൨. രാധസംയുത്തം

൧. പഠമവഗ്ഗോ

൧. മാരസുത്തവണ്ണനാ

൧൬൦. മാരസദ്ദോയം ഭാവസാധനോതി ദസ്സേന്തോ ‘‘മാരോ വാ അസ്സാതി മരണം വാ ഭവേയ്യാ’’തി ആഹ. മാരേതാതി മരിതബ്ബോ മാരം മരണം ഏതബ്ബോതി ആഹ ‘‘മാരേതബ്ബോ’’തി. അനുപാദാനിബ്ബാനത്ഥാതി ഫലവിമുത്തിസങ്ഖാതാ അരഹതോ അരഹന്തതാ നാമ യാവദേവ അനുപാദാനിബ്ബാനത്ഥാ. നിബ്ബാനബ്ഭന്തരേതി അനുപാദാനിബ്ബാനാധിഗമസ്സ അബ്ഭന്തരേ തതോ ഓരമേവ ഇദം മഗ്ഗം ബ്രഹ്മചരിയം വുസ്സതി, ന തതോ പരം. അസ്സാതി ബ്രഹ്മചരിയസ്സ.

മാരസുത്തവണ്ണനാ നിട്ഠിതാ.

൨-൧൦. സത്തസുത്താദിവണ്ണനാ

൧൬൧-൧൬൯. ലഗ്ഗപുച്ഛാതി ലഗ്ഗനസ്സ ബജ്ഝനസ്സ പുച്ഛാ. യദി രൂപാദീസു സത്തത്താ സത്തോ, ഖീണാസവാ കഥം സത്താതി? സത്തഭൂതപുബ്ബാതി കത്വാ. കീളാവിഗമന്തി കീളായ അപനയനം ഓരമണം. യന്തരജ്ജു വിയ ഭവപബന്ധസ്സ നയനതോ ഭവരജ്ജൂതി തണ്ഹാ വുത്താ.

സത്തസുത്താദിവണ്ണനാ നിട്ഠിതാ.

പഠമവഗ്ഗവണ്ണനാ നിട്ഠിതാ.

൨. ദുതിയവഗ്ഗോ

൧-൧൨. മാരസുത്താദിവണ്ണനാ

൧൭൦-൧൮൧. രൂപാദിവിനിമുത്തം മരണം നാമ നത്ഥി രൂപാദീനംയേവ വിഭവേ മരണസമഞ്ഞാതി. മരണധമ്മോ വിനാസഭാവോ.

മാരസുത്താദിവണ്ണനാ നിട്ഠിതാ.

ദുതിയവഗ്ഗവണ്ണനാ നിട്ഠിതാ.

൩-൪. ആയാചനവഗ്ഗാദി

൧-൧൧. മാരാദിസുത്തഏകാദസകവണ്ണനാ

൧൮൨-൨൦൫. സുഖുമം കാരണം ഉപട്ഠാതി, തേനേസ ഥേരോ പടിഭാനേയ്യകാനം ഏതദഗ്ഗേ ഠപിതോ. വിമുത്തിപരിപാചനീയധമ്മവസേനേവ, ന പടിവേധാവഹഭാവേന.

മാരാദിസുത്തഏകാദസകവണ്ണനാ നിട്ഠിതാ.

ആയാചനവഗ്ഗാദിവണ്ണനാ നിട്ഠിതാ.

സാരത്ഥപ്പകാസിനിയാ സംയുത്തനികായ-അട്ഠകഥായ

രാധസംയുത്തവണ്ണനായ ലീനത്ഥപ്പകാസനാ സമത്താ.