൧൦. അരഞ്ഞസുത്തവണ്ണനാ

൧൦. സന്തകിലേസാനന്തി വൂപസന്തകിലേസപരിളാഹാനം. യസ്മാ സീലാദിഗുണസമ്ഭവം തതോ ഏവ ഭയസന്തഞ്ച ഉപാദായ പണ്ഡിതാ ‘‘സന്തോ’’തി വുച്ചന്തി, തസ്മാ വുത്തം ‘‘പണ്ഡിതാനം വാ’’തി. തേനാഹ ‘‘സന്തോ ഹവേ’’തിആദി. സേട്ഠചാരീനന്തി സേട്ഠചരിയം ചരന്താനം. യസ്മാ പുഥുജ്ജനകല്യാണതോ പട്ഠായ ഭിക്ഖു മഗ്ഗബ്രഹ്മചരിയവാസം വസതി നാമ, തസ്മാ ആഹ ‘‘മഗ്ഗബ്രഹ്മചരിയവാസം വസന്താന’’ന്തി. അരിയാനം പന മുഖവണ്ണസ്സ പസീദനേ വത്തബ്ബമേവ നത്ഥി. മൂലകമ്മട്ഠാനന്തി പാരിഹാരിയകമ്മട്ഠാനം. വിസഭാഗസന്തതീതി നാനാരമ്മണേസു പവത്തചിത്തസന്തതി. സാ ഹി വിക്ഖേപബ്യാകുലതായ അപ്പസന്നാ സമാഹിതചിത്തസന്തതിയാ വിസഭാഗസന്തതി. ഓക്കമതീതി സമാധിസഭാഗാ ചിത്തസന്തതി സമഥവീഥിം അനുപവിസതി. ചിത്തം പസീദതീതി കമ്മട്ഠാനനിരതം ഭാവനാചിത്തം സന്ധായാഹ, തം പസന്നം ഹുത്വാ പവത്തതി. ലോഹിതം പസീദതീതി ചിത്തകാലുസ്സിയസ്സാഭാവതോ ലോഹിതം അനാവിലം ഹോതി. പരിസുദ്ധാനി ഹോന്തി കാരണസ്സ പരിസുദ്ധഭാവതോ. താലഫലമുഖസ്സ വിയ മുഖസ്സ വണ്ണോ ഹോതീതി മുഖ-സദ്ദസ്സ ആദിമ്ഹി പമുത്തപദേന യോജേതബ്ബോ. ഏവഞ്ഹി ചസ്സ പമുത്തഗ്ഗഹണം സമത്ഥിതം ഹോതി താലഫലമുഖസ്സ വണ്ണസമ്പദാസദിസത്താ. തിഭൂമകോ ഏവ തേഭൂമകോ.

അതീതം നാനുസോചന്തി അതീതം പച്ചയലാഭം ലക്ഖണം കത്വാ ന സോചന്തി ന അനുത്ഥുനന്തി. ജപ്പനതണ്ഹായ വസേന ന പരികപ്പന്തീതി ആഹ ‘‘ന പത്ഥേന്തീ’’തി. യേന കേനചീതി ഇതരീതരേന. തങ്ഖണേ ലദ്ധേനാതി സന്നിധികാരപരിഭോഗാഭാവമാഹ. തിവിധേനപി കാരണേനാതി തിപ്പകാരേന ഹേതുനാ, തിലക്ഖണസന്തോസനിമിത്തന്തി അത്ഥോ.

വിനാസന്തി വിനാസനഹേതും. വിനസ്സന്തി ഏതേഹീതി വിനാസോ, ലോഭദോസാ തദേകട്ഠാ ച പാപധമ്മാ. അരൂപകായസ്സ വിയ രൂപകായസ്സപി വിസേസതോ സുക്ഖഭാവകാരണന്തി ആഹ ‘‘ഏതേന കാരണദ്വയേനാ’’തി. ലുതോതി ലൂനോ.

അരഞ്ഞസുത്തവണ്ണനാ നിട്ഠിതാ.

നളവഗ്ഗവണ്ണനാ നിട്ഠിതാ.