സാധാരണപാരാജികം

൧…പേ…൪. മേഥുനധമ്മസിക്ഖാപദവണ്ണനാ

തത്ഥ സുണാതു മേതിആദീനം ഭിക്ഖുപാതിമോക്ഖവണ്ണനായം വുത്തനയേനേവ അത്ഥോ വേദിതബ്ബോ. കേവലഞ്ഹി, ഭന്തേ, അയ്യേതിആദിവസേന തസ്മിഞ്ച ഇധ ച അഭിലാപമത്തമേവ ലിങ്ഗഭേദമത്തഞ്ച വിസേസോ. യസ്മാ ച ഭിക്ഖുനിയാ സിക്ഖാപച്ചക്ഖാനം നാമ നത്ഥി, തസ്മാ ഭിക്ഖുനീനം ‘‘സിക്ഖാസാജീവസമാപന്നാ സിക്ഖം അപച്ചക്ഖായ ദുബ്ബല്യം അനാവികത്വാ’’തി അവത്വാ യാ പന ഭിക്ഖുനീ ഛന്ദസോ മേഥുനം ധമ്മം പടിസേവേയ്യാതി വുത്തം. തത്ഥ ഛന്ദസോതി മേഥുനരാഗപ്പടിസംയുത്തേന ഛന്ദേന ചേവ രുചിയാ ച. ഛന്ദേ പന അസതി ബലക്കാരേന പധംസിതായ അനാപത്തി, തസ്മാ യാ പരിപുണ്ണൂപസമ്പദാ ഭിക്ഖുനീ മനുസ്സാമനുസ്സതിരച്ഛാനജാതീസു പുരിസഉഭതോബ്യഞ്ജനകപണ്ഡകാനം യസ്സ കസ്സചി സജീവസ്സ വാ നിജ്ജീവസ്സ വാ സന്ഥതസ്സ വാ അസന്ഥതസ്സ വാ അക്ഖായിതസ്സ വാ യേഭുയ്യേന അക്ഖായിതസ്സ വാ അങ്ഗജാതസ്സ അത്തനോ വച്ചമഗ്ഗപസ്സാവമഗ്ഗമുഖേസു തീസു യത്ഥകത്ഥചി സന്ഥതേ വാ അസന്ഥതേ വാ പകതിവാതേന അസംഫുട്ഠേ അല്ലോകാസേ അന്തമസോ തിലഫലമത്തമ്പി പദേസം ഛന്ദസോ പവേസേതി, പരേന വാ പവേസിയമാനാ പവേസനപവിട്ഠട്ഠിതഉദ്ധരണേസു യംകിഞ്ചി സാദിയതി, അയം പാരാജികാ ഹോതി. സേസമേത്ഥ ഇതോ പരേസു ച സാധാരണസിക്ഖാപദേസു വുത്തനയാനുസാരേനേവ വേദിതബ്ബം.