൧൦. മോഗ്ഗല്ലാനസുത്തവണ്ണനാ

൨൧൮. പച്ചവേക്ഖതീതി തേസം അരിയാനം ചിത്തം അത്തനോ ഞാണചക്ഖുനാ പതി അവേക്ഖതി പച്ചവേക്ഖതി. പബ്ബതസ്സാതി ഇസിഗിലിപബ്ബതസ്സ. ദുക്ഖപാരം ഗതന്തി വട്ടദുക്ഖസ്സ പാരം പരിയന്തം ഗതം. സബ്ബഗുണസമ്പന്നന്തി സബ്ബേഹി ബുദ്ധഗുണേഹി ച സാവകഗുണേഹി ച പരിപുണ്ണം. അനേകാകാരസമ്പന്നന്തി രൂപഘോസലൂഖധമ്മപ്പമാണികാനം സത്താനം തേഹി തേഹി ആകാരേഹി സബ്ബേസഞ്ച അനേകേഹി അനന്താപരിമേയ്യേഹി പസീദിതബ്ബാകാരേഹി സമന്നാഗതം. തേ പന ആകാരാ യസ്മാ അനഞ്ഞസാധാരണാ ബുദ്ധഗുണാ ഏവ, തസ്മാ ആഹ ‘‘അനേകേഹി ഗുണേഹി സമന്നാഗത’’ന്തി.

മോഗ്ഗല്ലാനസുത്തവണ്ണനാ നിട്ഠിതാ.