൧൯. ന്ഹാനകപ്പനിദ്ദേസവണ്ണനാ

൧൬൮. കപ്പനം കപ്പിയതാ കപ്പോ, ന്ഹാനേ കപ്പോ ന്ഹാനകപ്പോ. നവകോ ഥേരാനം പുരതോ ഉപരി വാ ന ച ന്ഹായേയ്യാതി സമ്ബന്ധോ. ന ചാതി നയേവ. പുരതോതി അഭിമുഖേ. ഉപരീതി നദിയാ ഉപരി.

൧൬൯-൧൭൧. കുട്ടത്ഥമ്ഭതരുട്ടാനേ കായം ന ഘംസയേതി സമ്ബന്ധോ. തത്ഥ കുട്ടം നാമ ഇട്ഠകദാരുസിലാഭിത്തി. ഥമ്ഭോ നാമ നഹാനതിത്ഥേ നിഖനിത്വാ ഠപിതോ. തരൂതി രുക്ഖോ. അട്ടാനം നാമ തച്ഛേത്വാ അട്ഠപദാകാരേന രാജിയോ ഛിന്ദിത്വാ നഹാനതിത്ഥേ നിഖാതഫലകം. ഗന്ധബ്ബഹത്ഥേന വാ…പേ… മല്ലകേന വാ കായം സരീരേന വാ അഞ്ഞമഞ്ഞം ന ഘംസയേതി സമ്ബന്ധോ. ഗന്ധബ്ബഹത്ഥേനാതി ദാരുമയഹത്ഥേന. കുരുവിന്ദകസുത്തിയാതി കുരുവിന്ദകപാസാണചുണ്ണാനി ലാഖായ ബന്ധിത്വാ കതഗുളികാവലിയാ സുത്തേന ആവുണിതസുത്തിയാ. മല്ലകേനാതി മകരദന്തകേ ഛിന്ദിത്വാ പദുമകണ്ണികസണ്ഠാനേന കതമല്ലകേന. സരീരേനാതി അത്തനോ കായേന. അഞ്ഞമഞ്ഞസ്സ അഞ്ഞമഞ്ഞം കിരിയാകരണസങ്ഖാതേ കിരിയാബ്യഭിഹാരേ ദ്വിത്തം. കപാല…പേ… പുഥുപാണി ച സബ്ബേസം വട്ടതീതി സമ്ബന്ധോ. കപാലഞ്ച ഇട്ഠകാ ച, താസം ഖണ്ഡാനി. പുഥുപാണീതി പുഥു നാനാ പാണി പുഥുപാണി, ഹത്ഥപരികമ്മം രുള്ഹീവസേന. സബ്ബേസന്തി ഗിലാനാഗിലാനാനം. ഗിലാനസ്സ അകതമല്ലകം വട്ടതീതി സമ്ബന്ധോ. അകതമല്ലകം നാമ കതമല്ലകവിപരീതം. ഫേണം നാമ സമുദ്ദഫേണന്തി.

ന്ഹാനകപ്പനിദ്ദേസവണ്ണനാ നിട്ഠിതാ.