൧. പഠമപാടിദേസനീയസിക്ഖാപദവണ്ണനാ

പാടിദേസനീയേസു പഠമേ അന്തരഘരം പവിട്ഠായാതി വചനതോ സചേ തസ്സാ അന്തരാരാമാദീസു ഠത്വാപി ദദമാനായ ഹത്ഥതോ സയം രഥിയാബ്യൂഹസിങ്ഘാടകഘരാനം അഞ്ഞതരസ്മിം ഠിതോപി ഗണ്ഹാതി, ദോസോ നത്ഥി. തസ്സാ പന രഥിയാദീസു ഠത്വാ ദദമാനായ, രഥിയാദീസു വാ, അന്തരാരാമാദീസു വാ ഠത്വാപി യംകിഞ്ചി ആമിസം അജ്ഝോഹരണത്ഥായ ഗണ്ഹതോ പടിഗ്ഗഹണേ ദുക്കടം, അജ്ഝോഹാരേ അജ്ഝോഹാരേ പാടിദേസനീയം. തസ്സ ദേസേതബ്ബാകാരോ ഗാരയ്ഹം ആവുസോതിആദിനാ നയേന സിക്ഖാപദേ ദസ്സിതോയേവ.

സാവത്ഥിയം അഞ്ഞതരം ഭിക്ഖും ആരബ്ഭ അഞ്ഞാതികായ ഭിക്ഖുനിയാ അന്തരഘരം പവിട്ഠായ ഹത്ഥതോ ആമിസം പടിഗ്ഗഹണവത്ഥുസ്മിം പഞ്ഞത്തം, അസാധാരണപഞ്ഞത്തി, അനാണത്തികം, യഥാ ചേതം, തഥാ സേസാനിപി, തികപാടിദേസനീയം, യാമകാലികാദീസു പടിഗ്ഗഹണേപി അജ്ഝോഹരണേപി ദുക്കടം, ഏകതോഉപസമ്പന്നായ യാവകാലികേപി തഥേവ, ഞാതികായ അഞ്ഞാതികസഞ്ഞിവേമതികാനമ്പി ഏസേവ നയോ. ഞാതികസഞ്ഞിനോ പന, ഞാതികായ വാ ദാപേന്തിയാ, ഉപനിക്ഖിപിത്വാ വാ ദദമാനായ, യാ ച അന്തരാരാമഭിക്ഖുനുപസ്സയതിത്ഥിയസേയ്യപടിക്കമനേസു ഠത്വാ ഗാമതോ ബഹി നീഹരിത്വാ, യാമകാലികാദീനി വാ ‘‘സതി പച്ചയേ പരിഭുഞ്ജാ’’തി ദേതി, തസ്സ, സിക്ഖമാനസാമണേരീനഞ്ച ഹത്ഥതോ ഗഹേത്വാ പരിഭുഞ്ജന്തസ്സ, ഉമ്മത്തകാദീനഞ്ച അനാപത്തി. പരിപുണ്ണൂപസമ്പന്നതാ, അഞ്ഞാതികതാ, അന്തരഘരേ ഠിതായ ഹത്ഥതോ സഹത്ഥാ പടിഗ്ഗഹണം, യാവകാലികതാ, അജ്ഝോഹരണന്തി ഇമാനേത്ഥ പഞ്ച അങ്ഗാനി. സമുട്ഠാനാദീനി ഏളകലോമസദിസാനീതി.

പഠമപാടിദേസനീയസിക്ഖാപദവണ്ണനാ നിട്ഠിതാ.