൩൬. ഭേസജ്ജനിദ്ദേസവണ്ണനാ

൨൭൪-൫. സഹധമ്മിനം ലബ്ഭം ഭേസജ്ജകരണന്തി സമ്ബന്ധോ. ന കേവലം പഞ്ചന്നം സഹധമ്മികാനംയേവ ഭിക്ഖാചരിയവിഞ്ഞത്തിസകേഹി ഭേസജ്ജകരണം ലബ്ഭതി, അഥ ഖോ അപരേസമ്പി പഞ്ചന്നം ലബ്ഭതി, തേ ദസ്സേന്തോ ‘‘പിതൂന’’ന്തിആദിമാഹ. പിതൂനന്തി മാതാപിതൂനന്തി അത്ഥോ. യേ മാതാപിതരോ ജഗ്ഗന്തി ഉപട്ഠഹന്തി, തേ തദുപട്ഠാകാ നാമ. ഭിക്ഖും ഏവ നിസ്സായ ജീവന്തോ ഭിക്ഖുനിസ്സിതകോ നാമ. പബ്ബജ്ജാപേക്ഖോ ‘‘ഭണ്ഡൂ’’തി വുച്ചതി.

൨൭൬. അപരേസമ്പി ദസന്നം കാതും വട്ടതി, തേ ദസ്സേതും ‘‘മഹാചൂളപിതാ’’തിആദിമാഹ. ഏത്ഥ (പാരാ. അട്ഠ. ൨.൧൮൫-൧൮൭) പന മഹാപിതാ ചൂളപിതാ മഹാമാതാ ചൂളമാതാ മഹാഭാതാ ചൂളഭാതാ മഹാഭഗിനീ ചൂളഭഗിനീതി ഇമേഹി അട്ഠഹി ആദി-സദ്ദേന പിതുഭഗിനിഞ്ച മാതുഭാതികഞ്ച ഗഹേത്വാ ദസ. ഏതേസം പന സകേന ഭേസജ്ജേന കാതബ്ബം. അത്തനിയേ ച അസതീതി പാഠസേസോ.

൨൭൭. ന കേവലഞ്ച ഏതേസം ദസന്നം, ഇമേഹി സമ്ബന്ധാനം പുത്തനത്താദീനം യാവസത്തമാ കുലപരിവട്ടാ കാതും വട്ടതീതി ദസ്സനത്ഥം ‘‘കുലദൂസനാ’’തിആദിമാഹ. അഞ്ഞോപി (പാരാ. അട്ഠ. ൨.൨൮൫-൨൮൭) യോ ആഗന്തുകോ വാ ചോരോ വാ യുദ്ധപരാജിതോ വാ ഇസ്സരോ ഞാതകേഹി പരിച്ചത്തോ വാ ഗമിയമനുസ്സോ വാ ഗിലാനോ ഹുത്വാ വിഹാരം പവിസതി, സബ്ബേസമ്പി അപച്ചാസീസന്തേന ഭേസജ്ജം കാതബ്ബം.

൨൭൮. മാതാ (പാരാ. അട്ഠ. ൨.൧൮൫-൧൮൭) പിതാ തദുപട്ഠാകോ ഭിക്ഖുനിസ്സിതകോ പണ്ഡുപലാസോ വേയ്യാവച്ചകരോതി ഇമേസം ഛന്നം അനാമട്ഠപിണ്ഡപാതോ അവാരിതോതി അത്ഥോ. കിഞ്ച ഭിയ്യോ – ദാമരികചോരസ്സ ച ഇസ്സരിയസ്സ ച ദാതുമവാരിതോതി അത്ഥോ.

൨൭൯. തേസന്തി (പാരാ. അട്ഠ. ൨.൧൮൫-൧൮൭) ഗഹട്ഠാനം. സാസനോഗധന്തി രതനപരിത്തആടാനാടിയപരിത്താദിപരിത്തം ഭണിതബ്ബന്തി അത്ഥോ.

൨൮൦. ‘‘ആഗന്ത്വാ (പാരാ. അട്ഠ. ൨.൧൮൫-൧൮൭) സീലം ദേതു, ധമ്മഞ്ച പരിത്തഞ്ച ഭാസതൂ’’തി കേനചി പേസിതോതി സമ്ബന്ധോ. ദാതും വത്തുന്തി സീലം ദാതും, ധമ്മഞ്ച പരിത്തഞ്ച വത്തും ലബ്ഭതീതി അത്ഥോ. ഭേസജ്ജവിനിച്ഛയോ.

ഭേസജ്ജനിദ്ദേസവണ്ണനാ നിട്ഠിതാ.