൧൦. അകപ്പിയമംസനിദ്ദേസവണ്ണനാ

൧൧൩-൪. മനുസ്സഹത്ഥിഅസ്സാനഞ്ച …പേ… ഉരഗസ്സ ച യം മംസഞ്ച, യം ഉദ്ദിസ്സകതമംസഞ്ച, അപ്പടിവേക്ഖിതം യഞ്ച മംസം, തേസു മംസേസൂതി ഏവം യോജേത്വാ അത്ഥോ വേദിതബ്ബോ. തത്ഥ സീസഗീവാതരങ്ഗേന ചരന്താ അച്ഛവിസേസാവ തരച്ഛാ. ഉരഗസ്സാതി ഇമിനാ സബ്ബാപി ദീഘജാതി സങ്ഗഹിതാ. ഉദ്ദിസ്സകതമംസന്തി ഭിക്ഖും ഉദ്ദിസിത്വാ കതം ഉദ്ദിസ്സകതം, തഞ്ച തം മംസഞ്ച. ഏത്ഥ ച മംസ-ഗ്ഗഹണേന മച്ഛാനമ്പി ഗഹണം വേദിതബ്ബം ഉപലക്ഖണവസേന, ച-സദ്ദേന വാ. പഞ്ചസുപി സഹധമ്മികേസു യം കിഞ്ചി ഉദ്ദിസ്സകതം സബ്ബേസമ്പി ന കപ്പതി, തമ്പി അദിട്ഠഅസുതഅപരിസങ്കിതതായ തികോടിപരിസുദ്ധം വട്ടതി. അപ്പടിവേക്ഖിതന്തി അനുപപരിക്ഖിതം, അനാപുച്ഛിതന്തി അത്ഥോ. ആപത്തിഭീരുകേന ഹി രൂപം സല്ലക്ഖേന്തേനാപി പുച്ഛിത്വാ പടിഗ്ഗഹേതബ്ബം പരിഭുഞ്ജിതബ്ബഞ്ച. മനുസ്സാനം മംസേസു ഥുല്ലച്ചയന്തി യോജനാ. ഥൂലോ അച്ചയോ ഏത്ഥാതി രസ്സേ, ദ്വിത്തേ ച ഥുല്ലച്ചയം. പാരാജികസങ്ഘാദിസേസേഹി ഠപേത്വാ ഇതോ അധികം വജ്ജം നത്ഥി. സേസേസൂതി അവസേസേസു ഏകാദസസു.

൧൧൫. ഇദാനി മനുസ്സാദീനം അട്ഠിആദീനിപി അകപ്പിയാനീതി ദസ്സേതും ‘‘അട്ഠിപീ’’തിആദിമാഹ. പി-സദ്ദോ ‘‘ലോഹിത’’ന്തിആദീസുപി അനുവത്തേതബ്ബോ. ഏസന്തി മനുസ്സാദീനം ദസന്നം. വസാസു പന ഏകാ മനുസ്സവസാ ന വട്ടതി. ഖീരാദീസു അകപ്പിയം നാമ നത്ഥി. ഉദ്ദിസ്സകതംയേവ സചിത്തകന്തി യോജനാ. സചിത്തകന്തി ഉദ്ദിസ്സകതഭാവജാനനചിത്തേന സഹ വത്തതീതി സചിത്തകം. വത്ഥുവീതിക്കമവിജാനനചിത്തേന ഹി സചിത്തകത്തം. ഏത്ഥ ച സചിത്തകത്തം ആപത്തിയാ ഏവ, ന ച മംസസ്സ, തഥാപി മംസസീസേന ആപത്തി ഏവ വുത്താതി വിഞ്ഞാതബ്ബന്തി.

അകപ്പിയമംസനിദ്ദേസവണ്ണനാ നിട്ഠിതാ.