൬. ബ്രഹ്മലോകസുത്തവണ്ണനാ

൧൭൭. പച്ചേകം ദ്വാരബാഹന്തി പച്ചേകം ദ്വാരബാഹം. പച്ചേക-സദ്ദോ ചേത്ഥ ആവുത്തിവസേന വേദിതബ്ബോ; ‘‘പച്ചേകം പച്ചേക’’ന്തി ആഹ ‘‘ഏകേകോ ഏകേക’’ന്തി. തേസു ഹി ഏകോ പച്ചേകബ്രഹ്മാ ഗന്ധകുടിയാ ഏകദ്വാരബാഹം നിസ്സായ ഠിതോ, അപരോ അഞ്ഞം. പച്ചേകബ്രഹ്മാതി ച ഏകചാരീ ബ്രഹ്മാ, ന പരിസചാരീ ബ്രഹ്മാതി അത്ഥോ. സമിദ്ധി നാമ സഗ്ഗേ സുഖുപകരണേഹി, ബ്രഹ്മാനഞ്ച ഝാനം സുഖുപകരണന്തി ഝാനസുഖേന സമിദ്ധോതി. സമ്പത്തിയാ വേപുല്ലപ്പത്തതാ ബ്രഹ്മാനഞ്ച അഭിഞ്ഞാഗുണേഹി വേപുല്ലപ്പത്തീതി ആഹ ‘‘ഫീതോതി അഭിഞ്ഞാപുപ്ഫേഹി സുപുപ്ഫിതോ’’തി. അസഹന്തോതി നസഹന്തോ നരോചേന്തോ.

സതപദന്തി സതസദ്ദോ. രൂപവസേനാതി രൂപസദ്ദവസേന, രൂപസദ്ദേന സദ്ധിന്തി അത്ഥോ. തഥാ പന്തിവസേനാതി ഏത്ഥാപി. ഏകച്ചേതി ഏകേ മിഗാരീ, തേസം ബ്യഗ്ഘീനിസാരൂപകാനം പഞ്ചസതാനീതി അത്ഥോ. ‘‘കസ്സ അഞ്ഞസ്സ ഉപട്ഠാനം ഗമിസ്സാമീ’’തി വിമാനസമ്പത്തിയം വിമ്ഹയക്ഖികോ അഹങ്കാരവസേന വദതി. രണന്തി നിന്ദന്തി ഏതേഹീതി രണാ, ദോസാ. വിരോധിപച്ചയസന്നിപാതേ വികാരുപ്പത്തി രുപ്പനം രൂപസ്സ പവേധനന്തി ആഹ ‘‘സീതാദീഹി ച നിച്ചം പവേധിത’’ന്തി. സുമേധോ സുന്ദരപഞ്ഞോ സോ സത്ഥാ രൂപേ ന രമതി, കിം പന മന്ദപഞ്ഞോ രൂപേ സരണഞ്ച പവേധിതഞ്ച അപസ്സന്തോ രമസീതി അധിപ്പായോ.

ബ്രഹ്മലോകസുത്തവണ്ണനാ നിട്ഠിതാ.