൩൮. കുലദൂസനനിദ്ദേസവണ്ണനാ

൨൯൭. ‘‘കുലാനി ദൂസേതി പുപ്ഫേന വാ ഫലേന വാ ചുണ്ണേന വാ മത്തികായ വാ ദന്തകട്ഠേന വാ വേളുയാ വാ വേജ്ജികായ വാ ജങ്ഘപേസനിയേന വാ’’തി (പാരാ. ൪൩൭) വുത്തത്താ താനി അട്ഠ വത്ഥൂനി ദസ്സേതും ‘‘പുപ്ഫ’’ന്തിആദിമാഹ. ഇമായ മിച്ഛാപടിപത്തിയാ കുലാനം അഞ്ഞേസു സീലവന്തേസു പസാദം ദൂസേതി വിനാസേതീതി കുലദൂസനം ദുക്കടം ആപജ്ജതി. തം പന അത്തനോ സന്തകേ ച പരസന്തകേ ച വേദിതബ്ബം.

൨൯൮. ഇദാനി ഇമേസു വത്ഥൂസു ന കേവലം കുലദൂസനദുക്കടമേവ ആപജ്ജതി, ഥുല്ലച്ചയാദീനിപി ആപജ്ജതീതി ദസ്സേതും ‘‘ഥുല്ലച്ചയ’’ന്തിആദിമാഹ. സങ്ഘികം ഗരുഭണ്ഡം ഇസ്സരേന ദേന്തസ്സ ഥുല്ലച്ചയന്തി സമ്ബന്ധോ. സേനാസനത്ഥായ നിയമിതം പന പുപ്ഫാദി ഗരുഭണ്ഡം ഹോതി. സങ്ഘസ്സ വാ അഞ്ഞസ്സ വാ സന്തകം ഥേയ്യചിത്തേന ദേന്തസ്സ ദുക്കടാദീനി ഹോന്തീതി പാഠസേസോ, തസ്സ ഭണ്ഡസ്സ അഗ്ഘവസേന ദുക്കടഥുല്ലച്ചയപാരാജികാനി ഹോന്തീതി അത്ഥോ.

൨൯൯-൩൦൦. സബ്ബഥാതി (പാരാ. അട്ഠ. ൨.൪൩൧) കപ്പിയവോഹാരഅകപ്പിയവോഹാരപരിയായഓഭാസനിമിത്തകമ്മാദീഹി ന വട്ടതീതി അത്ഥോ. വതിആദീനി കത്വാ ജഗ്ഗിതുഞ്ച. അത്തനോ പരിഭോഗത്ഥന്തി ഫലപരിഭോഗത്ഥം. രോപനാദീനീതി രോപാപനാദീനി. ആദി-സദ്ദേന സിഞ്ചാപനഓചിനാപനാദീനി ഗഹിതാനി. കുദ്ദാലഖണിത്തിവാസിഫരസുഉദകഭാജനാദീനി ആഹരിത്വാ സമീപേ ഠപനവസേന നിമിത്തതോ ച കുദ്ദാലഖണിത്താദീനി ച മാലാവച്ഛേ ച ഗഹേത്വാ ഠിതേ ‘‘സാമണേരാദയോ ദിസ്വാ ‘ഥേരോ കാരാപേതുകാമോ’തി ആഗന്ത്വാ കരോന്തീ’’തി സഞ്ഞായ ഓഭാസതോ ച ‘‘ഇമം രുക്ഖം ജാന, ഇമം ആവാടം ജാനാ’’തിആദികപ്പിയവോഹാരതോ ച ‘‘പണ്ഡിതേന മാലാവച്ഛാദയോ രോപാപേതബ്ബാ, ന ചിരസ്സേവ ഉപകാരായ സംവത്തന്തീ’’തിആദിപരിയായതോ ച രോപനാദീനി ലബ്ഭരേതി സമ്ബന്ധോ.

൩൦൧-൨. ഇദാനി അട്ഠസു വത്ഥൂസു അവസേസാനി ദ്വേ വത്ഥൂനി ദസ്സേതും ‘‘വുത്താവ വേജ്ജികാ ജങ്ഘപേസനേ’’തി വുത്തം. തത്ഥ വേജ്ജികാ പുബ്ബേ വുത്താവ, ഇദാനി ജങ്ഘപേസനാദിവിനിച്ഛയം വക്ഖാമീതി അത്ഥോ. പിതരോതി (പാരാ. അട്ഠ. ൨.൪൩൬-൪൩൭) മാതാപിതരോ. ഭണ്ഡുന്തി പബ്ബജ്ജാപേക്ഖം. ഭിക്ഖുസ്സ സകം വേയ്യാവച്ചകരഞ്ചാതി ഏതേ ഠപേത്വാ കസിവാണിജ്ജാദിഗിഹികമ്മേസു ദൂതസാസനം ഹരണേ ദുക്കടന്തി അത്ഥോ. പഠമം സാസനം അഗ്ഗഹേത്വാ പുന തം ദിസ്വാ വാ തസ്സ സന്തികം ഗന്ത്വാ വാ വദതോപി ദുക്കടമേവാതി അത്ഥോ. സാസനം അഗ്ഗഹേത്വാ ആഗതാനം പന ‘‘ഭന്തേ, തസ്മിം ഗാമേ ഇത്ഥന്നാമസ്സ കാ പവത്തീ’’തി പുച്ഛിയമാനേ കഥേതും വട്ടതി. പുച്ഛിതപഞ്ഹേ ദോസോ നത്ഥി.

൩൦൩. ഏവം കുലദൂസനേന ഉപ്പന്നപച്ചയാ. ‘‘പഞ്ചന്നമ്പീ’’തി വുത്തത്താ അനുപസമ്പന്നേന കതമ്പി ഏദിസം ന വട്ടതി ഏവ മിച്ഛാജീവത്താ. ആതുമാവത്ഥു (മഹാവ. ൩൦൩) ചേത്ഥ നിദസ്സനം. കിം വിയാതി ചേ, തം ദസ്സേതും ‘‘അഭൂതാരോചനാരൂപ-സബ്യോഹാരുഗ്ഗഹാദിസാ’’തി വുത്തം. തത്ഥ ഉഗ്ഗഹാദിസാതി ഏതേഹി ഉപ്പന്നപച്ചയസദിസാതി അത്ഥോ.

൩൦൪. ഇദാനി പുപ്ഫാദീനി കേസം ദാതും വട്ടന്തി, കേസം ദാതും ന വട്ടന്തീതി തം ദസ്സേതും ‘‘ഹരാപേത്വാ’’തിആദിമാഹ. പിതൂനം (പാരാ. അട്ഠ. ൨.൪൩൬-൪൩൭) ദാതും ലബ്ഭതീതി സമ്ബന്ധോ. സേസഞാതീനം പത്താനം ഏവ. ലിങ്ഗന്തി സിവലിങ്ഗം.

൩൦൫. തഥാ ഫലന്തി ഫലമ്പി മാതാപിതൂനം ഹരിത്വാപി ഹരാപേത്വാപി ദാതും ലബ്ഭതീതി അത്ഥോ. ന കേവലം മാതാപിതൂനംയേവ, അഞ്ഞേസമ്പി ദാതും ലബ്ഭതീതി ദസ്സേതും ‘‘ഗിലാനാന’’ന്തിആദിമാഹ. സപരസന്തകന്തി ഏത്ഥ പരോതി അത്തനോ വിസ്സാസഞ്ഞാതകോ ഏവ അധിപ്പേതോ.

൩൦൬. ഭാജേന്തേതി സങ്ഘസ്സ ഫലപുപ്ഫമ്ഹി ഭാജിയമാനേ സമ്മതേന ദേയ്യന്തി സമ്ബന്ധോ. ഇതരേന അസമ്മതേന അപലോകേത്വാ ദാതബ്ബന്തി അത്ഥോ.

൩൦൭. പരിച്ഛിജ്ജാതി ആഗതാനം ദാതബ്ബന്തി ഫലവസേന വാ രുക്ഖവസേന വാ പരിച്ഛിന്ദിത്വാതി അത്ഥോ. ഇതരസ്സാതി ഇസ്സരാദികസ്സ. കതികം വത്വാതി ‘‘ഇമസ്മിം രുക്ഖേ ഏത്തകാനി ഫലാനി ലബ്ഭന്തീ’’തി ഏവം വത്വാ.

൩൦൮. സേസേതി മത്തികാദന്തകട്ഠവേളുമ്ഹി (പാരാ. അട്ഠ. ൨.൪൩൬-൪൩൭). യഥാവുത്തനയോ ഏവാതി ഏത്ഥ അത്തനോ ച പരസ്സ ച സന്തകം കുലസങ്ഗഹത്ഥായ ദദതോ ദുക്കടന്തിആദിനാ ഹേട്ഠാ വുത്തനയേനേവ വിനിച്ഛയോ വേദിതബ്ബോതി അത്ഥോ. പണ്ണമ്പീതി കിഞ്ചാപി പാളിയം പണ്ണദാനം ന വുത്തം, തഥാപി കുലദൂസനേ പവേസയേതി അത്ഥോ. കുലദൂസനവിനിച്ഛയോ.

കുലദൂസനനിദ്ദേസവണ്ണനാ നിട്ഠിതാ.