കങ്ഖാവിതരണീ-അട്ഠകഥാ

ഗന്ഥാരമ്ഭകഥാ

ബുദ്ധം ധമ്മഞ്ച സങ്ഘഞ്ച, വിപ്പസന്നേന ചേതസാ;

വന്ദിത്വാ വന്ദനാമാന, പൂജാസക്കാരഭാജനം.

ഥേരവംസപ്പദീപാനം, ഥിരാനം വിനയക്കമേ;

പുബ്ബാചരിയസീഹാനം, നമോ കത്വാ കതഞ്ജലീ.

പാമോക്ഖം അനവജ്ജാനം, ധമ്മാനം യം മഹേസിനാ;

മുഖം മോക്ഖപ്പവേസായ, പാതിമോക്ഖം പകാസിതം.

സൂരതേന നിവാതേന, സുചിസല്ലേഖവുത്തിനാ;

വിനയാചാരയുത്തേന, സോണത്ഥേരേന യാചിതോ.

തത്ഥ സഞ്ജാതകങ്ഖാനം, ഭിക്ഖൂനം തസ്സ വണ്ണനം;

കങ്ഖാവിതരണത്ഥായ, പരിപുണ്ണവിനിച്ഛയം.

മഹാവിഹാരവാസീനം, വാചനാമഗ്ഗനിസ്സിതം;

വത്തയിസ്സാമി നാമേന, കങ്ഖാവിതരണിം സുഭന്തി.