൮. നാഗസംയുത്തം

൧. സുദ്ധികസുത്തവണ്ണനാ

൩൪൨. അണ്ഡജാതി അണ്ഡേ ജാതാ. വത്ഥികോസേതി വത്ഥികോസസഞ്ഞിതേ ജരായുപുടേ ജാതാ. സംസേദേതി സംസിന്നേ കിലിന്നട്ഠാനേ ഉപ്പന്നാ. ഉപപതിത്വാ വിയാതി കുതോചിപി അവപതിത്വാ വിയ നിബ്ബത്താ. പുഗ്ഗലാനന്തി തഥാ വിനേതബ്ബപുഗ്ഗലാനം.

സുദ്ധികസുത്തവണ്ണനാ നിട്ഠിതാ.

൨-൫൦. പണീതതരസുത്താദിവണ്ണനാ

൩൪൩-൩൯൧. വിസ്സട്ഠകായാതി ‘‘യേ ചമ്മേന വാ രുധിരേന വാ അട്ഠിനാ വാ അത്ഥികാ, തേ സബ്ബം ഗണ്ഹന്തൂ’’തി തത്ഥ നിരപേക്ഖചിത്തതായ അധിട്ഠിതസീലതായ പരിച്ചത്തസരീരാ. ദുവിധകാരിനോതി ‘‘കാലേന കുസലം, കാലേന അകുസല’’ന്തി ഏവം കുസലാകുസലകാരിനോ. സഹ ബ്യയതി പവത്തതീതി സഹബ്യോ, സഹചാരോ. തസ്സ ഭാവോ സഹബ്യതാ, തം സഹബ്യതം. അദനീയതോ അന്നം. ഖാദനീയതോ ഖജ്ജം. പാതബ്ബതോ പാനം. നിവസനീയതോ വത്ഥം. നിവസിതബ്ബം നിവാസനം. പരിവരിതബ്ബം പാവുരണം. യാന്തി തേനാതി യാനം, ഉപാഹനാദിയാനാനി. ആദിസദ്ദേന വയ്ഹസിവികാദീനം സങ്ഗഹോ. ഛത്തമ്പി പരിസ്സയാതപദുക്ഖപരിരക്ഖണേന മഗ്ഗഗമനസാധനന്തി കത്വാ ‘‘ഛത്തുപാഹന’’ന്തിആദി വുത്തം. തേന വുത്തം ‘‘യം കിഞ്ചി ഗമനപച്ചയ’’ന്തി. പത്ഥനം കത്വാ…പേ… തത്ഥ നിബ്ബത്തന്തി ചമ്പേയ്യനാഗരാജാ വിയാതി ദട്ഠബ്ബം.

പണീതതരസുത്താദിവണ്ണനാ നിട്ഠിതാ.

നാഗസംയുത്തവണ്ണനാ നിട്ഠിതാ.