൩൩. കായബന്ധനനിദ്ദേസോ

കായബന്ധനന്തി –

൨൩൫. അകായബന്ധനോ ഗാമം, ദുക്കടം പവിസേയ്യ ചേ;

ബന്ധേയ്യ യത്ഥ സരതി, തത്ഥേവാസതിയാ ഗതോ.

൨൩൬. പട്ടികാ സൂകരന്തന്തി, ദുവിധം കായബന്ധനം;

ദുസ്സപട്ടോ ച രജ്ജു ച, ഏകാ തദനുലോമികാ.

൨൩൭. മച്ഛകണ്ടകഖജ്ജൂരീ-പത്താ മട്ഠാ ച പട്ടികാ;

ലബ്ഭാ ദസാ ചതസ്സോപി, അന്തേ ദിഗുണസുത്തകം.

൨൩൮. മാലാദിം കക്കടച്ഛാദിം, ദസ്സേത്വാ ഗുണസുത്തക;

കോട്ടിതാ കുഞ്ജരച്ഛാദിം, പട്ടികാ ന ച കപ്പതി.

൨൩൯. ഘടകം മകരമുഖാദിം, ന കപ്പന്തി ദസാമുഖേ;

ഉഭന്തേ ഘടകാ ലേഖാ, വിധേ അഞ്ഞഞ്ച ചിത്തകം.

൨൪൦. ദേഡ്ഡുഭകഞ്ച മുരജം, മദ്ദവീണം കലാബുകം;

ന കപ്പന്തി ദസാസു ദ്വേ, മജ്ഝിമായേവ കപ്പരേ.

൨൪൧. വേളുദന്തവിസാണട്ഠികട്ഠലാഖാഫലാമയാ;

സങ്ഖനാഭിമയാ സുത്തനളലോഹമയാപി ച;

വിധാ കപ്പന്തി കപ്പിയാ, ഗണ്ഠിയോ ചാപി തമ്മയാതി.

പഠമഭാണവാരം നിട്ഠിതം.