൨൭. അസംവാസനിദ്ദേസവണ്ണനാ

൧൯൮. ഉക്ഖിത്തോതി കമ്മനാനാസംവാസകസങ്ഖാതോ ആപത്തിയാ അദസ്സനേ, അപ്പടികമ്മേ, പാപികായ ദിട്ഠിയാ അപ്പടിനിസ്സഗ്ഗേ ഉക്ഖിത്തകോ. അനുപസമ്പന്നോതി സിക്ഖമാനസാമണേരസാമണേരിസിക്ഖാപച്ചക്ഖാതസങ്ഖാതോ അനുപസമ്പന്നോ. ഛിന്നമൂലകോതി അന്തിമവത്ഥുഅജ്ഝാപന്നോ. ഉക്ഖിത്തകേസു ‘‘ധമ്മവാദിനോ ഏതേ’’തി ഉപ്പന്നായ ലദ്ധിയാ നാനാഭൂതോ സംവാസോ ഏതസ്സാതി നാനാസംവാസോ, ഉക്ഖിത്താനുവത്തകസങ്ഖാതോ ലദ്ധിനാനാസംവാസകോ. സീമതോ നിഗ്ഗതാ നിസ്സീമാ, സീമന്തരികാ ബഹിസീമാ ച, തത്ഥ ഹത്ഥപാസേ ചേപി ഠിതോ, സീമാനാനാസംവാസകോ നിസ്സീമട്ഠിതോ. വേഹായസേ ആകാസേ ഠിതോ വേഹായസണ്ഠിതോ ബിന്ദാഗമേന. തത്ഥ ‘‘നാനാസംവാസോ ചാ’’തിആദിനാ സമാഹാരദ്വന്ദേപി ക്വചി നപുംസകലിങ്ഗം ബ്യഭിചരതീതി നപുംസകത്താഭാവോ യഥാ ‘‘മഗ്ഗാമഗ്ഗോ’’തി. ഏകകമ്മം ഏകുദ്ദേസോ സമസിക്ഖതാതി അയം തിവിധോപി സംവാസോ നാമ. സോ യേസം നത്ഥി, തേ അസംവാസാ. ഏതേ ഹത്ഥപാസതോ ബഹികരണവസേന വജ്ജേതബ്ബാ. ഏതേസു ഹി തിവിധേ ഉക്ഖിത്തകേ സതി ഉപോസഥാദികം കമ്മം കരോന്തസ്സ പാചിത്തിയം, ഇതരേസു ദുക്കടന്തി.

അസംവാസനിദ്ദേസവണ്ണനാ നിട്ഠിതാ.