൧൬. നന്ദിക്ഖയവഗ്ഗോ

൧-൪. അജ്ഝത്തനന്ദിക്ഖയസുത്താദിവണ്ണനാ

൧൫൬-൧൫൯. അത്ഥതോതി സഭാവതോ. ഞാണേന അരിയതോ ഞാതബ്ബതോ അത്ഥോ, സഭാവോതി. ഏവഞ്ഹി അഭിജ്ജനസഭാവോ നന്ദനട്ഠേന നന്ദീ, രഞ്ജനട്ഠേന രാഗോ. വിമുത്തിവസേനാതി വിമുത്തിയാ അധിഗമവസേന. ഏത്ഥാതി ഇമസ്മിം പഠമസുത്തേ. ദുതിയാദീസൂതി ദുതിയതതിയചതുത്ഥേസു. ഉത്താനമേവ ഹേട്ഠാ വുത്തനയത്താ.

അജ്ഝത്തനന്ദിക്ഖയസുത്താദിവണ്ണനാ നിട്ഠിതാ.

൫-൬. ജീവകമ്ബവനസമാധിസുത്താദിവണ്ണനാ

൧൬൦-൧൬൧. സമാധിവികലാനം ചിത്തേകഗ്ഗതം ലഭന്താനം, പടിസല്ലാനവികലാനം കായവിവേകഞ്ച ചിത്തേകഗ്ഗതഞ്ച ലഭന്താനന്തി യോജനാ. പാകടം ഹോതീതി വിഭൂതം ഹുത്വാ ഉപട്ഠാതി. ഓക്ഖായതി പച്ചക്ഖായതീതി ചതുസച്ചധമ്മാനം വിഭൂതഭാവേന ഉപട്ഠാനസ്സ കഥിതത്താ വുത്തം – ‘‘ദ്വീസുപി…പേ… കഥിതാ’’തി.

ജീവകമ്ബവനസമാധിസുത്താദിവണ്ണനാ നിട്ഠിതാ.

൭-൯. കോട്ഠികഅനിച്ചസുത്താദിവണ്ണനാ

൧൬൨-൧൬൪. അനിച്ചാനുപസ്സനാദയോ ഏവ വിമുത്തിപരിപാചനിയാ ധമ്മാ നാമ. ഥേരസ്സ തദാ സദ്ധാദീനി ഇന്ദ്രിയാനി ന പരിപാകം ഉപഗതാനി, ഥേരോ ഇമാഹി ദേസനാഹി ഇന്ദ്രിയപരിപാകമഗമാസി.

കോട്ഠികഅനിച്ചസുത്താദിവണ്ണനാ നിട്ഠിതാ.

൧൦-൧൨. മിച്ഛാദിട്ഠിപഹാനസുത്താദിവണ്ണനാ

൧൬൫-൧൬൭. പാടിയേക്കന്തി വിസും വിസും. വുത്തനയേനേവാതി ഹേട്ഠാ വുത്തനയേനേവ അപുബ്ബസ്സ വത്തബ്ബസ്സ അഭാവാ.

മിച്ഛാദിട്ഠിപഹാനസുത്താദിവണ്ണനാ നിട്ഠിതാ.

നന്ദിക്ഖയവഗ്ഗവണ്ണനാ നിട്ഠിതാ.