൧൬. വച്ചപസ്സാവട്ഠാനികനിദ്ദേസവണ്ണനാ

൧൫൬. വച്ചപസ്സാവട്ഠാനികന്തി ഠാനമ്ഹി ഠാനേ വാ ഭവം വച്ചപസ്സാവട്ഠാനികം. യഥാവുഡ്ഢം വച്ചം ന കരേയ്യാതി സമ്ബന്ധോ. യേ യേ വുഡ്ഢാ യഥാവുഡ്ഢം, ആഗതപ്പടിപാടിം ഹിത്വാ വുഡ്ഢപ്പടിപാടിയാതി അത്ഥോ. വച്ചന്തി ഉപലക്ഖണമത്തം, പസ്സാവഞ്ച നഹാനഞ്ച ന കരേയ്യാതി അധിപ്പായോ. തദേവ സമത്ഥേതി ‘‘യാതാനുപുബ്ബിയാ’’തിആദിനാ. യാതാനുപുബ്ബിയാതി യാതാനം ഗതാനം അനുപുബ്ബി അനുക്കമോ യാതാനുപുബ്ബി, തായ. വച്ച…പേ… തിത്ഥഞ്ചാതി ഏതം തയം ലബ്ഭതീതി അത്ഥോ, ഭിക്ഖുനാതി വിഞ്ഞായതി.

൧൫൭. ഉബ്ഭജിത്വാ ച സഹസാ ച നോ പവിസേയ്യാതി സമ്ബന്ധോ. ഉബ്ഭജിത്വാതി ചീവരം ദൂരതോവ ഉക്ഖിപിത്വാ. സഹസാതി സീഘം. ഉക്കാസിത്വാ പവിസേയ്യാതി യോജനാ.

൧൫൮. വച്ചപസ്സാവദോണീനം ബഹീതി സമ്ബന്ധോ. ഉഭയന്തി വച്ചമ്പി പസ്സാവമ്പി.

൧൫൯. കൂപേതി വച്ചാവാടേ. കട്ഠന്തി അവലേഖനകട്ഠം. ഫരുസേനാതി ഖരേന അവലേഖനകട്ഠേന. ഉഹതഞ്ചാപീതി അത്തനാ വാ പരേന വാ ഉഹതഞ്ചാപി വച്ചമക്ഖിതഞ്ചാപീതി അത്ഥോ. ധോവയേതി സതി ഉദകേ, ഉദകേ അസതി കട്ഠേനപി സോധേയ്യ.

൧൬൦. ന നിക്ഖമേതി ന നിക്ഖമേയ്യ. ചപു ചപൂതി അനുകരണം, വിച്ഛായം ദ്വിത്തേ ചപു ചപു കത്വാതി കിരിയാവിസേസനം. നാചമേയ്യാതി ന ധോവേയ്യ. സതി പന ഉദകേ ആചമിതബ്ബം, അസതി യേന കേനചി പുഞ്ഛിത്വാ ഗന്തബ്ബം, സബ്ബസാധാരണട്ഠാനേ ച ആചമനകുമ്ഭിയാ ഉദകം ന സേസേതബ്ബം. ഉക്ലാപന്തി കചവരം. വിസോധയേതി വിഹാരസോധനേ വിയ വച്ചപസ്സാവകുടിയോ, പരിവേണകോട്ഠകേ ച സമ്മജ്ജേയ്യ. സബ്ബത്ഥേവ ച പന വത്തഭേദേ ദുക്കടം.

വച്ചപസ്സാവട്ഠാനികനിദ്ദേസവണ്ണനാ നിട്ഠിതാ.