൭. പവാരണാനിദ്ദേസോ

പവാരണാതി –

൭൩. യേനീരിയാപഥേനായം, ഭുഞ്ജമാനോ പവാരിതോ;

തതോ അഞ്ഞേന ഭുഞ്ജേയ്യ, പാചിത്തിനതിരിത്തകം.

൭൪. അസനം ഭോജനഞ്ചേവ, അഭിഹാരോ സമീപതാ;

കായവാചാപടിക്ഖേപോ, പഞ്ചഅങ്ഗാ പവാരണാ.

൭൫. ഓദനോ സത്തു കുമ്മാസോ, മച്ഛോ മംസഞ്ച ഭോജനം;

സാലി വീഹി യവോ കങ്ഗു, കുദ്രൂസവരഗോധുമാ;

സത്തന്നമേസം ധഞ്ഞാനം, ഓദനോ ഭോജ്ജയാഗു ച.

൭൬. സാമാകാദിതിണം കുദ്രൂസകേ വരകചോരകോ;

വരകേ സാലിയഞ്ചേവ, നീവാരോ സങ്ഗഹം ഗതോ.

൭൭. ഭട്ഠധഞ്ഞമയോ സത്തു, കുമ്മാസോ യവസമ്ഭവോ;

മംസോ ച കപ്പിയോ വുത്തോ, മച്ഛോ ഉദകസമ്ഭവോ.

൭൮. ഭുഞ്ജന്തോ ഭോജനം കപ്പ-മകപ്പം വാ നിസേധയം;

പവാരേയ്യാഭിഹടം കപ്പം, തന്നാമേന ഇമന്തി വാ.

൭൯. ലാജാ തംസത്തുഭത്താനി, ഗോരസോ സുദ്ധഖജ്ജകോ;

തണ്ഡുലാ ഭട്ഠപിട്ഠഞ്ച, പുഥുകാ വേളുആദിനം.

൮൦. ഭത്തം വുത്താവസേസാനം, രസയാഗു രസോപി ച;

സുദ്ധയാഗുഫലാദീനി, ന ജനേന്തി പവാരണം.

൮൧. പവാരിതേന വുട്ഠായ, അഭുത്തേന ച ഭോജനം;

അതിരിത്തം ന കാതബ്ബം, യേന യം വാ പുരേ കതം.

൮൨. കപ്പിയം ഗഹിതഞ്ചേവു-ച്ചാരിതം ഹത്ഥപാസഗം;

അതിരിത്തം കരോന്തേവം, ‘‘അലമേത’’ന്തി ഭാസതു.

൮൩. ന കരേനുപസമ്പന്ന-ഹത്ഥഗം പേസയിത്വാപി;

കാരേതും ലബ്ഭതേ സബ്ബോ, ഭുഞ്ജിതും തമകാരകോതി.