൯. സുപണ്ണസംയുത്തവണ്ണനാ

൩൯൨-൪൩൭. പത്താനന്തി ഉഭോസു പക്ഖേസു പത്താനം. വണ്ണവന്തതായാതി അതിസയേന വിചിത്തവണ്ണതായ. അതിസയത്ഥോ ഹി അയം വന്ത-സദ്ദോ. പുരിമനയേനാതി നാഗസംയുത്തേ പഠമസുത്തേ വുത്തനയേന. ഉദ്ധരന്തീതി സമുദ്ദതോ ഉദ്ധരന്തി, പഥവന്തരപബ്ബതന്തരതോ പന തേസം ഉദ്ധരണം ദുക്കരമേവ. പണീതതരേതി ബലേന പണീതതരേ, ബലവന്തേതി അത്ഥോ. അനുദ്ധരണീയനാഗാതി ആനുഭാവമഹന്തതായ ച വസനട്ഠാനവിദുഗ്ഗതായ ച ഉദ്ധരിതും അസക്കുണേയ്യാ നാഗാ. തേ ‘‘സത്തവിധാ’’തി വത്വാ സരൂപതോ വസനട്ഠാനതോ ച ദസ്സേന്തോ ‘‘കമ്ബലസ്സതരാ’’തിആദിമാഹ. തത്ഥ കമ്ബലസ്സതരാ ധതരട്ഠാതി ഇമേ ജാതിവസേന വുത്താ. സത്തസീദന്തരവാസിനോതി സത്തവിധസീദസമുദ്ദവാസിനോ. പഥവിട്ഠകാതി പഥവന്തരവാസിനോ, തഥാ പബ്ബതട്ഠകാ. തേ ച വിമാനവാസിനോ. തേ നാഗേ കോചി സുപണ്ണോ ഉദ്ധരിതും ന സക്കോതീതി സമ്ബന്ധോ. സേസന്തി ‘‘കായേന ദ്വയകാരിനോ’’തിആദീസു യം വത്തബ്ബം, തം സബ്ബം നാഗസംയുത്തേ വുത്തനയമേവ, തത്ഥ ച വുത്തനയേനേവ അത്ഥോ വേദിതബ്ബോതി അധിപ്പായോ.

സുപണ്ണസംയുത്തവണ്ണനാ നിട്ഠിതാ.