൨൯. സമസൂപകപടിഗ്ഗഹണസിക്ഖാപദവണ്ണനാ

തതിയേ സമസൂപകോ നാമ യത്ഥ മുഗ്ഗമാസേഹി വാ കുലത്ഥാദീഹി വാ കതോ ഹത്ഥഹാരിയോ സൂപോ ഭത്തസ്സ ചതുത്ഥഭാഗപ്പമാണോ ഹോതി, തതോ ഹി അധികം ഗണ്ഹന്തസ്സ ദുക്കടം. ഠപേത്വാ പന സൂപം അവസേസാ സബ്ബാപി സൂപേയ്യബ്യഞ്ജനവികതി രസരസോ നാമ ഹോതി, തസ്മിം രസരസേ, ഞാതകാനം വാ പവാരിതാനം വാ അഞ്ഞസ്സത്ഥായ വാ അത്തനോ ധനേന വാ ഇധ അനാപത്തി.

൩൦…പേ…൩൨. സമതിത്തികസിക്ഖാപദവണ്ണനാ

ചതുത്ഥേ സമതിത്തികന്തി സമപുണ്ണം സമഭരിതം അധിട്ഠാനുപഗപത്തസ്സ അന്തോമുഖവട്ടിലേഖം അനതിക്കമിത്വാ രചിതം. പിണ്ഡപാതന്തി യംകിഞ്ചി യാവകാലികം. അനധിട്ഠാനുപഗേ പന യാവകാലികം യാമകാലികാദീനി ച യത്ഥകത്ഥചി ഥൂപീകതാനിപി വട്ടന്തി, യം പന ദ്വീസു പത്തേസു ഗഹേത്വാ ഏകം പൂരേത്വാ വിഹാരം ഹരതി, യം വാ പക്ഖിപിയമാനം പൂവഉച്ഛുക്ഖണ്ഡഫലാഫലാദി ഹേട്ഠാ ഓരോഹതി, തക്കോലവടംസകാദയോ വാ ഉപരി ഠപേത്വാ ദിയ്യന്തി, യഞ്ച പണ്ണേ വാ ഥാലകേ വാ പക്ഖിപിത്വാ പത്തമത്ഥകേ ഠപിതം ഹോതി, ന തം ഥൂപീകതം നാമ, തസ്മാ തം സബ്ബം വട്ടതി. ഇധ പന ഗിലാനസ്സാപി അനാപത്തി നത്ഥി, തസ്മാ തേനപി സമതിത്തികോയേവ ഗഹേതബ്ബോ. സബ്ബത്ഥ പന പടിഗ്ഗഹേതുമേവ ന വട്ടതി, പടിഗ്ഗഹിതം പന സുപ്പടിഗ്ഗഹിതം പരിഭുഞ്ജിതും വട്ടതി. പഞ്ചമഛട്ഠാനി വുത്തനയാനേവ.