൪-൫. സത്താവാസസുത്താദിവണ്ണനാ

൨൪-൨൫. ചതുത്ഥേ സത്താ ആവസന്തി ഏതേസൂതി സത്താവാസാ, നാനത്തസഞ്ഞിആദിഭേദാ സത്തനികായാ. യസ്മാ തേ തേ സത്തനിവാസാ തപ്പരിയാപന്നാനം സത്താനം തായ ഏവ തപ്പരിയാപന്നതായ ആധാരോ വിയ വത്തബ്ബതം അരഹന്തി. സമുദായാചാരോ ഹി അവയവസ്സ യഥാ ‘‘രുക്ഖേ സാഖാ’’തി, തസ്മാ ‘‘സത്താനം ആവാസാ, വസനട്ഠാനാനീതി അത്ഥോ’’തി വുത്തം. സുദ്ധാവാസാപി സത്താവാസോവ ‘‘ന സോ, ഭിക്ഖവേ, സത്താവാസോ സുലഭരൂപോ, യോ മയാ അനാവുത്ഥപുബ്ബോ ഇമിനാ ദീഘേന അദ്ധുനാ അഞ്ഞത്ര സുദ്ധാവാസേഹി ദേവേഹീ’’തി (ദീ. നി. ൨.൯൧) വചനതോ. യദി ഏവം തേ കസ്മാ ഇധ ന ഗഹിതാതി തത്ഥ കാരണമാഹ ‘‘അസബ്ബകാലികത്താ’’തിആദി. വേഹപ്ഫലാ പന ചതുത്ഥേയേവ സത്താവാസേ ഭജന്തീതി ദട്ഠബ്ബം. പഞ്ചമം ഉത്താനമേവ.

സത്താവാസസുത്താദിവണ്ണനാ നിട്ഠിതാ.