൪൯. ചതുരാരക്ഖനിദ്ദേസോ

ചതുരക്ഖാതി –

൪൬൧. ബുദ്ധാനുസ്സതി മേത്താ ച, അസുഭം മരണസ്സതി;

ആരകത്താദിനാരഹം, സമ്മാ സാമഞ്ച ബുദ്ധതോ.

൪൬൨. സമ്മാസമ്ബുദ്ധഇതി വാനുസ്സതി യാ പുനപ്പുനം;

നവഭേദേ ഭഗവതോ, ബുദ്ധാനുസ്സതി സാ ഗുണേ.

൪൬൩. സീമട്ഠസങ്ഘേ സീമട്ഠദേവതാസു ച ഇസ്സരേ;

ജനേ ഗോചരഗാമമ്ഹി, തത്ഥുപാദായ മാനുസേ.

൪൬൪. സബ്ബസത്തേസു സുഖിതാ, ഹോന്താവേരാതിആദിനാ;

പരിച്ഛിജ്ജ പരിച്ഛിജ്ജ, ഭാവനാ മേത്തഭാവനാ.

൪൬൫. വണ്ണസണ്ഠാനഓകാസ-ദിസതോ പരിച്ഛേദതോ;

വവത്ഥപേത്വാ കേസാദി-കോട്ഠാസേ അനുപുബ്ബതോ.

൪൬൬. നാതിസീഘഞ്ച സണികം, വിക്ഖേപം പടിബാഹയം;

പണ്ണത്തിം സമതിക്കമ്മ, മുഞ്ചന്തസ്സാനുപുബ്ബതോ.

൪൬൭. വണ്ണആസയസണ്ഠാന-ഗന്ധോകാസേഹി ഭാവനാ;

പടിക്കൂലാതി കോട്ഠാസേ, ഉദ്ധുമാതാദിവത്ഥുസു;

ഗഹേത്വാ അസുഭാകാരം, പവത്താ ഭാവനാസുഭം.

൪൬൮. ‘‘മരണം മേ ഭവിസ്സതി, ജീവിതം ഉച്ഛിജ്ജിസ്സതി;

മരണം മരണം വാ’’തി, ഭാവയിത്വാന യോനിസോ.

൪൬൯. വധകസ്സേവുപട്ഠാനാ, സമ്പത്തീനം വിപത്തിതോ;

ഉപസംഹരതോ കായബഹുസാധാരണാ തഥാ.

൪൭൦. ആയുദുബ്ബലതോ കാലവവത്ഥാനസ്സഭാവതോ;

അദ്ധാനസ്സ പരിച്ഛേദാ, ഭാവനാ മരണസ്സതീതി.