ഭിക്ഖുനീപാതിമോക്ഖപാളി

പുബ്ബകരണം-൪

സമ്മജ്ജനീ പദീപോ ച, ഉദകം ആസനേന ച;

ഉപോസഥസ്സ ഏതാനി, ‘‘പുബ്ബകരണ’’ന്തി വുച്ചതി.

പുബ്ബകിച്ചം-൫

ഛന്ദ, പാരിസുദ്ധി, ഉതുക്ഖാനം, ഭിക്ഖുനിഗണനാ ച ഓവാദോ;

ഉപോസഥസ്സ ഏതാനി, ‘‘പുബ്ബകിച്ച’’ന്തി വുച്ചതി.

പത്തകല്ലഅങ്ഗാ-൪

ഉപോസഥോ, യാവതികാ ച ഭിക്ഖുനീ കമ്മപ്പത്താ;

സഭാഗാപത്തിയോ ച ന വിജ്ജന്തി;

വജ്ജനീയാ ച പുഗ്ഗലാ തസ്മിം ന ഹോന്തി, ‘‘പത്തകല്ല’’ന്തി വുച്ചതി.

പുബ്ബകരണപുബ്ബകിച്ചാനി സമാപേത്വാ ദേസിതാപത്തികസ്സ സമഗ്ഗസ്സ ഭിക്ഖുനിസങ്ഘസ്സ അനുമതിയാ പാതിമോക്ഖം ഉദ്ദിസിതും ആരാധനം കരോമ.

നിദാനുദ്ദേസോ

സുണാതു മേ അയ്യേ സങ്ഘോ, അജ്ജുപോസഥോ പന്നരസോ, യദി സങ്ഘസ്സ പത്തകല്ലം, സങ്ഘോ ഉപോസഥം കരേയ്യ, പാതിമോക്ഖം ഉദ്ദിസേയ്യ.

കിം സങ്ഘസ്സ പുബ്ബകിച്ചം? പാരിസുദ്ധിം അയ്യായോ ആരോചേഥ, പാതിമോക്ഖം ഉദ്ദിസിസ്സാമി, തം സബ്ബാവ സന്താ സാധുകം സുണോമ മനസി കരോമ. യസ്സാ സിയാ ആപത്തി, സാ ആവികരേയ്യ, അസന്തിയാ ആപത്തിയാ തുണ്ഹീ ഭവിതബ്ബം, തുണ്ഹീഭാവേന ഖോ പനായ്യായോ, ‘‘പരിസുദ്ധാ’’തി വേദിസ്സാമി. യഥാ ഖോ പന പച്ചേകപുട്ഠസ്സാ വേയ്യാകരണം ഹോതി, ഏവമേവം ഏവരൂപായ പരിസായ യാവതതിയം അനുസാവിതം ഹോതി. യാ പന ഭിക്ഖുനീ യാവതതിയം അനുസാവിയമാനേ സരമാനാ സന്തിം ആപത്തിം നാവികരേയ്യ, സമ്പജാനമുസാവാദസ്സാ ഹോതി. സമ്പജാനമുസാവാദോ ഖോ പനായ്യായോ, അന്തരായികോ ധമ്മോ വുത്തോ ഭഗവതാ, തസ്മാ സരമാനായ ഭിക്ഖുനിയാ ആപന്നായ വിസുദ്ധാപേക്ഖായ സന്തീ ആപത്തി ആവികാതബ്ബാ, ആവികതാ ഹിസ്സാ ഫാസു ഹോതി.

ഉദ്ദിട്ഠം ഖോ, അയ്യായോ, നിദാനം. തത്ഥായ്യായോ പുച്ഛാമി, കച്ചിത്ഥ പരിസുദ്ധാ, ദുതിയമ്പി പുച്ഛാമി, കച്ചിത്ഥ പരിസുദ്ധാ, തതിയമ്പി പുച്ഛാമി, കച്ചിത്ഥ പരിസുദ്ധാ, പരിസുദ്ധേത്ഥായ്യായോ, തസ്മാ തുണ്ഹീ, ഏവമേതം ധാരയാമീതി.

നിദാനം നിട്ഠിതം.

പാരാജികുദ്ദേസോ

തത്രിമേ അട്ഠ പാരാജികാ ധമ്മാ ഉദ്ദേസം ആഗച്ഛന്തി.

മേഥുനധമ്മസിക്ഖാപദം

൧. യാ പന ഭിക്ഖുനീ ഛന്ദസോ മേഥുനം ധമ്മം പടിസേവേയ്യ, അന്തമസോ തിരച്ഛാനഗതേനപി, പാരാജികാ ഹോതി അസംവാസാ.

അദിന്നാദാനസിക്ഖാപദം

൨. യാ പന ഭിക്ഖുനീ ഗാമാ വാ അരഞ്ഞാ വാ അദിന്നം ഥേയ്യസങ്ഖാതം ആദിയേയ്യ, യഥാരൂപേ അദിന്നാദാനേ രാജാനോ ചോരം ഗഹേത്വാ ഹനേയ്യും വാ ബന്ധേയ്യും വാ പബ്ബാജേയ്യും വാ ചോരാസി ബാലാസി മൂള്ഹാസി ഥേനാസീതി, തഥാരൂപം ഭിക്ഖുനീ അദിന്നം ആദിയമാനാ അയമ്പി പാരാജികാ ഹോതി അസംവാസാ.

മനുസ്സവിഗ്ഗഹസിക്ഖാപദം

൩. യാ പന ഭിക്ഖുനീ സഞ്ചിച്ച മനുസ്സവിഗ്ഗഹം ജീവിതാ വോരോപേയ്യ, സത്ഥഹാരകം വാസ്സ പരിയേസേയ്യ, മരണവണ്ണം വാ സംവണ്ണേയ്യ, മരണായ വാ സമാദപേയ്യ ‘‘അമ്ഭോ പുരിസ, കിം തുയ്ഹിമിനാ പാപകേന ദുജ്ജീവിതേന, മതം തേ ജീവിതാ സേയ്യോ’’തി, ഇതി ചിത്തമനാ ചിത്തസങ്കപ്പാ അനേകപരിയായേന മരണവണ്ണം വാ സംവണ്ണേയ്യ, മരണായ വാ സമാദപേയ്യ, അയമ്പി പാരാജികാ ഹോതി അസംവാസാ.

ഉത്തരിമനുസ്സധമ്മസിക്ഖാപദം

൪. യാ പന ഭിക്ഖുനീ അനഭിജാനം ഉത്തരിമനുസ്സധമ്മം അത്തുപനായികം അലമരിയഞാണദസ്സനം സമുദാചരേയ്യ ‘‘ഇതി ജാനാമി, ഇതി പസ്സാമീ’’തി, തതോ അപരേന സമയേന സമനുഗ്ഗാഹീയമാനാ വാ അസമനുഗ്ഗാഹീയമാനാ വാ ആപന്നാ വിസുദ്ധാപേക്ഖാ ഏവം വദേയ്യ ‘‘അജാനമേവം, അയ്യേ, അവചം ജാനാമി, അപസ്സം പസ്സാമി, തുച്ഛം മുസാ വിലപി’’ന്തി, അഞ്ഞത്ര അധിമാനാ, അയമ്പി പാരാജികാ ഹോതി അസംവാസാ.

ഉബ്ഭജാണുമണ്ഡലികാസിക്ഖാപദം

൫. യാ പന ഭിക്ഖുനീ അവസ്സുതാ അവസ്സുതസ്സ പുരിസപുഗ്ഗലസ്സ, അധക്ഖകം ഉബ്ഭജാണുമണ്ഡലം ആമസനം വാ പരാമസനം വാ ഗഹണം വാ ഛുപനം വാ പടിപീളനം വാ സാദിയേയ്യ, അയമ്പി പാരാജികാ ഹോതി അസംവാസാ ഉബ്ഭജാണുമണ്ഡലികാ.

വജ്ജപ്പടിച്ഛാദികാസിക്ഖാപദം

൬. യാ പന ഭിക്ഖുനീ ജാനം പാരാജികം ധമ്മം അജ്ഝാപന്നം ഭിക്ഖുനിം നേവത്തനാ പടിചോദേയ്യ, ന ഗണസ്സ ആരോചേയ്യ, യദാ ച സാ ഠിതാ വാ അസ്സ ചുതാ വാ നാസിതാ വാ അവസ്സടാ വാ, സാ പച്ഛാ ഏവം വദേയ്യ ‘‘പുബ്ബേവാഹം, അയ്യേ, അഞ്ഞാസിം ഏതം ഭിക്ഖുനിം ‘ഏവരൂപാ ച ഏവരൂപാ ച സാ ഭഗിനീ’തി, നോ ച ഖോ അത്തനാ പടിചോദേസ്സം, ന ഗണസ്സ ആരോചേസ്സ’’ന്തി, അയമ്പി പാരാജികാ ഹോതി അസംവാസാ വജ്ജപ്പടിച്ഛാദികാ.

ഉക്ഖിത്താനുവത്തികാസിക്ഖാപദം

൭. യാ പന ഭിക്ഖുനീ സമഗ്ഗേന സങ്ഘേന ഉക്ഖിത്തം ഭിക്ഖും ധമ്മേന വിനയേന സത്ഥുസാസനേന അനാദരം അപ്പടികാരം അകതസഹായം തമനുവത്തേയ്യ, സാ ഭിക്ഖുനീ ഭിക്ഖുനീഹി ഏവമസ്സ വചനീയാ ‘‘ഏസോ ഖോ, അയ്യേ, ഭിക്ഖു സമഗ്ഗേന സങ്ഘേന ഉക്ഖിത്തോ, ധമ്മേന വിനയേന സത്ഥുസാസനേന അനാദരോ അപ്പടികാരോ അകതസഹായോ, മായ്യേ, ഏതം ഭിക്ഖും അനുവത്തീ’’തി, ഏവഞ്ച സാ ഭിക്ഖുനീ ഭിക്ഖുനീഹി വുച്ചമാനാ തഥേവ പഗ്ഗണ്ഹേയ്യ, സാ ഭിക്ഖുനീ ഭിക്ഖുനീഹി യാവതതിയം സമനുഭാസിതബ്ബാ തസ്സ പടിനിസ്സഗ്ഗായ, യാവതതിയം ചേ സമനുഭാസിയമാനാ തം പടിനിസ്സജ്ജേയ്യ, ഇച്ചേതം കുസലം, നോ ചേ പടിനിസ്സജ്ജേയ്യ, അയമ്പി പാരാജികാ ഹോതി അസംവാസാ ഉക്ഖിത്താനുവത്തികാ.

അട്ഠവത്ഥുകാസിക്ഖാപദം

൮. യാ പന ഭിക്ഖുനീ അവസ്സുതാ അവസ്സുതസ്സ പുരിസപുഗ്ഗലസ്സ ഹത്ഥഗ്ഗഹണം വാ സാദിയേയ്യ, സങ്ഘാടികണ്ണഗ്ഗഹണം വാ സാദിയേയ്യ, സന്തിട്ഠേയ്യ വാ, സല്ലപേയ്യ വാ, സങ്കേതം വാ ഗച്ഛേയ്യ, പുരിസസ്സ വാ അബ്ഭാഗമനം സാദിയേയ്യ, ഛന്നം വാ അനുപവിസേയ്യ, കായം വാ തദത്ഥായ ഉപസംഹരേയ്യ ഏതസ്സ അസദ്ധമ്മസ്സ പടിസേവനത്ഥായ, അയമ്പി പാരാജികാ ഹോതി അസംവാസാ അട്ഠവത്ഥുകാ.

ഉദ്ദിട്ഠാ ഖോ, അയ്യായോ, അട്ഠ പാരാജികാ ധമ്മാ. യേസം ഭിക്ഖുനീ അഞ്ഞതരം വാ അഞ്ഞതരം വാ ആപജ്ജിത്വാ ന ലഭതി ഭിക്ഖുനീഹി സദ്ധിം സംവാസം യഥാ പുരേ, തഥാ പച്ഛാ, പാരാജികാ ഹോതി അസംവാസാ. തത്ഥായ്യായോ, പുച്ഛാമി, കച്ചിത്ഥ പരിസുദ്ധാ, ദുതിയമ്പി പുച്ഛാമി, കച്ചിത്ഥ പരിസുദ്ധാ, തതിയമ്പി പുച്ഛാമി, കച്ചിത്ഥ പരിസുദ്ധാ, പരിസുദ്ധേത്ഥായ്യായോ, തസ്മാ തുണ്ഹീ, ഏവമേതം ധാരയാമീതി.

പാരാജികം നിട്ഠിതം.

സങ്ഘാദിസേസുദ്ദേസോ

ഇമേ ഖോ പനായ്യായോ സത്തരസ സങ്ഘാദിസേസാ

ധമ്മാ ഉദ്ദേസം ആഗച്ഛന്തി.

ഉസ്സയവാദികാസിക്ഖാപദം

൧. യാ പന ഭിക്ഖുനീ ഉസ്സയവാദികാ വിഹരേയ്യ ഗഹപതിനാ വാ ഗഹപതിപുത്തേന വാ ദാസേന വാ കമ്മകാരേന വാ അന്തമസോ സമണപരിബ്ബാജകേനാപി, അയമ്പി ഭിക്ഖുനീ പഠമാപത്തികം ധമ്മം ആപന്നാ നിസ്സാരണീയം സങ്ഘാദിസേസം.

ചോരീവുട്ഠാപികാസിക്ഖാപദം

൨. യാ പന ഭിക്ഖുനീ ജാനം ചോരിം വജ്ഝം വിദിതം അനപലോകേത്വാ രാജാനം വാ സങ്ഘം വാ ഗണം വാ പൂഗം വാ സേണിം വാ, അഞ്ഞത്ര കപ്പാ വുട്ഠാപേയ്യ, അയമ്പി ഭിക്ഖുനീ പഠമാപത്തികം ധമ്മം ആപന്നാ നിസ്സാരണീയം സങ്ഘാദിസേസം.

ഏകഗാമന്തരഗമനസിക്ഖാപദം

൩. യാ പന ഭിക്ഖുനീ ഏകാ വാ ഗാമന്തരം ഗച്ഛേയ്യ, ഏകാ വാ നദീപാരം ഗച്ഛേയ്യ, ഏകാ വാ രത്തിം വിപ്പവസേയ്യ, ഏകാ വാ ഗണമ്ഹാ ഓഹിയേയ്യ, അയമ്പി ഭിക്ഖുനീ പഠമാപത്തികം ധമ്മം ആപന്നാ നിസ്സാരണീയം സങ്ഘാദിസേസം.

ഉക്ഖിത്തകഓസാരണസിക്ഖാപദം

൪. യാ പന ഭിക്ഖുനീ സമഗ്ഗേന സങ്ഘേന ഉക്ഖിത്തം ഭിക്ഖുനിം ധമ്മേന വിനയേന സത്ഥുസാസനേന അനപലോകേത്വാ കാരകസങ്ഘം, അനഞ്ഞായ ഗണസ്സ ഛന്ദം ഓസാരേയ്യ, അയമ്പി ഭിക്ഖുനീ പഠമാപത്തികം ധമ്മം ആപന്നാ നിസ്സാരണീയം സങ്ഘാദിസേസം.

ഭോജനപടിഗ്ഗഹണപഠമസിക്ഖാപദം

൫. യാ പന ഭിക്ഖുനീ അവസ്സുതാ അവസ്സുതസ്സ പുരിസപുഗ്ഗലസ്സ ഹത്ഥതോ ഖാദനീയം വാ, ഭോജനീയം വാ സഹത്ഥാ പടിഗ്ഗഹേത്വാ ഖാദേയ്യ വാ ഭുഞ്ജേയ്യ വാ, അയമ്പി ഭിക്ഖുനീ പഠമാപത്തികം ധമ്മം ആപന്നാ നിസ്സാരണീയം സങ്ഘാദിസേസം.

ഭോജനപടിഗ്ഗഹണദുതിയസിക്ഖാപദം

൬. യാ പന ഭിക്ഖുനീ ഏവം വദേയ്യ ‘‘കിം തേ, അയ്യേ, ഏസോ പുരിസപുഗ്ഗലോ കരിസ്സതി അവസ്സുതോ വാ അനവസ്സുതോ വാ, യതോ ത്വം അനവസ്സുതാ, ഇങ്ഘ, അയ്യേ, യം തേ ഏസോ പുരിസപുഗ്ഗലോ ദേതി ഖാദനീയം വാ ഭോജനീയം വാ, തം ത്വം സഹത്ഥാ പടിഗ്ഗഹേത്വാ ഖാദ വാ ഭുഞ്ജ വാ’’തി, അയമ്പി ഭിക്ഖുനീ പഠമാപത്തികം ധമ്മം ആപന്നാ നിസ്സാരണീയം സങ്ഘാദിസേസം.

സഞ്ചരിത്തസിക്ഖാപദം

൭. യാ പന ഭിക്ഖുനീ സഞ്ചരിത്തം സമാപജ്ജേയ്യ ഇത്ഥിയാ വാ പുരിസമതിം, പുരിസസ്സ വാ ഇത്ഥിമതിം, ജായത്തനേ വാ ജാരത്തനേ വാ അന്തമസോ തങ്ഖണികായപി, അയമ്പി ഭിക്ഖുനീ പഠമാപത്തികം ധമ്മം ആപന്നാ നിസ്സാരണീയം സങ്ഘാദിസേസം.

ദുട്ഠദോസസിക്ഖാപദം

൮. യാ പന ഭിക്ഖുനീ ഭിക്ഖുനിം ദുട്ഠാ ദോസാ അപ്പതീതാ അമൂലകേന പാരാജികേന ധമ്മേന അനുദ്ധംസേയ്യ ‘‘അപ്പേവ നാമ നം ഇമമ്ഹാ ബ്രഹ്മചരിയാ ചാവേയ്യ’’ന്തി, തതോ അപരേന സമയേന സമനുഗ്ഗാഹീയമാനാ വാ അസ മനുഗ്ഗാഹീയമാനാ വാ അമൂലകഞ്ചേവ തം അധികരണം ഹോതി, ഭിക്ഖുനീ ച ദോസം പതിട്ഠാതി, അയമ്പി ഭിക്ഖുനീ പഠമാപത്തികം ധമ്മം ആപന്നാ നിസ്സാരണീയം സങ്ഘാദിസേസം.

അഞ്ഞഭാഗിയസിക്ഖാപദം

൯. യാ പന ഭിക്ഖുനീ ഭിക്ഖുനിം ദുട്ഠാ ദോസാ അപ്പതീതാ അഞ്ഞഭാഗിയസ്സ അധികരണസ്സ കിഞ്ചിദേസം ലേസമത്തം ഉപാദായ പാരാജികേന ധമ്മേന അനുദ്ധംസേയ്യ ‘‘അപ്പേവ നാമ നം ഇമമ്ഹാ ബ്രഹ്മചരിയാ ചാവേയ്യ’’ന്തി, തതോ അപരേന സമയേന സമനുഗ്ഗാഹീയമാനാ വാ അസമനുഗ്ഗാഹീയമാനാ വാ അഞ്ഞഭാഗിയഞ്ചേവ തം അധികരണം ഹോതി. കോചിദേസോ ലേസമത്തോ ഉപാദിന്നോ, ഭിക്ഖുനീ ച ദോസം പതിട്ഠാതി, അയമ്പി ഭിക്ഖുനീ പഠമാപത്തികം ധമ്മം ആപന്നാ നിസ്സാരണീയം സങ്ഘാദിസേസം.

സിക്ഖംപച്ചാചിക്ഖണസിക്ഖാപദം

൧൦. യാ പന ഭിക്ഖുനീ കുപിതാ അനത്തമനാ ഏവം വദേയ്യ ‘‘ബുദ്ധം പച്ചാചിക്ഖാമി ധമ്മം പച്ചാചിക്ഖാമി, സങ്ഘം പച്ചാചിക്ഖാമി, സിക്ഖം പച്ചാചിക്ഖാമി, കിന്നുമാവ സമണിയോ യാ സമണിയോ സക്യധീതരോ, സന്തഞ്ഞാപി സമണിയോ ലജ്ജിനിയോ കുക്കുച്ചികാ സിക്ഖാകാമാ, താസാഹം സന്തികേ ബ്രഹ്മചരിയം ചരിസ്സാമീ’’തി. സാ ഭിക്ഖുനീ ഭിക്ഖുനീഹി ഏവമസ്സ വചനീയാ ‘‘മായ്യേ കുപിതാ അനത്തമനാ ഏവം അവച ‘ബുദ്ധം പച്ചാചിക്ഖാമി, ധമ്മം പച്ചാചിക്ഖാമി, സങ്ഘം പച്ചാചിക്ഖാമി, സിക്ഖം പച്ചാചിക്ഖാമി, കിന്നുമാവ സമണിയോ യാ സമണിയോ സക്യധീതരോ, സന്തഞ്ഞാപി സമണിയോ ലജ്ജിനിയോ കുക്കുച്ചികാ സിക്ഖാകാമാ, താസാഹം സന്തികേ ബ്രഹ്മചരിയം ചരിസ്സാമീ’തി, അഭിരമായ്യേ, സ്വാക്ഖാതോ ധമ്മോ, ചര ബ്രഹ്മചരിയം സമ്മാ ദുക്ഖസ്സ അന്തകിരിയായാ’’തി, ഏവഞ്ച സാ ഭിക്ഖുനീ ഭിക്ഖുനീഹി വുച്ചമാനാ തഥേവ പഗ്ഗണ്ഹേയ്യ, സാ ഭിക്ഖുനീ ഭിക്ഖുനീഹി യാവതതിയം സമനുഭാസിതബ്ബാ തസ്സ പടിനിസ്സഗ്ഗായ, യാവതതിയഞ്ചേ സമനുഭാസിയമാനാ തം പടിനിസ്സജ്ജേയ്യ, ഇച്ചേതം കുസലം, നോ ചേ പടിനിസ്സജ്ജേയ്യ, അയമ്പി ഭിക്ഖുനീ യാവതതിയകം ധമ്മം ആപന്നാ നിസ്സാരണീയം സങ്ഘാദിസേസം.

അധികരണകുപിതസിക്ഖാപദം

൧൧. യാ പന ഭിക്ഖുനീ കിസ്മിഞ്ചിദേവ അധികരണേ പച്ചാകതാ കുപിതാ അനത്തമനാ ഏവം വദേയ്യ ‘‘ഛന്ദഗാമിനിയോ ച ഭിക്ഖുനിയോ, ദോസഗാമിനിയോ ച ഭിക്ഖുനിയോ, മോഹഗാമിനിയോ ച ഭിക്ഖുനിയോ, ഭയഗാമിനിയോ ച ഭിക്ഖുനിയോ’’തി, സാ ഭിക്ഖുനീ ഭിക്ഖുനീഹി ഏവമസ്സ വചനീയാ ‘‘മായ്യേ, കിസ്മിഞ്ചിദേവ അധികരണേ പച്ചാകതാ കുപിതാ അനത്തമനാ ഏവം അവച ‘ഛന്ദഗാമിനിയോ ച ഭിക്ഖുനിയോ, ദോസഗാമിനിയോ ച ഭിക്ഖുനിയോ, മോഹഗാമിനിയോ ച ഭിക്ഖുനിയോ, ഭയഗാമിനിയോ ച ഭിക്ഖുനിയോ’തി, അയ്യാ ഖോ ഛന്ദാപി ഗച്ഛേയ്യ, ദോസാപി ഗച്ഛേയ്യ, മോഹാപി ഗച്ഛേയ്യ, ഭയാപി ഗച്ഛേയ്യാ’’തി. ഏവഞ്ച സാ ഭിക്ഖുനീ ഭിക്ഖുനീഹി വുച്ചമാനാ തഥേവ പഗ്ഗണ്ഹേയ്യ, സാ ഭിക്ഖുനീ ഭിക്ഖുനീഹി യാവതതിയം സമനുഭാസിതബ്ബാ തസ്സ പടിനിസ്സഗ്ഗായ, യാവതതിയഞ്ചേ സമനുഭാസിയമാനാ തം പടിനിസ്സജ്ജേയ്യ, ഇച്ചേതം കുസലം, നോ ചേ പടിനിസ്സജ്ജേയ്യ, അയമ്പി ഭിക്ഖുനീ യാവതതിയകം ധമ്മം ആപന്നാ നിസ്സാരണീയം സങ്ഘാദിസേസം.

പാപസമാചാരപഠമസിക്ഖാപദം

൧൨. ഭിക്ഖുനിയോ പനേവ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ ഭിക്ഖുനിസങ്ഘസ്സ വിഹേസികാ അഞ്ഞമഞ്ഞിസ്സാ വജ്ജപ്പടിച്ഛാദികാ, താ ഭിക്ഖുനിയോ ഭിക്ഖുനീഹി ഏവമസ്സു വചനീയാ ‘‘ഭഗിനിയോ ഖോ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ ഭിക്ഖുനിസങ്ഘസ്സ വിഹേസികാ അഞ്ഞമഞ്ഞിസ്സാ വജ്ജപ്പടിച്ഛാദികാ, വിവിച്ചഥായ്യേ, വിവേകഞ്ഞേവ ഭഗിനീനം സങ്ഘോ വണ്ണേതീ’’തി, ഏവഞ്ച താ ഭിക്ഖുനിയോ ഭിക്ഖുനീഹി വുച്ചമാനാ തഥേവ പഗ്ഗണ്ഹേയ്യും, താ ഭിക്ഖുനിയോ ഭിക്ഖുനീഹി യാവതതിയം സമനുഭാസിതബ്ബാ തസ്സ പടിനിസ്സഗ്ഗായ, യാവതതിയഞ്ചേ സമനുഭാസിയമാനാ തം പടിനിസ്സജ്ജേയ്യും, ഇച്ചേതം കുസലം, നോ ചേ പടിനിസ്സജ്ജേയ്യും, ഇമാപി ഭിക്ഖുനിയോ യാവതതിയകം ധമ്മം ആപന്നാ നിസ്സാരണീയം സങ്ഘാദിസേസം.

പാപസമാചാരദുതിയസിക്ഖാപദം

൧൩. യാ പന ഭിക്ഖുനീ ഏവം വദേയ്യ ‘‘സംസട്ഠാവ, അയ്യേ, തുമ്ഹേ വിഹരഥ, മാ തുമ്ഹേ നാനാ വിഹരിത്ഥ, സന്തി സങ്ഘേ അഞ്ഞാപി ഭിക്ഖുനിയോ ഏവാചാരാ ഏവംസദ്ദാ ഏവംസിലോകാ ഭിക്ഖുനിസങ്ഘസ്സ വിഹേസികാ അഞ്ഞമഞ്ഞിസ്സാ വജ്ജപ്പടിച്ഛാദികാ, താ സങ്ഘോ ന കിഞ്ചി ആഹ തുമ്ഹഞ്ഞേവ സങ്ഘോ ഉഞ്ഞായ പരിഭവേന അക്ഖന്തിയാ വേഭസ്സിയാ ദുബ്ബല്യാ ഏവമാഹ – ‘ഭഗിനിയോ ഖോ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ ഭിക്ഖുനിസങ്ഘസ്സ വിഹേസികാ അഞ്ഞമഞ്ഞിസ്സാ വജ്ജപ്പടിച്ഛാദികാ, വിവിച്ചഥായ്യേ, വിവേകഞ്ഞേവ ഭഗിനീനം സങ്ഘോ വണ്ണേതീ’’’തി, സാ ഭിക്ഖുനീ ഭിക്ഖുനീഹി ഏവമസ്സ വചനീയാ ‘‘മായ്യേ, ഏവം അവച, സംസട്ഠാവ അയ്യേ തുമ്ഹേ വിഹരഥ, മാ തുമ്ഹേ നാനാ വിഹരിത്ഥ, സന്തി സങ്ഘേ അഞ്ഞാപി ഭിക്ഖുനിയോ ഏവാചാരാ ഏവംസദ്ദാ ഏവംസിലോകാ ഭിക്ഖുനിസങ്ഘസ്സ വിഹേസികാ അഞ്ഞമഞ്ഞിസ്സാ വജ്ജപ്പടിച്ഛാദികാ, താ സങ്ഘോ ന കിഞ്ചി ആഹ, തുമ്ഹഞ്ഞേവ സങ്ഘോ ഉഞ്ഞായ പരിഭവേന അക്ഖന്തിയാ വേഭസ്സിയാ ദുബ്ബല്യാ ഏവമാഹ – ‘ഭഗിനിയോ ഖോ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ ഭിക്ഖുനിസങ്ഘസ്സ വിഹേസികാ അഞ്ഞമഞ്ഞിസ്സാ വജ്ജപ്പടിച്ഛാദികാ, വിവിച്ചഥായ്യേ, വിവേകഞ്ഞേവ ഭഗിനീനം സങ്ഘോ വണ്ണേതീ’’’തി, ഏവഞ്ച സാ ഭിക്ഖുനീ ഭിക്ഖുനീഹി വുച്ചമാനാ തഥേവ പഗ്ഗണ്ഹേയ്യ, സാ ഭിക്ഖുനീ ഭിക്ഖുനീഹി യാവതതിയം സമനുഭാസിതബ്ബാ തസ്സ പടിനിസ്സഗ്ഗായ, യാവതതിയഞ്ചേ സമനുഭാസിയമാനാ തം പടിനിസ്സജ്ജേയ്യ, ഇച്ചേതം കുസലം, നോ ചേ പടിനിസ്സജ്ജേയ്യ, അയമ്പി ഭിക്ഖുനീ യാവതതിയകം ധമ്മം ആപന്നാ നിസ്സാരണീയം സങ്ഘാദിസേസം.

സങ്ഘഭേദകസിക്ഖാപദം

൧൪. യാ പന ഭിക്ഖുനീ സമഗ്ഗസ്സ സങ്ഘസ്സ ഭേദായ പരക്കമേയ്യ, ഭേദനസംവത്തനികം വാ അധികരണം സമാദായ പഗ്ഗയ്ഹ തിട്ഠേയ്യ, സാ ഭിക്ഖുനീ ഭിക്ഖുനീഹി ഏവമസ്സ വചനീയാ ‘‘മായ്യാ, സമഗ്ഗസ്സ സങ്ഘസ്സ ഭേദായ പരക്കമി, ഭേദനസംവത്തനികം വാ അധികരണം സമാദായ പഗ്ഗയ്ഹ അട്ഠാസി, സമേതായ്യാ, സങ്ഘേന, സമഗ്ഗോ ഹി സങ്ഘോ സമ്മോദമാനോ അവിവദമാനോ ഏകുദ്ദേസോ ഫാസു വിഹരതീ’’തി. ഏവഞ്ച സാ ഭിക്ഖുനീ ഭിക്ഖുനീഹി വുച്ചമാനാ തഥേവ പഗ്ഗണ്ഹേയ്യ, സാ ഭിക്ഖുനീ ഭിക്ഖുനീഹി യാവതതിയം സമനുഭാസിതബ്ബാ തസ്സ പടിനിസ്സഗ്ഗായ, യാവതതിയഞ്ചേ സമനുഭാസിയമാനാ തം പടിനിസ്സജ്ജേയ്യ, ഇച്ചേതം കുസലം. നോ ചേ പടിനിസ്സജ്ജേയ്യ, അയമ്പി ഭിക്ഖുനീ യാവതതിയകം ധമ്മം ആപന്നാ നിസ്സാരണീയം സങ്ഘാദിസേസം.

ഭേദാനുവത്തകസിക്ഖാപദം

൧൫. തസ്സായേവ ഖോ പന ഭിക്ഖുനിയാ ഭിക്ഖുനിയോ ഹോന്തി അനുവത്തികാ വഗ്ഗവാദികാ ഏകാ വാ ദ്വേ വാ തിസ്സോ വാ, താ ഏവം വദേയ്യും ‘‘മായ്യായോ, ഏതം ഭിക്ഖുനിം കിഞ്ചി അവചുത്ഥ ധമ്മവാദിനീ ചേസാ ഭിക്ഖുനീ, വിനയവാദിനീ ചേസാ ഭിക്ഖുനീ, അമ്ഹാകഞ്ചേസാ ഭിക്ഖുനീ ഛന്ദഞ്ച രുചിഞ്ച ആദായ വോഹരതി, ജാനാതി, നോ ഭാസതി, അമ്ഹാകമ്പേതം ഖമതീ’’തി, താ ഭിക്ഖുനിയോ ഭിക്ഖുനീഹി ഏവമസ്സു വചനീയാ ‘‘മായ്യായോ, ഏവം അവചുത്ഥ, ന ചേസാ ഭിക്ഖുനീ ധമ്മവാദിനീ, ന ചേസാ ഭിക്ഖുനീ വിനയവാദിനീ, മായ്യാനമ്പി സങ്ഘഭേദോ രുച്ചിത്ഥ, സമേതായ്യാനം സങ്ഘേന, സമഗ്ഗോ ഹി സങ്ഘോ സമ്മോദമാനോ അവിവദമാനോ ഏകുദ്ദേസോ ഫാസു വിഹരതീ’’തി, ഏവഞ്ച താ ഭിക്ഖുനിയോ ഭിക്ഖുനീഹി വുച്ചമാനാ തഥേവ പഗ്ഗണ്ഹേയ്യും, താ ഭിക്ഖുനിയോ ഭിക്ഖുനീഹി യാവതതിയം സമനുഭാസിതബ്ബാ തസ്സ പടിനിസ്സഗ്ഗായ, യാവതതിയഞ്ചേ സമനുഭാസിയമാനാ തം പടിനിസ്സജ്ജേയ്യും. ഇച്ചേതം കുസലം. നോ ചേ പടിനിസ്സജ്ജേയ്യും, ഇമാപി ഭിക്ഖുനിയോ യാവതതിയകം ധമ്മം ആപന്നാ നിസ്സാരണീയം സങ്ഘാദിസേസം.

ദുബ്ബചസിക്ഖാപദം

൧൬. ഭിക്ഖുനീ പനേവ ദുബ്ബചജാതികാ ഹോതി ഉദ്ദേസപരിയാപന്നേസു സിക്ഖാപദേസു ഭിക്ഖുനീഹി സഹധമ്മികം വുച്ചമാനാ അത്താനം അവചനീയം കരോതി ‘‘മാ മം അയ്യായോ കിഞ്ചി അവചുത്ഥ കല്യാണം വാ പാപകം വാ, അഹമ്പായ്യായോ, ന കിഞ്ചി വക്ഖാമി കല്യാണം വാ പാപകം വാ, വിരമഥായ്യായോ, മമ വചനായാ’’തി, സാ ഭിക്ഖുനീ ഭിക്ഖുനീഹി ഏവമസ്സ വചനീയാ ‘‘മായ്യാ, അത്താനം അവചനീയം അകാസി, വചനീയമേവ, അയ്യാ, അത്താനം കരോതു, അയ്യാപി ഭിക്ഖുനിയോ വദതു സഹധമ്മേന, ഭിക്ഖുനിയോപി അയ്യം വക്ഖന്തി സഹധമ്മേന, ഏവം സംവദ്ധാ ഹി തസ്സ ഭഗവതോ പരിസാ യദിദം അഞ്ഞമഞ്ഞവചനേന അഞ്ഞമഞ്ഞവുട്ഠാപനേനാ’’തി. ഏവഞ്ച സാ ഭിക്ഖുനീ ഭിക്ഖുനീഹി വുച്ചമാനാ തഥേവ പഗ്ഗണ്ഹേയ്യ, സാ ഭിക്ഖുനീ ഭിക്ഖുനീഹി യാവതതിയം സമനുഭാസിതബ്ബാ തസ്സ പടിനിസ്സഗ്ഗായ, യാവതതിയഞ്ചേ സമനുഭാസിയമാനാ തം പടിനിസ്സജ്ജേയ്യ, ഇച്ചേതം കുസലം. നോ ചേ പടിനിസ്സജ്ജേയ്യ, അയമ്പി ഭിക്ഖുനീ യാവതതിയകം ധമ്മം ആപന്നാ നിസ്സാരണീയം സങ്ഘാദിസേസം.

കുലദൂസകസിക്ഖാപദം

൧൭. ഭിക്ഖുനീ പനേവ അഞ്ഞതരം ഗാമം വാ നിഗമം വാ ഉപനിസ്സായ വിഹരതി കുലദൂസികാ പാപസമാചാരാ, തസ്സാ ഖോ പാപകാ സമാചാരാ ദിസ്സന്തി ചേവ സുയ്യന്തി ച, കുലാനി ച തായ ദുട്ഠാനി ദിസ്സന്തി ചേവ സുയ്യന്തി ച, സാ ഭിക്ഖുനീ ഭിക്ഖുനീഹി ഏവമസ്സ വചനീയാ ‘‘അയ്യാ, ഖോ കുലദൂസികാ പാപസമാചാരാ, അയ്യായ ഖോ പാപകാ സമാചാരാ ദിസ്സന്തി ചേവ സുയ്യന്തി ച, കുലാനി ചായ്യായ, ദുട്ഠാനി ദിസ്സന്തി ചേവ സുയ്യന്തി ച, പക്കമതായ്യാ ഇമമ്ഹാ ആവാസാ, അലം തേ ഇധ വാസേനാ’’തി. ഏവഞ്ച സാ ഭിക്ഖുനീ ഭിക്ഖുനീഹി വുച്ചമാനാ താ ഭിക്ഖുനിയോ ഏവം വദേയ്യ ‘‘ഛന്ദഗാമിനിയോ ച ഭിക്ഖുനിയോ, ദോസഗാമിനിയോ ച ഭിക്ഖുനിയോ, മോഹഗാമിനിയോ ച ഭിക്ഖുനിയോ, ഭയഗാമിനിയോ ച ഭിക്ഖുനിയോ, താദിസികായ ആപത്തിയാ ഏകച്ചം പബ്ബാജേന്തി ഏകച്ചം ന പബ്ബാജേന്തീ’’തി, സാ ഭിക്ഖുനീ ഭിക്ഖുനീഹി ഏവമസ്സ വചനീയാ ‘‘മായ്യാ, ഏവം അവച, ന ച ഭിക്ഖുനിയോ ഛന്ദഗാമിനിയോ, ന ച ഭിക്ഖുനിയോ ദോസഗാമിനിയോ, ന ച ഭിക്ഖുനിയോ മോഹഗാമിനിയോ, ന ച ഭിക്ഖുനിയോ ഭയഗാമിനിയോ, അയ്യാ ഖോ കുലദൂസികാ പാപസമാചാരാ, അയ്യായ ഖോ പാപകാ സമാചാരാ ദിസ്സന്തി ചേവ സുയ്യന്തി ച, കുലാനി ചായ്യായ ദുട്ഠാനി ദിസ്സന്തി ചേവ സുയ്യന്തി ച, പക്കമതായ്യാ, ഇമമ്ഹാ ആവാസാ അലം തേ ഇധ വാസേനാ’’തി. ഏവഞ്ച സാ ഭിക്ഖുനീ ഭിക്ഖുനീഹി വുച്ചമാനാ തഥേവ പഗ്ഗണ്ഹേയ്യ, സാ ഭിക്ഖുനീ ഭിക്ഖുനീഹി യാവതതിയം സമനുഭാസിതബ്ബാ തസ്സ പടിനിസ്സഗ്ഗായ, യാവതതിയഞ്ചേ സമനുഭാസിയമാനാ തം പടിനിസ്സജ്ജേയ്യ, ഇച്ചേതം കുസലം. നോ ചേ പടിനിസ്സജ്ജേയ്യ, അയമ്പി ഭിക്ഖുനീ യാവതതിയകം ധമ്മം ആപന്നാ നിസ്സാരണീയം സങ്ഘാദിസേസം.

ഉദ്ദിട്ഠാ ഖോ അയ്യായോ സത്തരസ സങ്ഘാദിസേസാ ധമ്മാ നവ പഠമാപത്തികാ, അട്ഠ യാവതതിയകാ,

യേസം ഭിക്ഖുനീ അഞ്ഞതരം വാ അഞ്ഞതരം വാ ആപജ്ജതി, തായ ഭിക്ഖുനിയാ ഉഭതോസങ്ഘേ പക്ഖമാനത്തം ചരിതബ്ബം. ചിണ്ണമാനത്താ ഭിക്ഖുനീ യത്ഥ സിയാ വീസതിഗണോ ഭിക്ഖുനിസങ്ഘോ, തത്ഥ സാ ഭിക്ഖുനീ അബ്ഭേതബ്ബാ. ഏകായപി ചേ ഊനോ വീസതിഗണോ ഭിക്ഖുനിസങ്ഘോ തം ഭിക്ഖുനിം അബ്ഭേയ്യ, സാ ച ഭിക്ഖുനീ അനബ്ഭിതാ, താ ച ഭിക്ഖുനിയോ ഗാരയ്ഹാ, അയം തത്ഥ സാമീചി. തത്ഥായ്യായോ പുച്ഛാമി, കച്ചിത്ഥ പരിസുദ്ധാ, ദുതിയമ്പി, പുച്ഛാമി, കച്ചിത്ഥ പരിസുദ്ധാ, തതിയമ്പി പുച്ഛാമി, കച്ചിത്ഥ പരിസുദ്ധാ, പരിസുദ്ധേത്ഥായ്യായോ, തസ്മാ തുണ്ഹീ, ഏവമേതം ധാരയാമീതി.

സങ്ഘാദിസേസോ നിട്ഠിതോ.

നിസ്സഗ്ഗിയ പാചിത്തിയാ

ഇമേ ഖോ പനായ്യായോ തിംസ നിസ്സഗ്ഗിയാ പാചിത്തിയാ

ധമ്മാ ഉദ്ദേസം ആഗച്ഛന്തി.

പത്തസന്നിചയസിക്ഖാപദം

൧. യാ പന ഭിക്ഖുനീ പത്തസന്നിചയം കരേയ്യ, നിസ്സഗ്ഗിയം പാചിത്തിയം.

അകാലചീവരഭാജനസിക്ഖാപദം

൨. യാ പന ഭിക്ഖുനീ അകാലചീവരം ‘‘കാലചീവര’’ന്തി അധിട്ഠഹിത്വാ ഭാജാപേയ്യ, നിസ്സഗ്ഗിയം പാചിത്തിയം.

ചീവരപരിവത്തനസിക്ഖാപദം

൩. യാ പന ഭിക്ഖുനീ ഭിക്ഖുനിയാ സദ്ധിം ചീവരം പരിവത്തേത്വാ സാ പച്ഛാ ഏവം വദേയ്യ ‘‘ഹന്ദായ്യേ, തുയ്ഹം ചീവരം, ആഹര മേതം ചീവരം, യം തുയ്ഹം തുയ്ഹമേവേതം, യം മയ്ഹം മയ്ഹമേവേതം, ആഹര മേതം ചീവരം, സകം പച്ചാഹരാ’’തി അച്ഛിന്ദേയ്യ വാ അച്ഛിന്ദാപേയ്യ വാ, നിസ്സഗ്ഗിയം പാചിത്തിയം.

അഞ്ഞവിഞ്ഞാപനസിക്ഖാപദം

൪. യാ പന ഭിക്ഖുനീ അഞ്ഞം വിഞ്ഞാപേത്വാ അഞ്ഞം വിഞ്ഞാപേയ്യ, നിസ്സഗ്ഗിയം പാചിത്തിയം.

അഞ്ഞചേതാപന സിക്ഖാപദം

൫. യാ പന ഭിക്ഖുനീ അഞ്ഞം ചേതാപേത്വാ അഞ്ഞം ചേതാപേയ്യ, നിസ്സഗ്ഗിയം പാചിത്തിയം.

പഠമസങ്ഘികചേതാപനസിക്ഖാപദം

൬. യാ പന ഭിക്ഖുനീ അഞ്ഞദത്ഥികേന പരിക്ഖാരേന അഞ്ഞുദ്ദിസികേന സങ്ഘികേന അഞ്ഞം ചേതാപേയ്യ, നിസ്സഗ്ഗിയം പാചിത്തിയം.

ദുതിയസങ്ഘികചേതാപനസിക്ഖാപദം

൭. യാ പന ഭിക്ഖുനീ അഞ്ഞദത്ഥികേന പരിക്ഖാരേന അഞ്ഞുദ്ദിസികേന സങ്ഘികേന സഞ്ഞാചികേന അഞ്ഞം ചേതാപേയ്യ, നിസ്സഗ്ഗിയം പാചിത്തിയം.

പഠമഗണികചേതാപനസിക്ഖാപദം

൮. യാ പന ഭിക്ഖുനീ അഞ്ഞദത്ഥികേന പരിക്ഖാരേന അഞ്ഞുദ്ദിസികേന മഹാജനികേന അഞ്ഞം ചേതാപേയ്യ, നിസ്സഗ്ഗിയം പാചിത്തിയം.

ദുതിയഗണികചേതാപനസിക്ഖാപദം

൯. യാ പന ഭിക്ഖുനീ അഞ്ഞദത്ഥികേന പരിക്ഖാരേന അഞ്ഞുദ്ദിസികേന മഹാജനികേന സഞ്ഞാചികേന അഞ്ഞം ചേതാപേയ്യ, നിസ്സഗ്ഗിയം പാചിത്തിയം.

പുഗ്ഗലികചേതാപനസിക്ഖാപദം

൧൦. യാ പന ഭിക്ഖുനീ അഞ്ഞദത്ഥികേന പരിക്ഖാരേന അഞ്ഞുദ്ദിസികേന പുഗ്ഗലികേന സഞ്ഞാചികേന അഞ്ഞം ചേതാപേയ്യ, നിസ്സഗ്ഗിയം പാചിത്തിയം.

പത്തവഗ്ഗോ പഠമോ.

ഗരുപാവുരണസിക്ഖാപദം

൧൧. ഗരുപാവുരണം പന ഭിക്ഖുനിയാ ചേതാപേന്തിയാ ചതുക്കംസപരമം ചേതാപേതബ്ബം. തതോ ചേ ഉത്തരി ചേതാപേയ്യ, നിസ്സഗ്ഗിയം പാചിത്തിയം.

ലഹുപാവുരണസിക്ഖാപദം

൧൨. ലഹുപാവുരണം പന ഭിക്ഖുനിയാ ചേതാപേന്തിയാ അഡ്ഢതേയ്യകംസപരമം ചേതാപേതബ്ബം. തതോ ചേ ഉത്തരി ചേതാപേയ്യ, നിസ്സഗ്ഗിയം പാചിത്തിയം.

കഥിനസിക്ഖാപദം

൧൩. നിട്ഠിതചീവരസ്മിം ഭിക്ഖുനിയാ ഉബ്ഭതസ്മിം കഥിനേ ദസാഹപരമം അതിരേകചീവരം ധാരേതബ്ബം. തം അതിക്കാമേന്തിയാ, നിസ്സഗ്ഗിയം പാചിത്തിയം.

ഉദോസിതസിക്ഖാപദം

൧൪. നിട്ഠിതചീവരസ്മിം ഭിക്ഖുനിയാ ഉബ്ഭതസ്മിം കഥിനേ ഏകരത്തമ്പി ചേ ഭിക്ഖുനീ തിചീവരേന വിപ്പവസേയ്യ, അഞ്ഞത്ര ഭിക്ഖുനിസമ്മുതിയാ നിസ്സഗ്ഗിയം പാചിത്തിയം.

അകാലചീവരസിക്ഖാപദം

൧൫. നിട്ഠിതചീവരസ്മിം ഭിക്ഖുനിയാ ഉബ്ഭതസ്മിം കഥിനേ ഭിക്ഖുനിയാ പനേവ അകാലചീവരം ഉപ്പജ്ജേയ്യ, ആകങ്ഖമാനായ ഭിക്ഖുനിയാ പടിഗ്ഗഹേതബ്ബം, പടിഗ്ഗഹേത്വാ ഖിപ്പമേവ കാരേതബ്ബം, നോ ചസ്സ പാരിപൂരി, മാസപരമം തായ ഭിക്ഖുനിയാ തം ചീവരം നിക്ഖിപിതബ്ബം ഊനസ്സ പാരിപൂരിയാ സതിയാ പച്ചാസായ. തതോ ചേ ഉത്തരി നിക്ഖിപേയ്യ സതിയാപി പച്ചാസായ, നിസ്സഗ്ഗിയം പാചിത്തിയം.

അഞ്ഞാതകവിഞ്ഞത്തിസിക്ഖാപദം

൧൬. യാ പന ഭിക്ഖുനീ അഞ്ഞാതകം ഗഹപതിം വാ ഗഹപതാനിം വാ ചീവരം വിഞ്ഞാപേയ്യ അഞ്ഞത്ര സമയാ, നിസ്സഗ്ഗിയം പാചിത്തിയം. തത്ഥായം സമയോ അച്ഛിന്നചീവരാ വാ ഹോതി ഭിക്ഖുനീ, നട്ഠചീവരാ വാ, അയം തത്ഥ സമയോ.

തതുത്തരിസിക്ഖാപദം

൧൭. തഞ്ചേ അഞ്ഞാതകോ ഗഹപതി വാ ഗഹപതാനീ വാ ബഹൂഹി ചീവരേഹി അഭിഹട്ഠും പവാരേയ്യ, സന്തരുത്തരപരമം തായ ഭിക്ഖുനിയാ തതോ ചീവരം സാദിതബ്ബം. തതോ ചേ ഉത്തരി സാദിയേയ്യ, നിസ്സഗ്ഗിയം പാചിത്തിയം.

പഠമഉപക്ഖടസിക്ഖാപദം

൧൮. ഭിക്ഖുനിം പനേവ ഉദ്ദിസ്സ അഞ്ഞാതകസ്സ ഗഹപതിസ്സ വാ ഗഹപതാനിയാ വാ ചീവരചേതാപന്നം ഉപക്ഖടം ഹോതി ‘‘ഇമിനാ ചീവരചേതാപന്നേന ചീവരം ചേതാപേത്വാ ഇത്ഥന്നാമം ഭിക്ഖുനിം ചീവരേന അച്ഛാദേസ്സാമീ’’തി. തത്ര ചേസാ ഭിക്ഖുനീ പുബ്ബേ അപ്പവാരിതാ ഉപസങ്കമിത്വാ ചീവരേ വികപ്പം ആപജ്ജേയ്യ ‘‘സാധു വത, മം ആയസ്മാ ഇമിനാ ചീവരചേതാപന്നേന ഏവരൂപം വാ ഏവരൂപം വാ ചീവരം ചേതാപേത്വാ അച്ഛാദേഹീ’’തി കല്യാണകമ്യതം ഉപാദായ, നിസ്സഗ്ഗിയം പാചിത്തിയം.

ദുതിയഉപക്ഖടസിക്ഖാപദം

൧൯. ഭിക്ഖുനിം പനേവ ഉദ്ദിസ്സ ഉഭിന്നം അഞ്ഞാതകാനം ഗഹപതീനം വാ ഗഹപതാനീനം വാ പച്ചേകചീവരചേതാപന്നാനി ഉപക്ഖടാനി ഹോന്തി ‘‘ഇമേഹി മയം പച്ചേകചീവരചേതാപന്നേഹി പച്ചേകചീവരാനി ചേതാപേത്വാ ഇത്ഥന്നാമം ഭിക്ഖുനിം ചീവരേഹി അച്ഛാദേസ്സാമാ’’തി. തത്ര ചേസാ ഭിക്ഖൂനീ പുബ്ബേ അപ്പവാരിതാ ഉപസങ്കമിത്വാ ചീവരേ വികപ്പം ആപജ്ജേയ്യ ‘‘സാധു വത മം ആയസ്മന്തോ ഇമേഹി പച്ചേകചീവരചേതാപന്നേഹി ഏവരൂപം വാ ഏവരൂപം വാ ചീവരം ചേതാപേത്വാ അച്ഛാദേഥ ഉഭോവ സന്താ ഏകേനാ’’തി കല്യാണകമ്യതം ഉപാദായ, നിസ്സഗ്ഗിയം പാചിത്തിയം.

രാജസിക്ഖാപദം

൨൦. ഭിക്ഖുനിം പനേവ ഉദ്ദിസ്സ രാജാ വാ രാജഭോഗ്ഗോ വാ ബ്രാഹ്മണോ വാ ഗഹപതികോ വാ ദൂതേന ചീവരചേതാപന്നം പഹിണേയ്യ ‘‘ഇമിനാ ചീവരചേതാപന്നേന ചീവരം ചേതാപേത്വാ ഇത്ഥന്നാമം ഭിക്ഖുനിം ചീവരേന അച്ഛാദേഹീ’’തി. സോ ചേ ദൂതോ തം ഭിക്ഖുനിം ഉപസങ്കമിത്വാ ഏവം വദേയ്യ ‘‘ഇദം ഖോ, അയ്യേ, അയ്യം ഉദ്ദിസ്സ ചീവരചേതാപന്നം ആഭതം, പടിഗ്ഗണ്ഹാതായ്യാ ചീവരചേതാപന്ന’’ന്തി. തായ ഭിക്ഖുനിയാ സോ ദൂതോ ഏവമസ്സ വചനീയോ ‘‘ന ഖോ മയം, ആവുസോ, ചീവരചേതാപന്നം പടിഗ്ഗണ്ഹാമ, ചീവരഞ്ച ഖോ മയം പടിഗ്ഗണ്ഹാമ കാലേന കപ്പിയ’’ന്തി. സോ ചേ ദൂതോ തം ഭിക്ഖുനിം ഏവം വദേയ്യ ‘‘അത്ഥി പനായ്യായ, കോചി വേയ്യാവച്ചകരോ’’തി, ചീവരത്ഥികായ, ഭിക്ഖവേ, ഭിക്ഖുനിയാ വേയ്യാവച്ചകരോ നിദ്ദിസിതബ്ബോ ആരാമികോ വാ ഉപാസകോ വാ ‘‘ഏസോ ഖോ, ആവുസോ, ഭിക്ഖുനീനം വേയ്യാവച്ചകരോ’’തി. സോ ചേ ദൂതോ തം വേയ്യാവച്ചകരം സഞ്ഞാപേത്വാ തം ഭിക്ഖുനിം ഉപസങ്കമിത്വാ ഏവം വദേയ്യ ‘‘യം ഖോ, അയ്യേ, അയ്യാ വേയ്യാവച്ചകരം നിദ്ദിസി, സഞ്ഞത്തോ സോ മയാ, ഉപസങ്കമതായ്യാ കാലേന, ചീവരേന തം അച്ഛാദേസ്സതീ’’തി. ചീവരത്ഥികായ, ഭിക്ഖവേ, ഭിക്ഖുനിയാ വേയ്യാവച്ചകരോ ഉപസങ്കമിത്വാ ദ്വത്തിക്ഖത്തും ചോദേതബ്ബോ സാരേതബ്ബോ ‘‘അത്ഥോ മേ, ആവുസോ, ചീവരേനാ’’തി, ദ്വത്തിക്ഖത്തും ചോദയമാനാ സാരയമാനാ തം ചീവരം അഭിനിപ്ഫാദേയ്യ, ഇച്ചേതം കുസലം, നോ ചേ അഭിനിപ്ഫാദേയ്യ, ചതുക്ഖത്തും പഞ്ചക്ഖത്തും ഛക്ഖത്തുപരമം തുണ്ഹീഭൂതായ ഉദ്ദിസ്സ ഠാതബ്ബം, ചതുക്ഖത്തും പഞ്ചക്ഖത്തും ഛക്ഖത്തുപരമം തുണ്ഹീഭൂതാ ഉദ്ദിസ്സ തിട്ഠമാനാ തം ചീവരം അഭിനിപ്ഫാദേയ്യ, ഇച്ചേതം കുസലം. തതോ ചേ ഉത്തരി വായമമാനാ തം ചീവരം അഭിനിപ്ഫാദേയ്യ, നിസ്സഗ്ഗിയം പാചിത്തിയം. നോ ചേ അഭിനിപ്ഫാദേയ്യ, യതസ്സാ ചീവരചേതാപന്നം ആഭതം, തത്ഥ സാമം വാ ഗന്തബ്ബം, ദൂതോ വാ പാഹേതബ്ബോ ‘‘യം ഖോ തുമ്ഹേ ആയസ്മന്തോ ഭിക്ഖുനിം ഉദ്ദിസ്സ ചീവരചേതാപന്നം പഹിണിത്ഥ, ന തം തസ്സാ ഭിക്ഖുനിയാ കിഞ്ചി അത്ഥം അനുഭോതി, യുഞ്ജന്തായസ്മന്തോ സകം, മാ വോ സകം വിനസ്സാ’’തി, അയം തത്ഥ സാമീചി.

ചീവരവഗ്ഗോ ദുതിയോ.

രൂപിയസിക്ഖാപദം

൨൧. യാ പന ഭിക്ഖുനീ ജാതരൂപരജതം ഉഗ്ഗണ്ഹേയ്യ വാ ഉഗ്ഗണ്ഹാപേയ്യ വാ ഉപനിക്ഖിത്തം വാ സാദിയേയ്യ, നിസ്സഗ്ഗിയം പാചിത്തിയം.

രൂപിയസംവോഹാരസിക്ഖാപദം

൨൨. യാ പന ഭിക്ഖുനീ നാനപ്പകാരകം രൂപിയസംവോഹാരം സമാപജ്ജേയ്യ, നിസ്സഗ്ഗിയം പാചിത്തിയം.

കയവിക്കയസിക്ഖാപദം

൨൩. യാ പന ഭിക്ഖുനീ നാനപ്പകാരകം കയവിക്കയം സമാപജ്ജേയ്യ, നിസ്സഗ്ഗിയം പാചിത്തിയം.

ഊനപഞ്ചബന്ധനസിക്ഖാപദം

൨൪. യാ പന ഭിക്ഖുനീ ഊനപഞ്ചബന്ധനേന പത്തേന അഞ്ഞം നവം പത്തം ചേതാപേയ്യ, നിസ്സഗ്ഗിയം പാചിത്തിയം. തായ ഭിക്ഖുനിയാ സോ പത്തോ ഭിക്ഖുനിപരിസായ നിസ്സജ്ജിതബ്ബോ, യോ ച തസ്സാ ഭിക്ഖുനിപരിസായ പത്തപരിയന്തോ, സോ തസ്സാ ഭിക്ഖുനിയാ പദാതബ്ബോ ‘‘അയം തേ ഭിക്ഖുനി പത്തോ യാവഭേദനായ ധാരേതബ്ബോ’’തി, അയം തത്ഥ സാമീചി.

ഭേസജ്ജസിക്ഖാപദം

൨൫. യാനി ഖോ പന താനി ഗിലാനാനം ഭിക്ഖുനീനം പടിസായനീയാനി ഭേസജ്ജാനി, സേയ്യഥിദം – സപ്പി നവനീതം തേലം മധു ഫാണിതം, താനി പടിഗ്ഗഹേത്വാ സത്താഹപരമം സന്നിധികാരകം പരിഭുഞ്ജിതബ്ബാനി. തം അതിക്കാമേന്തിയാ, നിസ്സഗ്ഗിയം പാചിത്തിയം.

ചീവരഅച്ഛിന്ദനസിക്ഖാപദം

൨൬. യാ പന ഭിക്ഖുനീ ഭിക്ഖുനിയാ സാമം ചീവരം ദത്വാ കുപിതാ അനത്തമനാ അച്ഛിന്ദേയ്യ വാ അച്ഛിന്ദാപേയ്യ വാ, നിസ്സഗ്ഗിയം പാചിത്തിയം.

സുത്തവിഞ്ഞത്തിസിക്ഖാപദം

൨൭. യാ പന ഭിക്ഖുനീ സാമം സുത്തം വിഞ്ഞാപേത്വാ തന്തവായേഹി ചീവരം വായാപേയ്യ, നിസ്സഗ്ഗിയം പാചിത്തിയം.

മഹാപേസകാരസിക്ഖാപദം

൨൮. ഭിക്ഖുനിം പനേവ ഉദ്ദിസ്സ അഞ്ഞാതകോ ഗഹപതി വാ ഗഹപതാനീ വാ തന്തവായേഹി ചീവരം വായാപേയ്യ, തത്ര ചേസാ ഭിക്ഖുനീ പുബ്ബേ അപ്പവാരിതാ തന്തവായേ ഉപസങ്കമിത്വാ ചീവരേ വികപ്പം ആപജ്ജേയ്യ ‘‘ഇദം ഖോ ആവുസോ ചീവരം മം ഉദ്ദിസ്സ വിയ്യതി, ആയതഞ്ച കരോഥ, വിത്ഥതഞ്ച അപ്പിതഞ്ച സുവീതഞ്ച സുപ്പവായിതഞ്ച സുവിലേഖിതഞ്ച സുവിതച്ഛിതഞ്ച കരോഥ, അപ്പേവ നാമ മയമ്പി ആയസ്മന്താനം കിഞ്ചിമത്തം അനുപദജ്ജേയ്യാമാ’’തി, ഏവഞ്ച സാ ഭിക്ഖുനീ വത്വാ കിഞ്ചിമത്തം അനുപദജ്ജേയ്യ അന്തമസോ പിണ്ഡപാതമത്തമ്പി, നിസ്സഗ്ഗിയം പാചിത്തിയം.

അച്ചേകചീവരസിക്ഖാപദം

൨൯. ദസാഹാനാഗതം കത്തികതേമാസികപുണ്ണമം ഭിക്ഖുനിയാ പനേവ അച്ചേകചീവരം ഉപ്പജ്ജേയ്യ, അച്ചേകം മഞ്ഞമാനായ ഭിക്ഖുനിയാ പടിഗ്ഗഹേതബ്ബം, പടിഗ്ഗഹേത്വാ യാവ ചീവരകാലസമയം നിക്ഖിപിതബ്ബം. തതോ ചേ ഉത്തരി നിക്ഖിപേയ്യ, നിസ്സഗ്ഗിയം പാചിത്തിയം.

പരിണതസിക്ഖാപദം

൩൦. യാ പന ഭിക്ഖുനീ ജാനം സങ്ഘികം ലാഭം പരിണതം അത്തനോ പരിണാമേയ്യ, നിസ്സഗ്ഗിയം പാചിത്തിയം.

പത്തവഗ്ഗോ തതിയോ.

ഉദ്ദിട്ഠാ ഖോ, അയ്യായോ, തിംസ നിസ്സഗ്ഗിയാ പാചിത്തിയാ ധമ്മാ. തത്ഥായ്യായോ, പുച്ഛാമി, കച്ചിത്ഥ പരിസുദ്ധാ, ദുതിയമ്പി പുച്ഛാമി, കച്ചിത്ഥ പരിസുദ്ധാ, തതിയമ്പി പുച്ഛാമി, കച്ചിത്ഥ പരിസുദ്ധാ, പരിസുദ്ധേത്ഥായ്യായോ, തസ്മാ തുണ്ഹീ, ഏവമേതം ധാരയാമീതി.

നിസ്സഗ്ഗിയപാചിത്തിയാ നിട്ഠിതാ.

സുദ്ധപാചിത്തിയാ

ഇമേ ഖോ പനായ്യായോ, ഛസട്ഠിസതാ പാചിത്തിയാ

ധമ്മാ ഉദ്ദേസം ആഗച്ഛന്തി.

ലസുണസിക്ഖാപദം

൧. യാ പന ഭിക്ഖുനീ ലസുണം ഖാദേയ്യ പാചിത്തിയം.