൩. കുലസുത്തവണ്ണനാ

൨൨൫. വിധംസയന്തി വിഹേഠയന്തി. വഡ്ഢിതാതി ഭാവനാപാരിപൂരിവസേന പരിബ്രൂഹിതാ. പുനപ്പുനം കതാതി ഭാവനായ ബഹുലീകരണേന അപരാപരം പവത്തിതാ യുത്തയാനം വിയ കതാതി യഥാ യുത്തം ആജഞ്ഞരഥം ഛേകേന സാരഥിനാ അധിട്ഠിതം യഥാരുചി പവത്തതി, ഏവം യഥാരുചി പവത്തിയാ ഗമിതാ. പതിട്ഠാനട്ഠേനാതി അധിട്ഠാനട്ഠേന. വത്ഥു വിയ കതാ സബ്ബസോ ഉപക്കിലേസവിസോധനേന സുവിസോധിതമരിയാദം വിയ കതാ. അധിട്ഠിതാതി പടിപക്ഖദൂരീഭാവതോ സുഭാവിതഭാവേന അവികമ്പനേയ്യതായ ഠപിതാ. സമന്തതോ ചിതാതി സബ്ബഭാഗേന ഭാവനൂപചയം ഗമിതാ. തേനാഹ ‘‘സുവഡ്ഢിതാ’’തി. സുട്ഠു സമാരദ്ധാതി മേത്താഭാവനായ മത്ഥകപ്പത്തിയാ സമ്മദേവ സമ്പാദിതാ.

കുലസുത്തവണ്ണനാ നിട്ഠിതാ.