൧൦. ഭിക്ഖുസംയുത്തം

൧. കോലിതസുത്തവണ്ണനാ

൨൩൫. സാവകാനം ആലാപോതി സാവകാനം സബ്രഹ്മചാരിം ഉദ്ദിസ്സ ആലാപോ. ബുദ്ധേഹി സദിസാ മാ ഹോമാതി ബുദ്ധാചിണ്ണം സമുദാചാരം അകഥേന്തേഹി സാവകേഹി, ‘‘ആവുസോ ഭിക്ഖവേ’’തി ആലപിതാ ഭിക്ഖൂ, ‘‘ആവുസോ’’തി പടിവചനം ദേന്തി, ന, ‘‘ഭന്തേ’’തി. ദുതിയജ്ഝാനേ വിതക്കവിചാരാ നിരുജ്ഝന്തി തേസം നിരോധേനേവ തസ്സ ഝാനസ്സ ഉപ്പാദേതബ്ബതോ. യേസം നിരോധാതി യേസം വചീസങ്ഗാരാനം വിതക്കവിചാരാനം നിരുജ്ഝനേന സുവിക്ഖമ്ഭിതഭാവേന സദ്ദായതനം അപ്പവത്തിം ഗച്ഛതി കാരണസ്സ ദൂരതോ പസ്സമ്ഭിതത്താ. അരിയോതി നിദ്ദോസോ. പരിസുദ്ധോ തുണ്ഹീഭാവോ, ന തിത്ഥിയാനം മൂഗബ്ബതഗ്ഗഹണം വിയ അപരിസുദ്ധോതി അധിപ്പായോ. പഠമജ്ഝാനാദീനീതി ആദി-സദ്ദേന തതിയജ്ഝാനാദീനി സങ്ഗണ്ഹാതി.

ആരമ്മണഭൂതേന വിതക്കേന സഹ ഗതാ പവത്താതി വിതക്കസഹഗതാതി ആഹ ‘‘വിതക്കാരമ്മണാ’’തി. വിതക്കാരമ്മണതാ ച സഞ്ഞാമനസികാരാനം സുഖുമആരമ്മണഗ്ഗഹണവസേന ദട്ഠബ്ബാ. തേനാഹ ‘‘ന സന്തതോ ഉപട്ഠഹിംസൂ’’തി. ന പഗുണം സമ്മദേവ വസീഭാവസ്സ അനാപാദിതത്താ. സഞ്ഞാമനസികാരാപീതി തതിയജ്ഝാനാധിഗമായ പവത്തിയമാനാ സഞ്ഞാമനസികാരാപി ഹാനഭാഗിയാവ അഹേസും, ന വിസേസഭാഗിയാ. സമ്മാ ഠപേഹീതി ബഹിദ്ധാ വിക്ഖേപം പഹായ സമ്മാ അജ്ഝത്തമേവ ചിത്തം ഠപേഹി. ഏകഗ്ഗം കരോഹീതി തേനേവ വിക്ഖേപപടിബാഹനേന അവിഹതമാനസതായ ചിത്തസമാധാനവസേന ഏകഗ്ഗം കരോഹി. ആരോപേഹീതി ഈസകമ്പി ബഹുമ്പി അപതിതം കത്വാ കമ്മട്ഠാനാരമ്മണേ ആരോപേഹി. ദുതിയഅഗ്ഗസാവകഭൂമിയാ പാരിപൂരിയാ ആയസ്മാ മഹാഭിഞ്ഞോ, ന യഥാ തഥാതി ആഹ ‘‘മഹാഭിഞ്ഞതന്തി ഛളഭിഞ്ഞത’’ന്തി. ഇമിനാ ഉപായേനാതി ഇമിനാ ‘‘അഥ ഖോ മം, ആവുസോ’’തിആദിനാ വുത്തേന ഉപായേന. വഡ്ഢേത്വാതി ഉത്തരി ഉത്തരി വിസേസഭാഗിയഭാവാപാദനേന സമാധിം പഞ്ഞഞ്ച ബ്രൂഹേത്വാ ബ്രൂഹേത്വാ.

കോലിതസുത്തവണ്ണനാ നിട്ഠിതാ.

൨. ഉപതിസ്സസുത്തവണ്ണനാ

൨൩൬. അതിഉളാരമ്പി സത്തം വാ സങ്ഖാരം വാ സന്ധായ വുത്തം സബ്ബത്ഥമേവ സബ്ബസോ ഛന്ദരാഗസ്സ സുപ്പഹീനത്താ. ജാനനത്ഥം പുച്ഛതി സത്ഥുഗുണാനം അതിവിയ ഉളാരതമഭാവതോ.

ഉപതിസ്സസുത്തവണ്ണനാ നിട്ഠിതാ.

൩. ഘടസുത്തവണ്ണനാ

൨൩൭. പരിവേണഗ്ഗേനാതി പരിവേണഭാഗേന. കേചി ‘‘ഏകവിഹാരേതി ഏകച്ഛന്നേ ഏകസ്മിം ആവാസേ’’തി വദന്തി. തേതി തേ ദ്വേപി ഥേരാ. പാടിയേക്കേസു ഠാനേസൂതി വിസും വിസും ഠാനേസു. നിസീദന്തീതി ദിവാവിഹാരം നിസീദന്തി. ഓളാരികോ നാമ ജാതോ പരിത്തധമ്മാരമ്മണത്താ തസ്സ. തേതി ഥേരോ ഭഗവാ ച.

പരിപുണ്ണവീരിയോതി ചതുകിച്ചസാധനവസേന സമ്പുണ്ണവീരിയോ. പഗ്ഗഹിതവീരിയോതി ഈസകമ്പി സങ്കോചം അനാപജ്ജിത്വാ പവത്തിതവീരിയോ. ഉപനിക്ഖേപനമത്തസ്സേവാതി സമീപേ ഠപനമത്തസ്സേവ.

ചതുഭൂമകധമ്മേസു ലബ്ഭമാനത്താ പഞ്ഞായ ‘‘ചതുഭൂമകധമ്മേ അനുപവിസിത്വാ ഠിതട്ഠേനാ’’തി വുത്തം. ലക്ഖിതബ്ബട്ഠേന സമാധി ഏവ സമാധിലക്ഖണം. ഏവം വിപസ്സനാലക്ഖണം വേദിതബ്ബം. അഞ്ഞമഞ്ഞസ്സാതി അഞ്ഞസ്സ അഞ്ഞസ്സ നാനാലക്ഖണാതി വേദിതബ്ബം. അഞ്ഞസ്സാതി ഇതരസ്സ. ധുരന്തി വഹിതബ്ബഭാരം. ദ്വീസുപി ഏതേസൂതി സമാധിലക്ഖണവിപസ്സനാലക്ഖണേസു സമ്മാസമ്ബുദ്ധോ നിപ്ഫത്തിം ഗതോ.

ഘടസുത്തവണ്ണനാ നിട്ഠിതാ.

൪. നവസുത്തവണ്ണനാ

൨൩൮. അഭിചേതസി നിസ്സിതാ ആഭിചേതസികാ. പടിപക്ഖവിധമനേന അഭിവിസിട്ഠം ചിത്തം അഭിചിത്തം. യസ്മാ ഝാനാനം തംസമ്പയുത്തം ചിത്തം നിസ്സായ പച്ചയോ ഹോതിയേവ, തസ്മാ ‘‘നിസ്സിതാന’’ന്തി വുത്തം. നികാമലാഭീതി യഥിച്ഛിതലാഭീ. യഥാപരിച്ഛേദേനാതി യഥാകതേന കാലപരിച്ഛേദേന. വിപുലലാഭീതി അപ്പമാണലാഭീ. ‘‘കസിര’’ന്തി ഹി പരിത്തം വുച്ചതി, തപ്പടിപക്ഖേന അകസിരം അപ്പമാണം. തേനാഹ ‘‘പഗുണജ്ഝാനോതി അത്ഥോ’’തി. സിഥിലമാരബ്ഭാതി സിഥിലം വീരിയാരമ്ഭം കത്വാതി അത്ഥോതി ആഹ ‘‘സിഥിലം വീരിയം പവത്തേത്വാ’’തി.

നവസുത്തവണ്ണനാ നിട്ഠിതാ.

൫. സുജാതസുത്തവണ്ണനാ

൨൩൯. അഞ്ഞാനി രൂപാനീതി പരേസം രൂപാനി. അതിക്കന്തരൂപോതി അത്തനോ രൂപസമ്പത്തിയാ രൂപസോഭായ അതിക്കമിത്വാ ഠിതരൂപോ, സുചിരമ്പി വേലം ഓലോകേന്തസ്സ തുട്ഠിആവഹോ. ദസ്സനസ്സ ചക്ഖുസ്സ ഹിതോതി ദസ്സനീയോ. പസാദം ആവഹതീതി പാസാദികോ. ഛവിവണ്ണസുന്ദരതായാതി ഛവിവണ്ണസ്സ ചേവ സരീരസണ്ഠാനസ്സ ച സോഭനഭാവേന.

സുജാതസുത്തവണ്ണനാ നിട്ഠിതാ.

൬. ലകുണ്ഡകഭദ്ദിയസുത്തവണ്ണനാ

൨൪൦. വിരൂപസരീരവണ്ണന്തി അസുന്ദരഛവിവണ്ണഞ്ചേവ അസുന്ദരസണ്ഠാനഞ്ച. പമാണവസേനാതി സരീരപ്പമാണവസേന. ഇച്ഛിതിച്ഛിതന്തി അത്തനാ ഇച്ഛിതിച്ഛിതം. മഹാസാരജ്ജന്തി മഹന്തോ മങ്കുഭാവോ.

ഗുണേ ആവജ്ജേത്വാതി അത്തനാ ജാനനകനിയാമേന സത്ഥുനോ കായഗുണേ ച ചാരിത്തഗുണേ ച ആവജ്ജേത്വാ മനസി കത്വാ.

യോജനാവട്ടന്തി യോജനപരിക്ഖേപം.

‘‘കായസ്മീ’’തി ഗാഥാസുഖത്ഥം നിരനുനാസികം കത്വാ നിദ്ദേസോതി വുത്തം ‘‘കായസ്മി’’ന്തി. അകാരണം കായപ്പമാണന്തി സരീരപ്പമാണം നാമ അപ്പമാണം, സീലാദിഗുണാവ പമാണന്തി അധിപ്പായോ.

ലകുണ്ഡകഭദ്ദിയസുത്തവണ്ണനാ നിട്ഠിതാ.

൭. വിസാഖസുത്തവണ്ണനാ

൨൪൧. പുരസ്സ ഏസാതി പോരീ, ചാതുരിയയുത്തതാ. തേനാഹ ‘‘പുരവാസീന’’ന്തിആദി. സാ പന ദുതവിലമ്ബിതഖലിതവസേന അപ്പസന്നലൂഖതാദിദോസരഹിതാ ഹോതീതി ആഹ ‘‘പുര…പേ… വാചായാ’’തി. അസന്ദിദ്ധായാതി മുത്തവാചായ. തേനാഹ ‘‘അപലിബുദ്ധായാ’’തിആദി. ന ഏലം ദോസം ഗലേതീതി അനേലഗലാ, അവിരുജ്ഝനവാചാ. തേനാഹ ‘‘നിദ്ദോസായാ’’തി. ചതുസച്ചസ്സ പകാസകാ, ന കദാചി സച്ചവിമുത്താതി ആഹ ‘‘ചതുസച്ചപരിയാപന്നായാ’’തി. താ ഹി ചത്താരി സച്ചാനി പരിച്ഛിജ്ജ ആപാദേന്തി പടിപാദേന്തി പവത്തേന്തി. തേനാഹ ‘‘ചത്താരി സച്ചാനി അമുഞ്ചിത്വാ പവത്തായാ’’തി. ധജോ നാമ സബ്ബധമ്മേഹി സമുസ്സിതട്ഠേന.

വിസാഖസുത്തവണ്ണനാ നിട്ഠിതാ.

൮. നന്ദസുത്തവണ്ണ്ണനാ

൨൪൨. ആരഞ്ഞികോതിആദീസു അരഞ്ഞകഥാസീസേന സേനാസനപടിസംയുത്താനം ധുതങ്ഗാനം, പിണ്ഡപാതകഥാസീസേന പിണ്ഡപാതപടിസംയുത്താനം, പംസുകൂലികസീസേന ചീവരപടിസംയുത്താനം, തഗ്ഗഹണേനേവ വീരിയനിസ്സിതധുതങ്ഗസ്സ ച സമാദായ വത്തനം ദീപിതന്തി വേദിതബ്ബം. ആഗതേന ഭഗവതാ അപരഭാഗേ കഥിതം.

നന്ദസുത്തവണ്ണനാ നിട്ഠിതാ.

൯. തിസ്സസുത്തവണ്ണനാ

൨൪൩. ഭണ്ഡകന്തി പത്തചീവരം. നിസീദിയേവ വത്തസ്സ അസിക്ഖിതത്താ. തുജ്ജനത്ഥേന വാചാ ഏവ സത്തിയോതി ആഹ ‘‘വാചാസത്തീഹീ’’തി.

വാചായ സന്നിതോദകേനാതി വചനസങ്ഖാതേന സമന്തതോ നിച്ചം കത്വാ ഉപതുദനതോ സന്നിതുദകേന. വിഭത്തിഅലോപേന സോ നിദ്ദേസോ. തേനാഹ ‘‘വചനപതോദേനാ’’തി.

ഉച്ചകുലേ ജാതി ഏതസ്സാതി ജാതിമാ, ബ്രഹ്മജാതികോ ഇസി. മാതങ്ഗോതി ചണ്ഡാലോ. തത്ഥാതി കുമ്ഭകാരസാലായം. ഓകാസം യാചി കുമ്ഭകാരം. മഹന്തം ദിസ്വാ ആഹ – ‘‘പഠമതരം പവിട്ഠോ പബ്ബജിതോ’’തി. തത്ഥേവാതി തസ്സായേവ സാലായ ദ്വാരം നിസ്സായ ദ്വാരസമീപേ. മേതി മയാ. ഖമ മയ്ഹന്തി മയ്ഹം അപരാധം ഖമസ്സു. തേതി തയാ. പുന തേതി തവ. ഗണ്ഹി ഉഗ്ഗന്തും അപ്പദാനവസേന. തേനാഹ ‘‘നാസ്സ ഉഗ്ഗന്തും അദാസീ’’തി. പബുജ്ഝിംസൂതി നിദ്ദായ പബുജ്ഝിംസു പകതിയാ പബുജ്ഝനവേലായ ഉപഗതത്താ.

ഛവോതി നിഹീനോ. അനന്തമായോതി വിവിധമായോ മായാവീ.

സോതി മത്തികാപിണ്ഡോ. ‘‘സത്തധാ ഭിജ്ജീ’’തി ഏത്ഥായമധിപ്പായോ – യം തേന താപസേന പാരമിതാപരിഭാവനസമിദ്ധാഹി നാനാവിഹാരസമാപത്തിപരിപൂരിതാഹി സീലദിട്ഠിസമ്പദാദീഹി സുസങ്ഖതസന്താനേ മഹാകരുണാധിവാസേ മഹാസത്തേ ബോധിസത്തേ അരിയൂപവാദകമ്മം അഭിസപസങ്ഖാതം ഫരുസവചനം പവത്തിതം, തം മഹാസത്തസ്സ ഖേത്തവിസേസഭാവതോ തസ്സ ച അജ്ഝാസയഫരുസതായ ദിട്ഠധമ്മവേദനീയം ഹുത്വാ സചേ സോ മഹാസത്തം ന ഖമാപേതി, തം കക്ഖളം ഹുത്വാ വിപച്ചനസഭാവം ജാതം, ഖമാപിതേ പന മഹാസത്തേ പയോഗസമ്പത്തിപടിബാഹിതത്താ അവിപാകധമ്മതം ആപജ്ജതി അഹോസികമ്മഭാവതോ. അയഞ്ഹി അരിയൂപവാദപാപസ്സ ദിട്ഠധമ്മവേദനീയസ്സ ച ധമ്മതാ. യം തം ബോധിസത്തേന സൂരിയുഗ്ഗമനനിവാരണം കതം, അയം ബോധിസത്തേന ദിട്ഠോ ഉപായോ. തേന ഹി ഉബ്ബാള്ഹാ മനുസ്സാ ബോധിസത്തസ്സ സന്തികേ താപസം ആനേത്വാ ഖമാപേസും. സോപി ച മഹാസത്തസ്സ ഗുണേ ജാനിത്വാ തസ്മിം ചിത്തം പസാദേസി. യം പനസ്സ മത്ഥകേ മത്തികാപിണ്ഡസ്സ ഠപനം തസ്സ സത്തധാ ഫാലനം കതം, തം മനുസ്സാനം ചിത്താനുരക്ഖണത്ഥം. അഞ്ഞഥാ ഹി ഇമേ പബ്ബജിതാ സമാനാ ചിത്തസ്സ വസം വത്തന്തി, ന പന ചിത്തമത്തനോ വസേ വത്താപേന്തീതി മഹാസത്തമ്പി തേന സദിസം കത്വാ ഗണ്ഹേയ്യും, തദസ്സ നേസം ദീഘരത്തം അഹിതായ ദുക്ഖായാതി. പതിരൂപന്തി യുത്തം.

തിസ്സസുത്തവണ്ണനാ നിട്ഠിതാ.

൧൦. ഥേരനാമകസുത്തവണ്ണനാ

൨൪൪. അതീതേ ഖന്ധപഞ്ചകേതി അതീതേ അത്തഭാവേ. ഛന്ദരാഗപ്പഹാനേനാതി ഛന്ദരാഗസ്സ അച്ചന്തമേവ ജഹനേന. പഹീനം നാമ ഹോതി അനപേക്ഖപരിച്ചാഗതോ. പടിനിസ്സട്ഠം നാമ ഹോതി സബ്ബസോ ഛഡ്ഡിതത്താ. തയോ ഭവേതി ഇമിനാ ഉപാദിണ്ണകധമ്മാനംയേവ ഗഹണം. സബ്ബാ ഖന്ധായതനധാതുയോ ചാതി ഇമിനാ ഉപാദിണ്ണാനമ്പി അനുപാദിണ്ണാനമ്പി ദ്വിധാ പവത്തലോകിയധമ്മാനം ഗഹണം അവിസേസേത്വാ വുത്തത്താ. വിദിതം പാകടം കത്വാ ഠിതം പരിഞ്ഞാഭിസമയവസേന. തേസ്വേവാതി തേഭൂമകധമ്മേസു ഏവ. അനുപലിത്തം അമഥിതം അസംകിലിട്ഠം തണ്ഹാദിട്ഠിസംകിലേസാഭാവതോ. തദേവ സബ്ബന്തി ഹേട്ഠാ തീസുപി പദേസു ഇധ സബ്ബഗ്ഗഹണേന ഗഹിതം തേഭൂമകവട്ടം. ജഹിത്വാതി പഹാനാഭിസമയവസേന. തണ്ഹാ ഖീയതി ഏത്ഥാതി തണ്ഹക്ഖയസങ്ഖാതേ നിബ്ബാനേ വിമുത്തം. തമഹന്തി തം ഉത്തമപുഗ്ഗലം ഏകവിഹാരിം ബ്രൂമി തണ്ഹാദുതിയസ്സ അഭാവതോ. ഏത്ഥ ച പരിഞ്ഞാപഹാനാഭിസമയകഥനേന ഇതരമ്പി അഭിസമയം അത്ഥതോ കഥിതമേവാതി ദട്ഠബ്ബം.

ഥേരനാമകസുത്തവണ്ണനാ നിട്ഠിതാ.

൧൧. മഹാകപ്പിനസുത്തവണ്ണനാ

൨൪൫. മഹാകപ്പിനോതി പൂജാവചനമേതം യഥാ ‘‘മഹാമോഗ്ഗല്ലാനോ’’തി. തഥാരൂപന്തി ‘‘ബുദ്ധോ ധമ്മോ’’തിആദികം ഗുണവിസേസവന്തപടിബദ്ധം. സാസനന്തി ദേസന്തരതോ ആഗതവചനം. ജങ്ഘവാണിജാതി ജങ്ഘചാരിനോ വാണിജാ. കിഞ്ചി സാസനന്തി അപുബ്ബപവത്തിദീപകം കിഞ്ചി വചനന്തി പുച്ഛി. പീതി ഉപ്പജ്ജി യഥാ തം സുചിരം കതാഭിനീഹാരതായ പരിപക്കഞാണസ്സ. അപരിമാണം ഗുണസ്സ അപരിമാണതോ സബ്ബഞ്ഞുഗുണപരിദീപനതോ, സേസരതനദ്വയേ നിയ്യാനികഭാവദീപനതോ ദിട്ഠിസീലസാമഞ്ഞേന സംഹതഭാവദീപനതോതി വത്തബ്ബം. യഥാനുസിട്ഠം പടിപജ്ജമാനേ അപായദുക്ഖതോ സംസാരദുക്ഖതോ ച അപതന്തേ ധാരേതീതി ധമ്മോ. സുപരിസുദ്ധദിട്ഠിസീലസാമഞ്ഞേന സംഹതോതി സങ്ഘോതി. രതനത്ഥോ പന തിണ്ണമ്പി സദിസോ ഏവാതി.

നവസതസഹസ്സാനി അദാസി ദേവീ. തുമ്ഹേതി രാജിനിം ഗാരവേന ബഹുവചനേന വദതി. രാഗോതി അനുഗച്ഛന്തരാഗോ.

ജനിതേതി കമ്മകിലേസേഹി നിബ്ബത്തിതേ. കമ്മകിലേസേഹി പജാതത്താ പജാതി പജാസദ്ദോ ജനിതസദ്ദേന സമാനത്ഥോതി ആഹ – ‘‘ജനിതേ, പജായാതി അത്ഥോ’’തി. അട്ഠഹി വിജ്ജാഹീതി അമ്ബട്ഠസുത്തേ (ദീ. നി. ൧.൨൭൮) ആഗതനയേന. തത്ഥ ഹി വിപസ്സനാഞാണമനോമയിദ്ധീഹി സഹ ഛ അഭിഞ്ഞാ ‘‘അട്ഠ വിജ്ജാ’’തി ആഗതാ. തപതി പടിപക്ഖവിധമനേന വിജ്ജോതതി, തം സൂരിയസ്സ വിരോചനന്തി ആഹ – ‘‘തപതീതി വിരോചതീ’’തി. ഝാനം സമാപജ്ജിത്വാ സമാഹിതേന ചിത്തേന വിപസ്സനം വഡ്ഢേത്വാ ഫലസമാപത്തിം സമാപജ്ജിത്വാ നിസിന്നോതി ആഹ – ‘‘ദുവിധേന ഝാനേന ഝായമാനോ’’തി. സബ്ബമങ്ഗലഗാഥാതി സബ്ബമങ്ഗലാവിരോധീ ഗാഥാതി വദന്തി. തഥാ ഹി വദന്തി –

‘‘മങ്ഗലം ഭഗവാ ബുദ്ധോ, ധമ്മോ സങ്ഘോ ച മങ്ഗലം;

സബ്ബേസമ്പി ച സത്താനം, സ പുഞ്ഞവിതമങ്ഗല’’ന്തി.

പൂജം കാരേത്വാ ഏകം അഗാരികധമ്മകഥികം ഉപാസകം ആഹ. ഏത്ഥ ച ‘‘ഝായീ തപതീ’’തി ഇമിനാ ആരമ്മണൂപനിജ്ഝാനാനം ഗഹിതത്താ ധമ്മരതനം ഗഹിതമേവ. ‘‘ബ്രാഹ്മണോ’’തി ഇമിനാ സങ്ഘരതനം ഗഹിതമേവ. ബുദ്ധരതനം പന സരൂപേനേവ ഗഹിതന്തി.

മഹാകപ്പിനസുത്തവണ്ണനാ നിട്ഠിതാ.

൧൨. സഹായകസുത്തവണ്ണനാ

൨൪൬. സമ്മാ സംസന്ദനവസേന ഏതി പവത്തതീതി സമേതി, സമ്മാദിട്ഠിആദി. സമ്മാ ചിരരത്തം ചിരകാലം സമേതി ഏതേസം അത്ഥീതി ചിരരത്തംസമേതികാ. തേനാഹ ‘‘ദീഘരത്ത’’ന്തിആദി. ഇദാനി ഇമേസന്തി ഏതരഹി ഏതേസം. അയം സാസനധമ്മോ അജ്ഝാസയതോ പയോഗതോ ച സമ്മാ സംസന്ദതി സമേതി, തസ്മാ മജ്ഝേ ഭിന്നം വിയ സമമേവ ന വിസദിസം. കിഞ്ച തതോ ഏവ ബുദ്ധേന ഭഗവതാ പവേദിതധമ്മവിനയേ ഏതേസം പടിപത്തിസാസനധമ്മോ സോഭതി വിരോചതീതി അത്ഥോ. അരിയപ്പവേദിതേതി അരിയേന സമ്മാസമ്ബുദ്ധേന സമ്മദേവ പകാസിതേ അരിയധമ്മേ. സമ്മദേവ സമുച്ഛേദപടിപ്പസ്സദ്ധിവിനയാനം വസേന സുട്ഠു വിനീതാ സബ്ബകിലേസദരഥപരിളാഹാനം വൂപസമേന.

സഹായകസുത്തവണ്ണനാ നിട്ഠിതാ.

സാരത്ഥപ്പകാസിനിയാ സംയുത്തനികായ-അട്ഠകഥായ

ഭിക്ഖുസംയുത്തവണ്ണനായ ലീനത്ഥപ്പകാസനാ സമത്താ.

നിട്ഠിതാ ച സാരത്ഥപ്പകാസിനിയാ

സംയുത്തനികായ-അട്ഠകഥായ നിദാനവഗ്ഗവണ്ണനാ.