൧൧. ഗരുപാവുരണസിക്ഖാപദവണ്ണനാ

ദുതിയസ്സ പഠമേ ഗരുപാവുരണന്തി സീതകാലേ പാവുരണം. ചതുക്കംസപരമന്തി കംസോ നാമ ചതുക്കഹാപണികോ ഹോതി, തസ്മാ സോളസകഹാപണഗ്ഘനകം. ചേതാപേതബ്ബന്തി ഠപേത്വാ സഹധമ്മികേ ച ഞാതകപ്പവാരിതേ ച അഞ്ഞേന കിസ്മിഞ്ചിദേവ ഗുണേ പരിതുട്ഠേന ‘‘വദേഥായ്യേ, യേനത്ഥോ’’തി വുത്തായ വിഞ്ഞാപേതബ്ബം. തതോ ചേ ഉത്തരീതി തതുത്തരി വിഞ്ഞാപേന്തിയാ ദുക്കടം, പടിലദ്ധം നിസ്സഗ്ഗിയം ഹോതി.

സാവത്ഥിയം ഥുല്ലനന്ദം ആരബ്ഭ രാജാനം കമ്ബലം വിഞ്ഞാപനവത്ഥുസ്മിം പഞ്ഞത്തം, തികപാചിത്തിയം, ഊനകചതുക്കംസേ ദ്വികദുക്കടം. തസ്മിം പന ഊനകസഞ്ഞായ, ചതുക്കംസപരമം ചേതാപേന്തിയാ, ഞാതകപ്പവാരിതേ വാ, അഞ്ഞസ്സ വാ അത്ഥായ, അത്തനോ വാ ധനേന, മഹഗ്ഘം ചേതാപേന്തം അപ്പഗ്ഘം ചേതാപേന്തിയാ, ഉമ്മത്തികാദീനഞ്ച അനാപത്തി. ഗരുപാവുരണതാ, അതിരേകചതുക്കംസതാ, അനനുഞ്ഞാതട്ഠാനേ വിഞ്ഞത്തി, പടിലാഭോതി ഇമാനേത്ഥ ചത്താരി അങ്ഗാനി. സമുട്ഠാനാദീനി സഞ്ചരിത്തസദിസാനീതി.

ഗരുപാവുരണസിക്ഖാപദവണ്ണനാ നിട്ഠിതാ.