൪. പുരാണചീവരസിക്ഖാപദവണ്ണനാ

‘‘സാകിയാനിയോ വിയ സുദ്ധഭിക്ഖുസങ്ഘേ വാ’’തി ഇദം ‘‘ഭിക്ഖുനീ നാമ ഉഭതോസങ്ഘേ ഉപസമ്പന്നാ’’തി (പാരാ. ൫൦൫) ഇമിനാ വിരുജ്ഝതീതി ചേ? ന, അധിപ്പായാജാനനതോ. ഭിക്ഖൂനം സന്തികേ ഉപസമ്പദായ പടിക്ഖിത്തത്താ തദനുപ്പസങ്ഗഭയാ ഏവം വുത്തന്തി വേദിതബ്ബം.

ഏകേന വത്ഥുനാതി യേന കേനചി പഠമേന. അവുത്താ വാ ധോവതീതി അവുത്താ ധോവതി, രജതി ആകോടേതീതി അത്ഥോ. ‘‘‘അവുത്താ’തി വചനതോ അവാദാപേത്വാ ധോവനാദീസു അനാപത്തീ’’തി ലിഖിതം. ഇധ ചീവരം നാമ നിവാസനപാരുപനൂപഗമേവ. യദി ഏവം ‘‘നിവാസനപാരുപനൂപഗമേവ വത്തബ്ബ’’ന്തി ചേ? തം ന വത്തബ്ബം ‘‘പുരാണചീവര’’ന്തി ഇമിനാവ സിദ്ധത്താ. വുത്തഞ്ഹേതം ‘‘പുരാണചീവരം നാമ സകിം നിവത്ഥമ്പി സകിം പാരുതമ്പീ’’തി (പാരാ. ൫൦൫).

പുരാണചീവരസിക്ഖാപദവണ്ണനാ നിട്ഠിതാ.