൨. ദുതിയപാടിദേസനീയസിക്ഖാപദവണ്ണനാ

ദുതിയേ ഇധ സൂപന്തിആദി വോസാസനാകാരദസ്സനം. അപസക്ക താവ ഭഗിനീതിആദി അപസാദേതബ്ബാകാരദസ്സനം. തത്രായം വിനിച്ഛയോ – ഏകേനാപി ഭിക്ഖുനാ അനപസാദിതേ അജ്ഝോഹരണത്ഥായ ആമിസം ഗണ്ഹന്താനം പടിഗ്ഗഹണേ ദുക്കടം, അജ്ഝോഹാരേ അജ്ഝോഹാരേ പാടിദേസനീയന്തി.

രാജഗഹേ ഛബ്ബഗ്ഗിയേ ആരബ്ഭ ഭിക്ഖുനിയാ വോസാസന്തിയാ നനിവാരണവത്ഥുസ്മിം പഞ്ഞത്തം, തികപാടിദേസനീയം, ഏകതോഉപസമ്പന്നായ വോസാസന്തിയാ നനിവാരേന്തസ്സ ദുക്കടം, തഥാ അനുപസമ്പന്നായ ഉപസമ്പന്നസഞ്ഞിനോ വേമതികസ്സ ച. അനുപസമ്പന്നസഞ്ഞിനോ, പന യോ ച അത്തനോ വാ ഭത്തം ദാപേന്തിയാ, അഞ്ഞേസം വാ ഭത്തം ദേന്തിയാ, യം വാ ന ദിന്നം, തം ദാപേന്തിയാ, യത്ഥ വാ ന ദിന്നം, തത്ഥ, സബ്ബേസം വാ സമകം ദാപേന്തിയാ, സിക്ഖമാനായ വാ സാമണേരിയാ വാ വോസാസന്തിയാ പടിഗ്ഗഹേത്വാ ഭുഞ്ജതി, തസ്സ, പഞ്ച ഭോജനാനി ഠപേത്വാ സബ്ബത്ഥ, ഉമ്മത്തകാദീനഞ്ച അനാപത്തി. പരിപുണ്ണൂപസമ്പന്നതാ, പഞ്ചഭോജനതാ, അന്തരഘരേ അനുഞ്ഞാതപകാരതോ അഞ്ഞഥാ വോസാസനാ, അനിവാരണാ, അജ്ഝോഹരണന്തി ഇമാനേത്ഥ പഞ്ച അങ്ഗാനി. സമുട്ഠാനാദീനി കഥിനസദിസാനീതി.

ദുതിയപാടിദേസനീയസിക്ഖാപദവണ്ണനാ നിട്ഠിതാ.