൩൫. പരിക്ഖാരനിദ്ദേസോ

പരിക്ഖാരോതി –

൨൫൯. പഞ്ചവണ്ണേഹി സുത്തേഹി, അന്തോ ബഹി ച സിബ്ബിതും;

ഗിരികൂടഡ്ഢചന്ദാദിം, ഛത്തേ പണ്ണേ ച ഛിന്ദിതും.

൨൬൦. ഘടകം വാളരൂപം വാ, ദണ്ഡേ ലേഖാ ന വട്ടതി;

വട്ടതീ ദണ്ഡബുന്ദമ്ഹി, അഹിച്ഛത്തകസാദിസം.

൨൬൧. സിബ്ബിതും ഏകവണ്ണേന, പഞ്ജരം വാ വിനന്ധിതും;

ഥിരത്ഥം വട്ടതീ ഛത്തേ, ദണ്ഡേ ലേഖാവ ബന്ധിതും.

൨൬൨. അന്തേ പട്ടമുഖേ വാപി, വേണി സങ്ഖലികാപി വാ;

സൂചിവികാരമഞ്ഞം വാ, ചീവരേ ന ച കപ്പതി;

കപ്പബിന്ദുവികാരമ്പി, പാളികണ്ണികആദികം.

൨൬൩. ഗണ്ഠിപാസകപട്ടാപി, ചതുക്കോണാവ അഗ്ഘിയം;

മുഗ്ഗരോ കക്കടച്ഛാദി-വികാരം നേത്ഥ വട്ടതി.

൨൬൪. കോണസുത്താ ച പീളകാ, ദുവിഞ്ഞേയ്യാവ കപ്പരേ;

ഗന്ധം തേലം വ ലാഖം വാ, രജനേ ന ച പക്ഖിപേ.

൨൬൫. രത്തം സങ്ഖേന മണിനാ, ഘട്ടേയ്യഞ്ഞേന വാ ന ച;

ഘംസേയ്യ ദോണിയം കത്വാ, പഹാരേ ന ച മുട്ഠിനാ.

൨൬൬. കണ്ണകോണകസുത്താനി, രത്തേ ഛിന്ദേയ്യ ചീവരേ;

ലേഖാ ന വട്ടതീ ധമ്മ-കരണേ ഛത്തവട്ടിയം.

൨൬൭. ലേഖം ഠപേത്വാ മണികാ, പീളകാ കുഞ്ചികായ ച;

പിപ്ഫലേ ച പരിച്ഛേദ-ലേഖാ ദണ്ഡമ്ഹി വട്ടതി.

൨൬൮. മാലാദ്യരണിയം പത്ത-മണ്ഡലേ ഭിത്തികമ്മ ച;

ഹേട്ഠാ ലേഖാദ്വയം ഉദ്ധം, അഹിച്ഛത്തകസാദിസം.

൨൬൯. ഹിത്വാ കത്തരയട്ഠിമ്ഹി, സൂചിസണ്ഡാസകേപി ച;

യം കിഞ്ചി ഗിരികൂടാദി-വണ്ണമട്ഠം ന വട്ടതി.

൨൭൦. ബിമ്ബോഹനേ ഭിസിമഞ്ച-പീഠാദിസയനാസനേ;

സമ്മുഞ്ജനിമ്ഹി സങ്കാര-ഛഡ്ഡനേ രങ്ഗഭാജനേ.

൨൭൧. പാനീയഭാജനേ പാദ-പീഠേ കഥലികായ ച;

പത്താധാരപിധാനേസു, താലവണ്ടേ ച ബീജനേ;

യം കിഞ്ചി മാലാകമ്മാദി-വണ്ണമട്ഠമവാരിതം.

൨൭൨. സേനാസനേ പന ദ്വാരകവാടാദിപ്പഭേദനേ;

സോവണ്ണമയനുഞ്ഞാതം, വണ്ണമട്ഠമ്ഹി കാ കഥാ.

൨൭൩. വിസാണനാളിലാബ്വാദിപ്പഭേദേ തേലഭാജനേ;

പുമിത്ഥിരൂപരഹിതം, വണ്ണമട്ഠമവാരിതന്തി.