൧൩. സമണകപ്പനിദ്ദേസോ

സമണകപ്പാതി –

൧൨൫. ഭൂതഗാമസമാരമ്ഭേ, പാചിത്തി കതകപ്പിയം;

നഖേന വാഗ്ഗിസത്ഥേഹി, ഭവേ സമണകപ്പിയം.

൧൨൬. സ മൂലഖന്ധബീജഗ്ഗ-ഫളുബീജപ്പഭാവിതോ;

ആരമ്ഭേ ദുക്കടം ബീജം, ഭൂതഗാമവിയോജിതം.

൧൨൭. നിബ്ബട്ടബീജം നോബീജ-മകതഞ്ചാപി കപ്പതി;

കടാഹബദ്ധബീജാനി, ബഹിദ്ധാ വാപി കാരയേ.

൧൨൮. ഏകാബദ്ധേസു ബീജേസു, ഭാജനേ വാപി ഭൂമിയം;

കതേ ച കപ്പിയേകസ്മിം, സബ്ബേസ്വേവ കതം ഭവേ.

൧൨൯. നിക്ഖിത്തേ കപ്പിയം കത്വാ, മൂലപണ്ണാനി ജായരും;

കപ്പിയം പുന കാരേയ്യ, ഭൂതഗാമോ ഹി സോ തദാ.

൧൩൦. സപണ്ണോ വാ അപണ്ണോ വാ, സേവാലോദകസമ്ഭവോ;

ചേതിയാദീസു സേവാലോ, നിബ്ബട്ടദ്വത്തിപത്തകോ;

ഭൂതഗാമോവ ബീജമ്പി, മൂലപണ്ണേ വിനിഗ്ഗതേ.

൧൩൧. ഘടാദിപിട്ഠേ സേവാലോ, മകുളം അഹിഛത്തകം;

ദുക്കടസ്സേവ വത്ഥൂനി, ഫുല്ലമബ്യവഹാരികം.

൧൩൨. ലാഖാനിയ്യാസഛത്താനി, അല്ലരുക്ഖേ വികോപിയ;

ഗണ്ഹതോ തത്ഥ പാചിത്തി, ഛിന്ദതോ വാപി അക്ഖരം.

൧൩൩. പീളേതും നാളികേരാദിം, ദാരുമക്കടകാദിനാ;

ഛിന്ദിതും ഗണ്ഠികം കാതും, തിണാദിം ന ച കപ്പതി.

൧൩൪. ഭൂതഗാമം വ ബീജം വാ, ഛിന്ദ ഭിന്ദോചിനാഹി വാ;

ഫാലേഹി വിജ്ഝ പച വാ, നിയമേത്വാ ന ഭാസയേ.

൧൩൫. ഇമം കരോഹി കപ്പിയം, ഇമം ഗണ്ഹേദമാഹര;

ഇമം ദേഹി ഇമം സോധേഹേവം വട്ടതി ഭാസിതുന്തി.