പാടിദേസനീയകണ്ഡം

൧. പഠമപാടിദേസനീയസിക്ഖാപദവണ്ണനാ

യാമകാലികാദീസു ആഹാരത്ഥായ ഏവ ദുക്കടം. തമ്പി ആമിസേന അസമ്ഭിന്നരസേ, സമ്ഭിന്നേ പന ഏകരസേ പാടിദേസനീയമേവ.

പഠമപാടിദേസനീയസിക്ഖാപദവണ്ണനാ നിട്ഠിതാ.

൨. ദുതിയപാടിദേസനീയസിക്ഖാപദവണ്ണനാ

‘‘സമുട്ഠാനാദീനി കഥിനസദിസാനി, ഇദം പന കിരിയാകിരിയ’’ന്തി പാഠോ.

ദുതിയപാടിദേസനീയസിക്ഖാപദവണ്ണനാ നിട്ഠിതാ.

൪. ചതുത്ഥപാടിദേസനീയസിക്ഖാപദവണ്ണനാ

ആരാമേ വാ ആരാമൂപചാരേ വാ പടിഗ്ഗഹേത്വാ അജ്ഝോഹരന്തസ്സാതി ആരാമേ വാ ആരാമൂപചാരേ വാ പടിഗ്ഗഹേത്വാ ആരാമേ വാ ആരാമൂപചാരേ വാ അജ്ഝോഹരന്തസ്സാതി അത്ഥോ.

ബഹാരാമേ പടിഗ്ഗഹിതം അജ്ഝാരാമേ ഭുഞ്ജന്തസ്സ അനാപത്തി. അങ്ഗേസു ച ‘‘അജ്ഝാരാമേ വാ ആരാമൂപചാരേ വാ പടിഗ്ഗഹണ’’ന്തി ഗഹേതബ്ബം. അജ്ഝാരാമേ ഹി ദസ്സിതേ ആരാമൂപചാരം ദസ്സിതമേവാതി. ‘‘സമുട്ഠാനാദീനി കഥിനസദിസാനി, ഇദം പന കിരിയാകിരിയ’’ന്തി പാഠോ.

ചതുത്ഥപാടിദേസനീയസിക്ഖാപദവണ്ണനാ നിട്ഠിതാ.

പാടിദേസനീയവണ്ണനാ നിട്ഠിതാ.