൫. പത്തനിദ്ദേസോ

പത്തോ ചാതി –

൬൦. അയോപത്തോ ഭൂമിപത്തോ, ജാതിയാ കപ്പിയാ ദുവേ;

ഉക്കട്ഠോ മജ്ഝിമോ ചേവ, ഓമകോ ച പമാണതോ.

൬൧. ഉക്കട്ഠോ മഗധേ നാളി-ദ്വയതണ്ഡുലസാധിതം;

ഗണ്ഹാതി ഓദനം സൂപം, ബ്യഞ്ജനഞ്ച തദൂപിയം.

൬൨. മജ്ഝിമോ തസ്സുപഡ്ഢോവ, തതോപഡ്ഢോവ ഓമകോ;

ഉക്കട്ഠതോ ച ഉക്കട്ഠോ, അപത്തോ ഓമകോമകോ.

൬൩. അതിരേകപത്തോ ധാരേയ്യോ, ദസാഹപരമം സകോ;

കപ്പോ നിസ്സഗ്ഗിയോ ഹോതി, തസ്മിം കാലേതിനാമിതേ.

൬൪. അച്ഛേദദാനഗാഹേഹി, വിബ്ഭമാ മരണുദ്ധടാ;

ലിങ്ഗസിക്ഖാഹി ഛിദ്ദേന, പത്താധിട്ഠാനമുജ്ഝതി.

൬൫. പത്തം ന പടിസാമേയ്യ, സോദകം ന ച ഓതപേ;

ഉണ്ഹേ ന നിദഹേ ഭുമ്യാ, ന ഠപേ നോ ച ലഗ്ഗയേ.

൬൬. മിഡ്ഢന്തേ പരിഭണ്ഡന്തേ, അങ്കേ വാ ആതപത്തകേ;

പാദേസു മഞ്ചപീഠേ വാ, ഠപേതും ന ച കപ്പതി.

൬൭. ന നീഹരേയ്യ ഉച്ഛിട്ഠോ-ദകഞ്ച ചലകട്ഠികം;

പത്തേന പത്തഹത്ഥോ വാ, കവാടം ന പണാമയേ.

൬൮. ഭൂമിആധാരകേ ദാരുദണ്ഡാധാരേ സുസജ്ജിതേ;

ദുവേ പത്തേ ഠപേയ്യേകം, നിക്കുജ്ജിത്വാന ഭൂമിയം.

൬൯. ദാരുരൂപിയസോവണ്ണ-മണിവേളുരിയാമയാ;

കംസകാചതിപുസീസഫലികാതമ്ബലോഹജാ.

൭൦. ഛവസീസമയോ ചാപി, ഘടീതുമ്ബകടാഹജാ;

പത്താ അകപ്പിയാ സബ്ബേ, വുത്താ ദുക്കടവത്ഥുകാതി.