൬. പഠമസങ്ഘികചേതാപനസിക്ഖാപദവണ്ണനാ

ഛട്ഠേ അഞ്ഞദത്ഥികേനാതി അഞ്ഞസ്സത്ഥായ ദിന്നേന. അഞ്ഞുദ്ദിസികേനാതി അഞ്ഞം ഉദ്ദിസിത്വാ ദിന്നേന. സങ്ഘികേനാതി സങ്ഘസ്സ പരിച്ചത്തേന. പരിക്ഖാരേനാതി കപ്പിയഭണ്ഡേന. അഞ്ഞം ചേതാപേയ്യാതി ‘‘ഇദം നാമ പരിഭുഞ്ജേയ്യാഥാ’’തി യം ഉദ്ദിസിത്വാ നിയമേത്വാ യോ പരിക്ഖാരോ ദിന്നോ, തതോ അഞ്ഞം പരിവത്താപേയ്യ, തസ്സാ പയോഗേ ദുക്കടം, പടിലാഭേന നിസ്സഗ്ഗിയം.

സാവത്ഥിയം സമ്ബഹുലാ ഭിക്ഖുനിയോ ആരബ്ഭ താദിസേന പരിക്ഖാരേന അഞ്ഞം ചേതാപനവത്ഥുസ്മിം പഞ്ഞത്തം, തികപാചിത്തിയം, അനഞ്ഞദത്ഥികേ ദ്വികദുക്കടം. തസ്മിം പന അനഞ്ഞദത്ഥികസഞ്ഞായ, സേസകം ഉപനേന്തിയാ, ‘‘തുമ്ഹേഹി ഏതദത്ഥായ ദിന്നോ, അമ്ഹാകഞ്ച ഇമിനാ നാമ അത്ഥോ’’തി സാമികേ അപലോകേത്വാ ഉപനേന്തിയാ, യദാ ഭിക്ഖുനിയോ വിഹാരമ്പി ഛഡ്ഡേത്വാ പക്കമന്തി, ഏവരൂപാസു ആപദാസു ഉപനേന്തീനം, ഉമ്മത്തികാദീനഞ്ച അനാപത്തി. സേസം ചതുത്ഥസദിസമേവാതി.

പഠമസങ്ഘികചേതാപനസിക്ഖാപദവണ്ണനാ നിട്ഠിതാ.