൫. ഉദകൂപമാസുത്തവണ്ണനാ

൧൫. പഞ്ചമേ ഏകന്തകാളകേഹീതി നത്ഥികവാദഅഹേതുകവാദഅകിരിയവാദസങ്ഖാതേഹി നിയതമിച്ഛാദിട്ഠിധമ്മേഹി. തേനാഹ ‘‘നിയതമിച്ഛാദിട്ഠിം സന്ധായ വുത്ത’’ന്തി. ഏവം പുഗ്ഗലോതി ഇമിനാ കാരണേന ഏകവാരം നിമുഗ്ഗോ നിമുഗ്ഗോയേവ സോ ഹോതി. ഏതസ്സ ഹി പുന ഭവതോ വുട്ഠാനം നാമ നത്ഥീതി വദന്തി മക്ഖലിഗോസാലാദയോ വിയ. ഹേട്ഠാ ഹേട്ഠാ നരകഗ്ഗീനംയേവ ആഹാരോ. സാധു സദ്ധാ കുസലേസൂതി കുസലധമ്മേസു സദ്ധാ നാമ സാഹു ലദ്ധകാതി ഉമ്മുജ്ജതി, സോ താവത്തകേനേവ കുസലേന ഉമ്മുജ്ജതി നാമ. സാധു ഹിരീതിആദീസുപി ഏസേവ നയോ. ചങ്കവാരേതി രജകാനം ഖാരപരിസ്സാവനേ, സുരാപരിസ്സാവനേ വാ. ഏവം പുഗ്ഗലോതി ‘‘ഏവം സാധു സദ്ധാ’’തി ഇമേസം സദ്ധാദീനം വസേന ഏകവാരം ഉമ്മുജ്ജിത്വാ തേസം പരിഹാനിയാ പുന നിമുജ്ജതിയേവ ദേവദത്താദയോ വിയ. ദേവദത്തോ ഹി അട്ഠ സമാപത്തിയോ പഞ്ച ച അഭിഞ്ഞായോ നിബ്ബത്തേത്വാപി പുന ബുദ്ധാനം പടിപക്ഖതായ തേഹി ഗുണേഹി പരിഹീനോ രുഹിരുപ്പാദകമ്മം സങ്ഘഭേദകമ്മഞ്ച കത്വാ കായസ്സ ഭേദാ ദുതിയചിത്തവാരേന ചുതിചിത്തമനന്തരാ നിരയേ നിബ്ബത്തോ. കോകാലികോ ദ്വേ അഗ്ഗസാവകേ ഉപവദിത്വാ പദുമനിരയേ നിബ്ബത്തോ.

നേവ ഹായതി നോ വഡ്ഢതീതി അപ്പഹോനകകാലേപി ന ഹായതി, പഹോനകകാലേപി ന വഡ്ഢതി. ഉഭയമ്പി പനേതം അഗാരികേനപി അനഗാരികേനപി ദീപേതബ്ബം. ഏകച്ചോ ഹി അഗാരികോ അപ്പഹോനകകാലേ പക്ഖികഭത്തം വസ്സികം വാ ഉപനിബന്ധാപേസി, സോ പച്ഛാ പഹോനകകാലേപി പക്ഖികഭത്താദിമത്തമേവ പവത്തേതി. അനഗാരികോപി ആദിമ്ഹി അപ്പഹോനകകാലേ ഉദ്ദേസം ധുതങ്ഗം വാ ഗണ്ഹാതി, മേധാവീ ബലവീരിയസമ്പത്തിയാ പഹോനകകാലേ തതോ ഉത്തരിം ന കരോതി. ഏവം പുഗ്ഗലോതി ഏവം ഇമായ സദ്ധാദീനം ഠിതിയാ പുഗ്ഗലോ ഉമ്മുജ്ജിത്വാ ഠിതോ നാമ ഹോതി. ഉമ്മുജ്ജിത്വാ പതരതീതി സകദാഗാമിപുഗ്ഗലോ കിലേസതനുതായ ഉട്ഠഹിത്വാ ഗന്തബ്ബദിസാഭിമുഖോ തരതി നാമ.

പടിഗാധപ്പത്തോ ഹോതീതി അനാഗാമിപുഗ്ഗലം സന്ധായ വദതി. ഇമേ പന സത്ത പുഗ്ഗലാ ഉദകോപമേന ദീപിതാ. സത്ത കിര ജങ്ഘവാണിജാ അദ്ധാനമഗ്ഗപ്പടിപന്നാ അന്തരാമഗ്ഗേ ഏകം പുണ്ണനദിം പാപുണിംസു. തേസു പഠമം ഓതിണ്ണോ ഉദകഭീരുകോ പുരിസോ ഓതിണ്ണട്ഠാനേയേവ നിമുജ്ജിത്വാ പുന സണ്ഠാതും നാസക്ഖി, അവസ്സംവ മച്ഛകച്ഛപഭത്തം ജാതോ. ദുതിയോ ഓതിണ്ണട്ഠാനേ നിമുജ്ജിത്വാ സകിം ഉട്ഠഹിത്വാ പുന നിമുഗ്ഗോ ഉട്ഠാതും നാസക്ഖി, അന്തോയേവ മച്ഛകച്ഛപഭത്തം ജാതോ. തതിയോ നിമുജ്ജിത്വാ ഉട്ഠിതോ മജ്ഝേ നദിയാ ഠത്വാ നേവ ഓരതോ ആഗന്തും, ന പാരം ഗന്തും അസക്ഖി. ചതുത്ഥോ ഉട്ഠായ ഠിതോ ഉത്തരണതിത്ഥം ഓലോകേസി. പഞ്ചമോ ഉത്തരണതിത്ഥം ഓലോകേത്വാ പതരതി. ഛട്ഠോ തം ദിസ്വാ പാരിമതീരം ഗന്ത്വാ കടിപ്പമാണേ ഉദകേ ഠിതോ. സത്തമോ പാരിമതീരം ഗന്ത്വാ ഗന്ധചുണ്ണാദീഹി ന്ഹത്വാ വരവത്ഥാദീനി നിവാസേത്വാ സുരഭിവിലേപനം വിലിമ്പിത്വാ നീലുപ്പലമാലാദീനി പിലന്ധിത്വാ നാനാലങ്കാരപ്പടിമണ്ഡിതോ മഹാനഗരം പവിസിത്വാ പാസാദമാരുഹിത്വാ ഉത്തമഭോജനം ഭുഞ്ജതി.

തത്ഥ ജങ്ഘവാണിജാ വിയ ഇമേ സത്ത പുഗ്ഗലാ, നദീ വിയ വട്ടം, പഠമസ്സ ഉദകഭീരുകസ്സ പുരിസസ്സ ഓതിണ്ണട്ഠാനേയേവ നിമുജ്ജനം വിയ മിച്ഛാദിട്ഠികസ്സ വട്ടേ നിമുജ്ജനം, ഉമ്മുജ്ജിത്വാ നിമുജ്ജനപുരിസോ വിയ സദ്ധാദീനം ഉപ്പത്തിമത്ഥകേന ഉമ്മുജ്ജിത്വാ താസം ഹാനിയാ നിമുഗ്ഗപുഗ്ഗലോ, മജ്ഝേ നദിയാ ഠത്വാ വിയ സദ്ധാദീനം ഠിതിയാ ഠിതിപുഗ്ഗലോ, ഉത്തരണതിത്ഥം ഓലോകേന്തോ വിയ സോതാപന്നോ, പതരന്തപുരിസോ വിയ കിലേസകാമാവട്ടതായ പതരന്തോ സകദാഗാമീ, തരിത്വാ കടിമത്തേ ഉദകേ ഠിതപുരിസോ വിയ അനാവട്ടധമ്മത്താ അനാഗാമീ, ന്ഹത്വാ പാരിമതീരം ഉത്തരിത്വാ ഥലേ ഠിതപുരിസോ വിയ ചത്താരോ ഓഘേ അതിക്കമിത്വാ നിബ്ബാനഥലേ ഠിതോ ഖീണാസവബ്രാഹ്മണോ, ഥലേ ഠിതപുരിസസ്സ നഗരം പവിസിത്വാ പാസാദം ആരുയ്ഹ ഉത്തമഭോജനഭുഞ്ജനം വിയ ഖീണാസവസ്സ നിബ്ബാനാരമ്മണസമാപത്തിം അപ്പേത്വാ വീതിനാമനം വേദിതബ്ബം.

ഉദകൂപമാസുത്തവണ്ണനാ നിട്ഠിതാ.