൪. അഞ്ഞവിഞ്ഞാപനസിക്ഖാപദവണ്ണനാ

ചതുത്ഥേ വിഞ്ഞാപേത്വാതി ജാനാപേത്വാ, ‘‘ഇദം നാമ ആഹരാ’’തി യാചിത്വാ വാ. അഞ്ഞം വിഞ്ഞാപേയ്യാതി യം പുബ്ബേ ‘‘കിന്തേ, അയ്യേ, അഫാസു, കിം ആഹരിയതൂ’’തി വുത്തായ വിഞ്ഞാപിതം, തം പടിക്ഖിപിത്വാ തഞ്ചേവ അഞ്ഞഞ്ച ഗഹേതുകാമാ തതോ അഞ്ഞം വിഞ്ഞാപേയ്യ, തസ്സാ വിഞ്ഞത്തിയാ ദുക്കടം, പടിലാഭേന നിസ്സഗ്ഗിയം ഹോതി.

സാവത്ഥിയം ഥുല്ലനന്ദം ആരബ്ഭ അഞ്ഞം വിഞ്ഞാപേത്വാ അഞ്ഞം വിഞ്ഞാപനവത്ഥുസ്മിം പഞ്ഞത്തം, തികപാചിത്തിയം, അനഞ്ഞേ ദ്വികദുക്കടം. അനഞ്ഞേ അനഞ്ഞസഞ്ഞായ പന, തസ്മിം അപ്പഹോന്തേ പുന തഞ്ഞേവ, അഞ്ഞേനപി അത്ഥേ സതി തേന സദ്ധിം അഞ്ഞഞ്ച, യഞ്ച വിഞ്ഞത്തം, തതോ ചേ അഞ്ഞം സമഗ്ഘതരം ഹോതി, ഇമം ആനിസംസം ദസ്സേത്വാ സുദ്ധം അഞ്ഞമേവ ച വിഞ്ഞാപേന്തിയാ, ഉമ്മത്തികാദീനഞ്ച അനാപത്തി. ലേസേന ഗഹേതുകാമതാ, അഞ്ഞസ്സ വിഞ്ഞാപനം, പടിലാഭോതി ഇമാനേത്ഥ തീണി അങ്ഗാനി. സമുട്ഠാനാദീനി സഞ്ചരിത്തസദിസാനീതി.

അഞ്ഞവിഞ്ഞാപനസിക്ഖാപദവണ്ണനാ നിട്ഠിതാ.