൭. ഉപാദാപരിതസ്സനാസുത്തവണ്ണനാ

൭. ഗഹണേന ഉപ്പന്നം പരിതസ്സനന്തി ഖന്ധപഞ്ചകേ ‘‘അഹം മമാ’’തി ഗഹണേന ഉപ്പന്നം തണ്ഹാപരിതസ്സനം ദിട്ഠിപരിതസ്സനഞ്ച. അപരിതസ്സനന്തി പരിതസ്സനാഭാവം, പരിതസ്സനപടിപക്ഖം വാ. അഹു വത മേതം ബലയോബ്ബനാദി. കമ്മവിഞ്ഞാണന്തി വിപരിണാമാരമ്മണം തണ്ഹാദിട്ഠിസഹഗതം വിഞ്ഞാണം തദനുവത്തി ച. അനുപരിവത്തി നാമ തം ആരമ്മണം കത്വാ പവത്തി. തേനാഹ ‘‘വിപരിണാമാരമ്മണചിത്തതോ’’തി. അകുസലധമ്മസമുപ്പാദാതി തണ്ഹായ അഞ്ഞാകുസലധമ്മസമുപ്പാദാ. പരിയാദിയിത്വാതി ഖേപേത്വാ, തസ്സ പവത്തിതും ഓകാസം അദത്വാ. സഉത്താസോതി തണ്ഹാദിട്ഠിവസേന സഉത്താസോ. ഗണ്ഹിത്വാതി തണ്ഹാദിട്ഠിഗ്ഗാഹേഹി ഗഹേത്വാ തേസഞ്ചേവ വസേന പരിതസ്സകോ. രൂപഭേദാനുപരിവത്തി ചിത്തം ന ഹോതി. വട്ടതീതി സബ്ബാകാരേന വത്തും യുത്തന്തി അത്ഥോ.

ഉപാദാപരിതസ്സനാസുത്തവണ്ണനാ നിട്ഠിതാ.