൩. ഘടസുത്തവണ്ണനാ

൨൩൭. പരിവേണഗ്ഗേനാതി പരിവേണഭാഗേന. കേചി ‘‘ഏകവിഹാരേതി ഏകച്ഛന്നേ ഏകസ്മിം ആവാസേ’’തി വദന്തി. തേതി തേ ദ്വേപി ഥേരാ. പാടിയേക്കേസു ഠാനേസൂതി വിസും വിസും ഠാനേസു. നിസീദന്തീതി ദിവാവിഹാരം നിസീദന്തി. ഓളാരികോ നാമ ജാതോ പരിത്തധമ്മാരമ്മണത്താ തസ്സ. തേതി ഥേരോ ഭഗവാ ച.

പരിപുണ്ണവീരിയോതി ചതുകിച്ചസാധനവസേന സമ്പുണ്ണവീരിയോ. പഗ്ഗഹിതവീരിയോതി ഈസകമ്പി സങ്കോചം അനാപജ്ജിത്വാ പവത്തിതവീരിയോ. ഉപനിക്ഖേപനമത്തസ്സേവാതി സമീപേ ഠപനമത്തസ്സേവ.

ചതുഭൂമകധമ്മേസു ലബ്ഭമാനത്താ പഞ്ഞായ ‘‘ചതുഭൂമകധമ്മേ അനുപവിസിത്വാ ഠിതട്ഠേനാ’’തി വുത്തം. ലക്ഖിതബ്ബട്ഠേന സമാധി ഏവ സമാധിലക്ഖണം. ഏവം വിപസ്സനാലക്ഖണം വേദിതബ്ബം. അഞ്ഞമഞ്ഞസ്സാതി അഞ്ഞസ്സ അഞ്ഞസ്സ നാനാലക്ഖണാതി വേദിതബ്ബം. അഞ്ഞസ്സാതി ഇതരസ്സ. ധുരന്തി വഹിതബ്ബഭാരം. ദ്വീസുപി ഏതേസൂതി സമാധിലക്ഖണവിപസ്സനാലക്ഖണേസു സമ്മാസമ്ബുദ്ധോ നിപ്ഫത്തിം ഗതോ.

ഘടസുത്തവണ്ണനാ നിട്ഠിതാ.