പാരാജികകണ്ഡം

അഭിലാപമത്തമേവാതി ഏത്ഥ ദഹരവസേന ‘‘ഭന്തേ’’തി ച വുഡ്ഢവസേന ‘‘ആവുസോ’’തി ച തത്ഥ ദുവിധോ അഭിലാപോ, ഇധ പന വുഡ്ഢദഹരാനം ‘‘അയ്യാ’’തി ഏകമേവ.

കായസംസഗ്ഗേ വുത്തനയേനാതി ഏത്ഥ തബ്ബഹുലനയേന കിരിയസമുട്ഠാനതാ വുത്താ. ‘‘കായസംസഗ്ഗം സമാപജ്ജേയ്യാ’’തി അവത്വാ പന ‘‘സാദിയേയ്യാ’’തി വുത്തത്താ അകിരിയതോപി സമുട്ഠാതീതി വേദിതബ്ബം. യഥാ ചേത്ഥ, ഏവം ഹേട്ഠാ ‘‘മനുസ്സിത്ഥിയാ തയോ മഗ്ഗേ മേഥുനം ധമ്മം പടിസേവന്തസ്സ ആപത്തി പാരാജികസ്സാ’’തിആദിനാ (പാരാ. ൫൬) നയേന കിരിയസമുട്ഠാനതം വത്വാ തദനന്തരം ‘‘ഭിക്ഖുപച്ചത്ഥികാ മനുസ്സിത്ഥിം ഭിക്ഖുസ്സ സന്തികം ആനേത്വാ വച്ചമഗ്ഗേന അങ്ഗജാതം അഭിനിസീദേന്തി, സോ ചേ പവേസനം സാദിയതീ’’തിആദിനാ (പാരാ. ൫൮) നയേന അകിരിയസമുട്ഠാനസ്സപി വുത്തത്താ പഠമപാരാജികായപി തബ്ബഹുലനയേനേവ കിരിയസമുട്ഠാനതാ വേദിതബ്ബാ. ന ഹി പവേസനസാദിയനാദിമ്ഹി കിരിയസമുട്ഠാനതാ ദിസ്സതി.

അങ്ഗജാതചലനഞ്ചേത്ഥ ന സാരതോ ദട്ഠബ്ബം ‘‘സോ ചേ പവേസനം ന സാദിയതി, പവിട്ഠം ന സാദിയതി, ഠിതം ന സാദിയതി, ഉദ്ധരണം സാദിയതി, ആപത്തി പാരാജികസ്സാ’’തി (പാരാ. ൫൮) ഏത്ഥ ഠിതനസാദിയനേ പകതിയാപി പരിപുണ്ണചലനത്താ. സാദിയനപച്ചയാ പടിസേവനചലനഞ്ചേത്ഥ ന ദിസ്സതേവാതി തബ്ബഹുലനയേനേവ കിരിയസമുട്ഠാനതാ ഗഹേതബ്ബാ.

അപിച ഭിക്ഖുനിയാപി പഠമപാരാജികേ തസ്സ സാദിയനസ്സ സരൂപേന വുത്തത്താ തദനുരൂപവസേന വിഭങ്ഗനയമനോലോകേത്വാ ‘‘കിരിയസമുട്ഠാന’’മിച്ചേവ വുത്തം. യഥാ ചേതേസു തബ്ബഹുലനയേന കിരിയസമുട്ഠാനതാ വുത്താ, തഥാ സുരാദീനം അകുസലേനേവ പാതബ്ബതാ. ഇതരഥാ ‘‘യം അകുസലേനേവ ആപജ്ജതി, അയം ലോകവജ്ജാ, സേസാ പണ്ണത്തിവജ്ജാ’’തി വുത്തേ ലോകവജ്ജപണ്ണത്തിവജ്ജാനം നിയമലക്ഖണസിദ്ധി ഹോതി, തഥാ തം അവത്വാ ‘‘യസ്സാ സചിത്തകപക്ഖേ ചിത്തം അകുസലമേവ ഹോതി, അയം ലോകവജ്ജാ, സേസാ പണ്ണത്തിവജ്ജാ’’തി (കങ്ഖാ. അട്ഠ. പഠമപാരാജികവണ്ണനാ) വുത്തേ ലോകവജ്ജവചനം നിരത്ഥകം സിയാ വത്ഥുഅജാനനപക്ഖേപി അകുസലേനേവ പാതബ്ബത്താ. യസ്മാ തത്ഥ സുരാപാനവീതിക്കമസ്സ അകുസലചിത്തുപ്പാദോ നത്ഥി, തസ്മാ ഖന്ധകട്ഠകഥായം ‘‘മജ്ജപാനേ പന ഭിക്ഖുനോ അജാനിത്വാപി ബീജതോ പട്ഠായ മജ്ജം പിവന്തസ്സ പാചിത്തിയം. സാമണേരോ ജാനിത്വാവ പിവന്തോ സീലഭേദം ആപജ്ജതി, ന അജാനിത്വാ’’തി (മഹാവ. അട്ഠ. ൧൦൮) വുത്തം, ന വുത്തം ‘‘വത്ഥുഅജാനനപക്ഖേ പാണാതിപാതാദീനം സിദ്ധികരഅകുസലചിത്തുപ്പാദസദിസേ ചിത്തുപ്പാദേ സതിപി സാമണേരോ സീലഭേദം നാപജ്ജതീ’’തി. അഭിനിവേസവചനം പാണാതിപാതാദീഹി സമാനഗതികത്താ സാമണേരാനം സുരാപാനസ്സ. ‘‘സുരാമേരയിമേ’’തി വത്ഥും ജാനിത്വാ പാതബ്ബതാദിവസേന വീതിക്കമന്തസ്സ അകുസലസ്സ അസമ്ഭവോ നത്ഥി. തേന വുത്തം ‘‘യസ്സാ സചിത്തകപക്ഖേ’’തിആദി.

കിഞ്ചേത്ഥ – യുത്തിവചനേന അരഹന്താനം അപ്പവിസനതോ സചിത്തകാചിത്തകപക്ഖേസു അകുസലനിയമോതി ചേ? ന, ധമ്മതാവസേന സേക്ഖാനമ്പി അപ്പവിസനതോ. അചിത്തകപക്ഖേ അകുസലനിയമാഭാവദസ്സനത്ഥം സുപന്തസ്സ മുഖേ പക്ഖിത്തജലബിന്ദുമിവ സുരാബിന്ദുആദയോ ഉദാഹരിതബ്ബാ. തബ്ബഹുലനയേന ഹി അത്ഥേ ഗഹിതേ പുബ്ബേനാപരം അട്ഠകഥായ സമേതി സദ്ധിം പാളിയാ ചാതി. ആചരിയാപി സുരാപാനേ അകുസലനിയമാഭാവമേവ വദന്തി. ഏകച്ചേ പന കിരിയസമുട്ഠാനതാ പനസ്സ തബ്ബഹുലനയമേവ, ന പഠമപാരാജികേ. കഥം? കായസംസഗ്ഗസിക്ഖാപദം പഠമപാരാജികസമുട്ഠാനം. ഏത്ഥ ഭിക്ഖുസ്സ ച ഭിക്ഖുനിയാ ച കായസംസഗ്ഗഭാവേ സതി ഭിക്ഖുനീ കായങ്ഗം അചോപയമാനാപി ചിത്തേനേവ അധിവാസേതി, ആപജ്ജതി, ന ഏവം ഭിക്ഖു. ഭിക്ഖു പന ചോപയമാനോവ ആപജ്ജതി, ഏവമേവ പഠമപാരാജികേപി ചോപനേ സതി ഏവ ആപജ്ജതി, നാസതി. പവേസനം സാദിയതീതി ഏത്ഥ പവേസനസാദിയനം നാമ സേവനചിത്തുപ്പാദനം, മഗ്ഗേന വാ മഗ്ഗപ്പടിപന്നമ്പി ഇച്ഛന്തി. തസ്സാപി കായചലനം ഏകന്തം അത്ഥി ഏവ. ഏവം സന്തേപി വീമംസിത്വാ ഗഹേതബ്ബന്തി വദന്തീതി ലിഖിതം

പാരാജികവണ്ണനാ നിട്ഠിതാ.