൧൦. സൂചിമുഖീസുത്തവണ്ണനാ

൩൪൧. തസ്മിം വചനേ പടിക്ഖിത്തേതി – ‘‘അധോമുഖോ ഭുഞ്ജസീ’’തി പരിബ്ബാജികായ വുത്തവചനേ – ‘‘ന ഖ്വാഹം ഭഗിനീ’’തി പടിക്ഖിത്തേ. വാദന്തി ദോസം. ഉബ്ഭമുഖോതി ഉപരിമുഖോ. പുരത്ഥിമാദികാ ചതസ്സോ ദിസാ. ദക്ഖിണപുരത്ഥിമാദികാ ചതസ്സോ വിദിസാ.

ആരാമആരാമവത്ഥുആദീസു ഭൂമിപരികമ്മബീജാഭിസങ്ഖരണാദിപടിസംയുത്താ വിജ്ജാ വത്ഥുവിജ്ജാ, തസ്സാ പന മിച്ഛാജീവഭാവം ദസ്സേതും ‘‘തേസ’’ന്തിആദി വുത്തം. തേസം തേസം അത്തനോ പച്ചയദായകാനം. തത്ഥ തത്ഥ ഗമനന്തി തേസം സാസനഹരണവസേന തം തം ഗാമന്തരദേസന്തരം. ഏവമാരോചേസീതി അത്തുക്കംസനപരവമ്ഭനരഹിതം കണ്ണസുഖം പേമനീയം ഹദയങ്ഗമം ഥേരസ്സ ധമ്മകഥം സുത്വാ പസന്നമാനസാ ഏവം ‘‘ധമ്മികം സമണാ സക്യപുത്തിയാ’’തിആദിനാ സാസനസ്സ ഗുണസംകിത്തനവാചം കുലാനം ആരോചേസി.

സൂചിമുഖീസുത്തവണ്ണനാ നിട്ഠിതാ.

സാരിപുത്തസംയുത്തവണ്ണനാ നിട്ഠിതാ.