൨൯. മിച്ഛാജീവവിവജ്ജനാനിദ്ദേസവണ്ണനാ

൨൦൯. ചുണ്ണന്തി സിരീസചുണ്ണാദികന്തി അത്ഥോ. മത്തികാതി പകതിമത്തികാ വാ പഞ്ചവണ്ണാ വാ സുദ്ധാ കുങ്കുട്ഠആദികാ വാ. കുലസങ്ഗഹാതി ഏതേഹി സങ്ഗഹിതാനം സന്തികേ ലാഭാസായ കുലസങ്ഗഹത്ഥന്തി അത്ഥോ. ഏത്ഥ പന ഇമേഹി സങ്ഗഹിതാനം സന്തികേ ‘‘കിഞ്ചി ലഭിസ്സാമീ’’തി സങ്ഘികം വാ പുഗ്ഗലികം വാ ദാതും ന വട്ടതി ഏവ. ഇമിനാ പന നയേന ലദ്ധം പഞ്ചന്നമ്പി സഹധമ്മികാനം ന വട്ടതി, മിച്ഛാജീവഞ്ച ഹോതി.

൨൧൦-൨൧൧. ലാഭാസായ ദായകാനം ദാരകേ ഉക്ഖിപിത്വാ പരിഭടഭാവോ പാരിഭടകതാ, തായ പാരിഭടകതായ ന ജീവയേതി സമ്ബന്ധോ. സേസേസുപി ഏസേവ നയോ. ഖേത്താദീസു പേസിതസ്സ ഗമനം പഹേണകമ്മം. സാസനപ്പടിസാസനഹരണം ദൂതകമ്മം. പേസിതസ്സ ഗേഹതോ ഗേഹഗമനം ജങ്ഘപേസനിയം. ലാഭാസായ ലഞ്ജദാനമനുപ്പദാനം. അഞ്ഞേന വാപീതി അങ്ഗവിജ്ജാദിനാ.

൨൧൨. വിഞ്ഞത്തീതി (പാരാ. ൫൧൫ ആദയോ; പാരാ. അട്ഠ. ൨.൫൧൫ ആദയോ) അഞ്ഞാതകവിഞ്ഞത്തി. അനേസനാതി പുബ്ബേ വുത്തേന പുപ്ഫദാനാദിനാ പച്ചയേസനാ. കുഹനാദീഹീതി (വിഭ. ൮൬൧; വിഭ. അട്ഠ. ൮൬൧; മഹാനി. ൮൭) കുഹനാ ലപനാ നേമിത്തകതാ നിപ്പേസികതാ ലാഭേന ലാഭം നിജിഗീസനതാതി ഇമേഹി പഞ്ചഹി വത്ഥൂഹീതി അത്ഥോ. മിച്ഛാജീവവിനിച്ഛയോ.

മിച്ഛാജീവവിവജ്ജനാനിദ്ദേസവണ്ണനാ നിട്ഠിതാ.