസുത്താദിവണ്ണനാ നിട്ഠിതാ.

൩. ആവേണികദുക്ഖസുത്തവണ്ണനാ

൨൮൨. ആവേണിതബ്ബതോ മരിയാദായ വിസും അസാധാരണതോ പസ്സിതബ്ബതോ ആവേണികാനി. പടിപച്ചേകേ പുഗ്ഗലേ നിയുത്താനീതി പാടിപുഗ്ഗലികാനി. പരിചാരികഭാവന്തി ഉപട്ഠായികഭാവം.

ആവേണികദുക്ഖസുത്തവണ്ണനാ നിട്ഠിതാ.

൪. തീഹിധമ്മേഹിസുത്താദിവണ്ണനാ

൨൮൩-൩൦൩. മച്ഛേരമലപരിയുട്ഠിതേനാതി മച്ഛരിയമലേന അഭിഭൂതേന. തേനാതി കസ്സചി കിഞ്ചി അദാനേന ച. ഏതം ‘‘മച്ഛേരമലപരിയുട്ഠിതേനാ’’തിആദി വുത്തം. വിലോകേന്തോ വിചരതി ഇസ്സാപകതചിത്തതായ. പഞ്ചമാദീനി യാവ ഏകാദസമാ ഉത്താനത്ഥാനേവ.

തീഹിധമ്മേഹിസുത്താദിവണ്ണനാ നിട്ഠിതാ.

൩. ബലവഗ്ഗോ

൧. വിസാരദസുത്തവണ്ണനാ

൩൦൪. രൂപസമ്പത്തി രൂപബലം തംസമങ്ഗിനോ ഉപത്ഥമ്ഭകഭാവതോ. ഏസ നയോ സേസേസുപി. ബലാനി ഹി സത്താനം വുഡ്ഢിയാ ഉപത്ഥമ്ഭകപച്ചയോ ഹോതി, യഥാ തം ആഹാരോ. തേനാഹ – ‘‘ഇമാനീ’’തിആദി.

വിസാരദസുത്തവണ്ണനാ നിട്ഠിതാ.

൨-൧൦. പസയ്ഹസുത്താദിവണ്ണനാ

൩൦൫-൩൧൩. അഭിഭവിത്വാ സബ്ബം അന്തോജനം സാമികഞ്ച. നാസേന്തീതി നാസനം അദസ്സനം നേന്തി നീഹരന്തീതി അത്ഥോ.

പസയ്ഹസുത്താദിവണ്ണനാ നിട്ഠിതാ.

മാതുഗാമസംയുത്തവണ്ണനാ നിട്ഠിതാ.