൮. ഛേത്വാവഗ്ഗോ

൧. ഛേത്വാസുത്തവണ്ണനാ

൭൧. വധിത്വാതി ഹന്ത്വാ വിനാസേത്വാ. അപരിദയ്ഹമാനത്താതി അപീളിയമാനത്താ. വിനട്ഠദോമനസ്സത്താ ന സോചതി ചേതോദുക്ഖദുക്ഖാഭാവതോ. വിസം നാമ ദുക്ഖം അനിട്ഠഭാവതോ, തസ്സ മൂലകാരണം കോധോ അനിട്ഠഫലത്താതി ആഹ ‘‘വിസമൂലസ്സാതി ദുക്ഖവിപാകസ്സാ’’തി. അക്കുട്ഠസ്സാതി അക്കോസാപരാധസ്സ. അക്കോസപഹാരത്ഥസമ്ബന്ധേന ഹി ‘‘കുദ്ധസ്സാ’’തി ഉപയോഗത്ഥേ സമ്പദാനവചനം. സുഖം ഉപ്പജ്ജതി കോധം നസ്സതി. സുഖുപ്പത്തിം സന്ധായ ഏസ കോധോ ‘‘മധുരഗ്ഗോ’’തി വുത്തോ, സുഖാവസാനോതി അത്ഥോ.

ഛേത്വാസുത്തവണ്ണനാ നിട്ഠിതാ.

൨. രഥസുത്തവണ്ണനാ

൭൨. പഞ്ഞാണന്തി ലക്ഖണം സല്ലക്ഖണൂപായോ. ദിസ്വാതി ദസ്സനഹേതു. ‘‘ചോളരഞ്ഞോ രട്ഠം ചോളരട്ഠ’’ന്തി ഏവം രട്ഠം രഞ്ഞാ പഞ്ഞായതി.

രഥസുത്തവണ്ണനാ നിട്ഠിതാ.

൩. വിത്തസുത്തവണ്ണനാ

൭൩. സദ്ധായാതി സദ്ധാഹേതു. കുലസമ്പദാതി ഖത്തിയാദിസമ്പത്തിയോ. സബ്ബലോകിയലോകുത്തരവിത്തപടിലാഭഹേതുതോ സദ്ധാവിത്തമേവ. ഹേട്ഠാ തിണ്ണം ദ്വാരാനം വസേന ഉപ്പന്നകസ്സ സബ്ബസ്സപി അനവജ്ജധമ്മസ്സ സങ്ഗണ്ഹനതോ ‘‘ധമ്മോതി ദസകുസലകമ്മപഥോ’’തി വുത്തം. അസംകിലിട്ഠസുഖന്തി. നിരാമിസം സുഖം. തമേവ സാമിസം ഉപനിധായ സമ്ഭാവേന്തോ ആഹ ‘‘അസംകിലിട്ഠ’’ന്തി. അസേചനകഭാവേന അഭിരുചിജനനതോ പിയാകിച്ഛകരണതോ ബഹും സുചിരമ്പി കാലം ആസേവന്തസ്സ അദോസാവഹതോ സച്ചമേവ മധുരതരം. ന ഹി തം പിവിതബ്ബതോ സാദിതബ്ബതോ അനുഭവിതബ്ബതോ രസോതി വത്തബ്ബതം അരഹതി. ഇദാനി തസ്സ കിച്ചസമ്പത്തിഅത്ഥേഹിപി മഹാരഹതം ദസ്സേതും ‘‘സച്ചസ്മിം ഹീ’’തിആദി വുത്തം. തത്ഥ നദീനിവത്തനം മഹാകപ്പിനവത്ഥുആദീഹി (ധ. പ. അട്ഠ. ൧.മഹാകപ്പിനത്ഥേരവത്ഥു; അ. നി. അട്ഠ. ൧.൧.൨൩൧; ഥേരഗാ. അട്ഠ. ൨.മഹാകപ്പിനത്ഥേരഗാഥാവണ്ണനാ) ദീപേതബ്ബം, ഇതരാനി കണ്ഹദീപായനജാതക- (ജാ. ൧.൧൦.൬൨ ആദയോ) സുതസോമ- (ജാ. ൨.൨൧.൩൭൧ ആദയോ) മച്ഛജാതകേഹി (ജാ. ൧.൧.൩൪, ൭൫; ൧.൨.൧൩൧ ആദയോ) ദീപേതബ്ബാനി. നിമ്മദ്ദേന്തി അഭിഭവന്തി. മധുരതരന്തി സുന്ദരതരം സേട്ഠേസൂതി അത്ഥോ. പഞ്ഞാജീവീതി പഞ്ഞായ ജീവനസീലോതി പഞ്ഞാജീവീ, പഞ്ഞാപുബ്ബങ്ഗമചരിയോതി അത്ഥോ. പഞ്ഞാജീവീതി ച പഞ്ഞാവസേന ഇരിയതി വത്തതി ജീവിതം പവത്തേതീതി അത്ഥോതി ദസ്സേന്തോ ‘‘യോ പഞ്ഞാജീവീ’’തിആദിമാഹ. ‘‘ജീവത’’ന്തി കേചി പഠന്തി, ജീവന്താനം പഞ്ഞാജീവിം സേട്ഠമാഹൂതി അത്ഥോ.

വിത്തസുത്തവണ്ണനാ നിട്ഠിതാ.

൪. വുട്ഠിസുത്തവണ്ണനാ

൭൪. ഉപ്പതന്താനന്തി പഥവിം ഭിന്ദിത്വാ ഉട്ഠഹന്താനം. ‘‘സേട്ഠ’’ന്തി വുച്ചമാനത്താ ‘‘സത്തവിധ’’ന്തി വുത്തം, ഇതരേസം വാ തദനുലോമതോ. ഖേമോ ഹോതി ദുബ്ഭിക്ഖുപദ്ദവാഭാവതോ. തേനാഹ ‘‘സുഭിക്ഖോ’’തി. നിപതന്താനന്തി അധോമുഖം പവത്തന്താനം. പവജമാനാനന്തി വജനസീലാനം. തേ പന യസ്മാ ജങ്ഗമാ നാമ ഹോന്തി, ന രുക്ഖാദയോ വിയ ഥാവരാ, തസ്മാ ആഹ ‘‘ജങ്ഗമാന’’ന്തി. ഗാവോതി ധേനുയോ. തേന മഹിംസാദികാനമ്പി സങ്ഗഹോ ദട്ഠബ്ബോ. വദന്താനന്തി ഉപ്പന്നം അത്ഥം വദന്താനം.

അത്തനോ ഖന്തിയാതി അത്തനോ ഖന്തിയാ രുചിയാ ഗഹിതഭാവേന. ഇതരാ ദേവതാ തസ്സാ വിസ്സജ്ജനേ അപരിതുസ്സമാനാ ആഹ. യാവ പധംസീതി ഗുണധംസീ സത്ഥുദേസനായ ലദ്ധബ്ബഗുണനാസനതോ. പഗബ്ബാതി പാഗബ്ബിയേന സമന്നാഗതാ, യഥാ വചീപാഗബ്ബിയേന അഖരാ, തഥാ വാചായ ഭവിതബ്ബം. മുഖരാതി മുഖഖരാ. ദസബലം പുച്ഛി സണ്ഹം സുഖുമം രതനത്തയസംഹിതം അത്ഥം സോതുകാമാ. അസ്സാ ദേവതായ വിസ്സജ്ജേന്തോ അജ്ഝാസയാനുരൂപം. ഉപ്പതമാനാതി ഉപ്പതന്തീ സമുഗ്ഘാടേതി ഓധിസോ. വട്ടമൂലകമഹാഅവിജ്ജാതി തസ്സാ ആദീനവദസ്സനത്ഥം ഭൂതകഥനവിസേസനം. ഓസീദന്താനന്തി പടിപക്ഖവസേന അധോ സീദന്താനം, ഉസ്സാദയമാനാനന്തി അത്ഥോ. പുഞ്ഞക്ഖേത്തഭൂതോതി ഇദം ‘‘പദസാ ചരമാനാന’’ന്തി പദസ്സ അത്ഥവിവരണവസേന ഭൂതകഥനവിസേസനം. യാദിസോ പുത്തോ വാ ഹോതൂതി ഇദം പുരിമപദേ ദേവതായ പുത്തഗഹണസ്സ കതത്താ വുത്തം.

വുട്ഠിസുത്തവണ്ണനാ നിട്ഠിതാ.

൫. ഭീതാസുത്തവണ്ണനാ

൭൫. കിം സൂധ ഭീതാതി ഏത്ഥ സു-ഇധാതി നിപാതമത്തന്തി ആഹ ‘‘കിം ഭീതാ’’തി? മഗ്ഗോ ച നേകായതനപ്പവുത്തോതി അനേകകാരണം നാനാവിധാധിഗമോകാസം കത്വാ പവുത്തോ കഥിതോ. തേനാഹ ‘‘അട്ഠതിംസാരമ്മണവസേനാ’’തിആദി. ഏവം സന്തേതി ഏവം സബ്ബസാധാരണാനേകായതനേഹി നിബ്ബാനഗാമിമഗ്ഗസ്സ തുമ്ഹേഹി പവേദിതത്താ ലബ്ഭമാനേ ഖേമേ മഗ്ഗേ കിം ഭീതായം ജനതാ ഉപ്പഥഭൂതാ വിപരീതദിട്ഠിതോ ഗണ്ഹീതി അത്ഥോ? ഏവം ദേവതാ യഥിച്ഛായ പുരിമദ്ധേന അത്തനാ യഥാചിന്തിതമത്ഥം സത്ഥു പവേദിതാ, പച്ഛിമദ്ധേന അത്തനോ സംസയം പുച്ഛതി. ബഹുപഞ്ഞാതി പുഥുപഞ്ഞ. ഉസ്സന്നപഞ്ഞാതി അധികപഞ്ഞാ. ഠപേത്വാതി സംയമേത്വാ. സംവിഭാഗീതി ആഹാരപരിഭോഗേ സമ്മദേവ വിഭജനസീലോ. തേനാഹ ‘‘അച്ഛരായാ’’തിആദി. വുത്തത്ഥമേവ ഹേട്ഠാ.

മനേനാതി മനോഗഹണേന. പുബ്ബസുദ്ധിഅങ്ഗന്തി പുബ്ബഭാഗസുദ്ധിഭൂതം അങ്ഗം. ചതൂസൂതി വുത്തഅങ്ഗപരിയാപന്നം. യഞ്ഞഉപക്ഖരോതി ദാനസ്സ സാധനം. ഏതേസു ധമ്മേസൂതി ഏതേസു സദ്ധാദിഗുണേസു. യഥാ ഹി സദ്ധോ പച്ചയം പച്ചുപട്ഠപേത്വാ വത്ഥുപരിച്ചാഗസ്സ വിസേസപച്ചയോ കമ്മഫലസ്സ പരലോകസ്സ ച പച്ചക്ഖതോ വിയ പത്തിയായനതോ, ഏവം മുദുഹദയോ. മുദുഹദയോ ഹി അനുദയം പത്വാ യം കിഞ്ചി അത്തനോ സന്തകം പരേസം ദേതി. യോ ച സംവിഭാഗസീലോ, സോ അപ്പകസ്മിമ്പി അത്തനോ സന്തകേ പരേഹി സാധാരണഭോഗീ ഹോതി. വദഞ്ഞൂ വദാനിയതായ യാഗിനോവ യുത്തം യുത്തകാലം ഞത്വാ അത്ഥികാനം മനോരഥം പൂരേതീതി വുത്തം ‘‘ഇതി…പേ… ചതൂസൂതി ആഹാ’’തി.

വാചന്തിആദീനി തീണി അങ്ഗാനി തിവിധസീലസമ്പത്തിദീപനതോ. സമ്പന്നസീലോ ഹി പരലോകം ന ഭാസേയ്യ. സദ്ധോ ഏകം അങ്ഗം പയോഗാസയസുദ്ധിദീപനതോ. സുദ്ധാസയസ്സ സമ്മാപയോഗേ ഠിതസ്സ കഥം പരലോകതോ ഭയന്തി. ദുകവസേന ചതുരങ്ഗയോജനാ ദുകനയോ. ഏതേസു ചതൂസു ധമ്മേസു ഠിതോതി ഏതേസു യഥാവുത്തദുകസങ്ഗഹേസു ചതൂസു ഗുണേസു പതിട്ഠിതോ.

ഭീതാസുത്തവണ്ണനാ നിട്ഠിതാ.

൬. നജീരതിസുത്തവണ്ണനാ

൭൬. നാമഗോത്തന്തി തിസ്സോ കസ്സപോ ഗോതമോതി ഏവരൂപം നാമഞ്ച ഗോത്തഞ്ച. നിദസ്സനമത്തമേതം, തസ്മാ സബ്ബസ്സ പഞ്ഞത്തിയാ ലക്ഖണവചനന്തി ദട്ഠബ്ബം. ന ജീരതീതി അസഭാവധമ്മത്താ ഉപ്പാദവയാഭാവതോ ജരം ന പാപുണാതി. തേനാഹ ‘‘ജീരണസഭാവോ ന ഹോതീ’’തി. യസ്മാ സമഞ്ഞാഭാവതോ കാലന്തരേപി തം സമഞ്ഞായതേവ, തസ്മാ ‘‘അതീതബുദ്ധാനം…പേ… ന ജീരതീതി വുച്ചതീ’’തി ആഹ.

ആലസിയന്തി അലസഭാവോ ദള്ഹകോസജ്ജം. തേനാഹ ‘‘യേനാ’’തിആദി. ഠിതിന്തി ബ്യാപാരം. നിദ്ദാവസേന പമജ്ജനം കത്തബ്ബസ്സ അകരണം. കിലേസവസേന പമജ്ജനം അകത്തബ്ബസ്സ കരണമ്പി. കമ്മസമയേതി കമ്മം കാതും യുത്തകാലേ. കമ്മകരണവീരിയാഭാവോതി തംകമ്മകിരിയസമുട്ഠാപകവീരിയാഭാവോ. സോ പന അത്ഥതോ വീരിയപടിപക്ഖോ അകുസലചിത്തുപ്പാദോ, ന വീരിയസ്സ അഭാവമത്തം. സീലസഞ്ഞമാഭാവോ ദുസ്സീല്യം. വിസ്സട്ഠാചാരതാ നാമ അനാചാരോ. സോപ്പബഹുലതാതി നിദ്ദാലുതാ. യതോ ഗഹണഹത്ഥോപി ന കിലാസുപി പുരിസോ നിദ്ദായ അഭിഭുയ്യതി. തേനാഹ ‘‘തായാ’’തിആദി. അതിച്ഛാതാദീനീതി ആദി-സദ്ദേന അഭിഭുയ്യതാദിം സങ്ഗണ്ഹാതി. ആഗന്തുകാലസിയം ന പുബ്ബേ വുത്തആലസ്യം വിയ പകതിസിദ്ധം. ‘‘തേ ഛിദ്ദേ’’തി പാളിയം ലിങ്ഗവിപല്ലാസേന വുത്തന്തി ആഹ ‘‘താനി ഛ ഛിദ്ദാനീ’’തി. കുസലചിത്തപ്പവത്തിയാ അനോകാസഭാവതോ ഛിദ്ദാനി. തേനാഹ ഭഗവാ – ‘‘യത്ഥ വിത്തം ന തിട്ഠതീ’’തി. സബ്ബാകാരേന ലേസമത്തം അസേസേത്വാതി അധിപ്പായോ.

നജീരതിസുത്തവണ്ണനാ നിട്ഠിതാ.

൭. ഇസ്സരിയസുത്തവണ്ണനാ

൭൭. സത്ഥസ്സ മലന്തി സത്ഥമലം, യേന സത്ഥം മലീനം ഹോതി, സത്ഥമലഗ്ഗഹണേന ചേത്ഥ മലീനം സത്ഥമേവ ഗഹിതന്തി ആഹ ‘‘മലഗ്ഗഹിതസത്ഥ’’ന്തി. ആണാപവത്തനന്തി അപ്പകേ വാ മഹന്തേ വാ യത്ഥ കത്ഥചി അത്തനോ ആണായ പവത്തനവസേന വസനം ഇസ്സരിയത്തമിച്ഛന്തി. മണിരതനമ്പി വിസ്സജ്ജനീയപക്ഖികത്താ ഉത്തമം ഭണ്ഡം നാമ ന ഹോതി, ഇത്ഥീ പന പരിച്ചത്തകുലാചാരിത്ഥികായപി അനിസ്സജ്ജനീയതായ ഉത്തമഭണ്ഡം നാമ. തേനാഹ ‘‘ഇത്ഥീ ഭണ്ഡാനമുത്തമ’’ന്തി. തേസം തേസഞ്ഹി പുരിസാജാനീയാനം ഉപ്പത്തിട്ഠാനതായ ഉത്തമരതനാകരത്താ ഇത്ഥീ ഭണ്ഡാനമുത്തമം. മലഗ്ഗഹിതസത്ഥസദിസോ അവബോധകിച്ചവിബന്ധനതോ. സത്ഥമലം വിയ സത്ഥസ്സ പഞ്ഞാസത്ഥസ്സ ഗുണാഭാവകരണതോ പഞ്ഞാസത്ഥമലം. അബ്ബു വുച്ചതി ഉപദ്ദവം, തം ദേതീതി അബ്ബുദം, വിനാസകാരണം. നനു ഹരണം സമണസ്സ അയുത്തന്തി? യുത്തം. തസ്സ അന്വയതോ ബ്യതിരേകതോ ച യുത്തതം ദസ്സേന്തോ ‘‘സലാകഭത്താദീനീ’’തിആദിമാഹ.

ഇസ്സരിയസുത്തവണ്ണനാ നിട്ഠിതാ.

൮. കാമസുത്തവണ്ണനാ

൭൮. ‘‘അത്തകാമോ’’തി പാളിയം വുത്തത്താ ആഹ ‘‘ഠപേത്വാ സബ്ബബോധിസത്തേ’’തി. തേ ഹി സബ്ബസോ പരത്ഥായ ഏവ പടിപജ്ജമാനാ മഹാകാരുണികാ പരത്ഥകാമാ, അത്ഥകാമാ നാമ ന ഹോന്തി, യാ ച തേസം അത്തത്ഥാവഹാ പടിപത്തി, സാപി യാവദേവ പരത്ഥാ ഏവാതി. വുത്തം പോരാണട്ഠകഥായം. യസ്മാ ബോധിസത്താ പരഹിതപടിപത്തിയാ പാരമിയോ പൂരേന്താ തഥാരൂപം കാരണം പത്വാ അത്താനം പരേസം പരിച്ചജന്തി പഞ്ഞാപാരമിയാ പരിപൂരണതോ, തസ്മാ ഇധാപി ‘‘സബ്ബബോധിസത്തേ ഠപേത്വായേവാതി വുത്ത’’ന്തി ആഹ. കല്യാണന്തി ഭദ്ദകം. വാചായ അധിപ്പേതത്താ ആഹ ‘‘സണ്ഹം മുദുക’’ന്തി. പാപികന്തി ലാമകം നിഹീനം. തം പന ഫരുസം വാചന്തി സരൂപതോ ദസ്സേതി.

കാമസുത്തവണ്ണനാ നിട്ഠിതാ.

൯. പാഥേയ്യസുത്തവണ്ണനാ

൭൯. സദ്ധാ ബന്ധതി പാഥേയ്യന്തി സദ്ധാ നാമ സത്തസ്സ മരണവസേന മഹാപഥം സംവജതോ മഹാകന്താരം പടിപജ്ജതോ മഹാവിദുഗ്ഗം പക്ഖന്ദതോ പാഥേയ്യപുടം ബന്ധതി സമ്ബലം സജ്ജേതി. കഥന്തി ആഹ ‘‘സദ്ധം ഉപ്പാദേത്വാ’’തിആദി. ഏതം വുത്തന്തി ‘‘സദ്ധാ ബന്ധതി പാഥേയ്യ’’ന്തി ഏതം ഗാഥാപദം വുത്തം ഭഗവതാ. സിരീതി കതപുഞ്ഞേഹി സേവീയതി തേഹി പടിലഭീയതീതി സിരീ. ഇസ്സരിയം വിഭവോ. ആസയിതബ്ബതോ ആസയോ, വസനട്ഠാനം നികേതന്തി അത്ഥോ. പരികഡ്ഢതീതി ഇച്ഛാവസികം പുഗ്ഗലം തത്ഥ തത്ഥ ഉപകഡ്ഢതി.

പാഥേയ്യസുത്തവണ്ണനാ നിട്ഠിതാ.

൧൦. പജ്ജോതസുത്തവണ്ണനാ

൮൦. തം തം സമവിസമം പജ്ജോതതീതി പജ്ജോതോ. പദീപോ അന്ധകാരം വിധമിത്വാ പച്ചക്ഖതോ രൂപഗതം ദസ്സേതി, ഏവം പഞ്ഞാപജ്ജോതോ അവിജ്ജന്ധകാരം വിധമിത്വാ ധമ്മാനം പരമത്ഥഭൂതം രൂപം ദസ്സേതി. ജാഗരബ്രാഹ്മണോ വിയാതി ജാഗരഖീണാസവബ്രാഹ്മണോ വിയ. സോ ഹി സതിപഞ്ഞാവേപുല്ലപ്പത്തിയാ സബ്ബദാപി ജാഗരോ ഹോതി. ഗാവോതി ഗോജാതിയോ. ഇദം ഗുന്നം ഗോണാനഞ്ച സാമഞ്ഞതോ ഗഹണം. കമ്മേതി കരണത്ഥേ ഭുമ്മവചനം. ജീവനം ജീവോ, സഹ ജീവേനാതി സജീവിനോ. തേനാഹ ‘‘കമ്മേന സഹ ജീവന്താന’’ന്തി, കസിവാണിജ്ജാദികമ്മം കത്വാ ജീവന്താനന്തി അത്ഥോ. ഗോമണ്ഡലേഹി സദ്ധിന്തി ഗോഗണേന സഹ. ന തേന വിനാ കസികമ്മാദീനി ഉപ്പജ്ജന്തി, ഗോരസസിദ്ധിയാ ചേവ കസനഭാരവഹനസിദ്ധിയാ ച കസികമ്മഏകച്ചവാണിജ്ജകമ്മാദീനി ഇജ്ഝന്തി. സത്തകായസ്സാതി ആഹാരുപജീവിനോ സത്തകായസ്സ കസിതോ അഞ്ഞഥാ ജീവികം കപ്പേന്തസ്സപി കസിജീവിതവുത്തിയാ മൂലകാരണം ഫലനിപ്ഫത്തിനിമിത്തത്താ തസ്സ. ഇരിയാപഥോ ച ഇരിയനകിരിയാനം പവത്തനുപായോ. ‘‘സീതന്തി നങ്ഗലസീതകമ്മ’’ന്തി വദന്തി.

പജ്ജോതസുത്തവണ്ണനാ നിട്ഠിതാ.

൧൧. അരണസുത്തവണ്ണനാ

൮൧. രണന്തി കന്ദന്തി ഏതേഹീതി രണാ, രാഗാദയോ. തേഹി അഭിഭൂതതായ ഹി സത്താ നാനപ്പകാരം കന്ദന്തി പരിദേവന്തി. തേ പന സബ്ബസോ നത്ഥി ഏതേസം രണാതി അരണാ. നിക്കിലേസാ ഖീണാസവാ. വുസിതവാസോതി വുസിതബ്രഹ്മചരിയവാസോ. ഭോജിസ്സിയന്തി ഭുജിസ്സഭാവോ. തേനാഹ ‘‘അദാസഭാവോ’’തി. സമണാതി സമിതപാപസമണാതി ആഹ ‘‘ഖീണാസവസമണാ’’തി. പുഥുജ്ജനകല്യാണകാലേ ലോകിയപരിഞ്ഞായ, സേക്ഖാ പുബ്ബഭാഗേ ലോകിയപരിഞ്ഞായ, പച്ചവേക്ഖണേ ലോകിയലോകുത്തരായ പരിഞ്ഞായ പരിഞ്ഞേയ്യം തേഭൂമകം ഖന്ധപഞ്ചകം പരിജാനന്തി പരിച്ഛിജ്ജന്തി. ഖീണാസവാ പന പരിഞ്ഞാതപരിഞ്ഞേയ്യാ ഹോന്തി. തഥാ ഹി തേ സാമീ ഹുത്വാ പരിഭുഞ്ജന്തി. വന്ദന്തി നം പതിട്ഠിതന്തി വുത്തം, വന്ദനീയഭാവോ ച സീലസമ്പന്നതായാതി ആഹ ‘‘പതിട്ഠിതന്തി സീലേ പതിട്ഠിത’’ന്തി. ഇധാതി ഇമസ്മിം ലോകേ. ഖത്തിയാതി ലക്ഖണവചനന്തി ആഹ ‘‘ന കേവലം ഖത്തിയാവാ’’തിആദി.

അരണസുത്തവണ്ണനാ നിട്ഠിതാ.

ഛേത്വാവഗ്ഗവണ്ണനാ നിട്ഠിതാ.

സാരത്ഥപ്പകാസിനിയാ സംയുത്തനികായ-അട്ഠകഥായ

ദേവതാസംയുത്തവണ്ണനായ ലീനത്ഥപ്പകാസനാ സമത്താ.