൯. സീതിവഗ്ഗോ

൧. സീതിഭാവസുത്തവണ്ണനാ

൮൫. നവമസ്സ പഠമേ സീതിഭാവന്തി നിബ്ബാനം, കിലേസവൂപസമം വാ. നിഗ്ഗണ്ഹാതീതി അച്ചാരദ്ധവീരിയതാദീഹി ഉദ്ധതം ചിത്തം ഉദ്ധച്ചപക്ഖതോ രക്ഖണവസേന നിഗ്ഗണ്ഹാതി. പഗ്ഗണ്ഹാതീതി അതിസിഥിലവീരിയതാദീഹി ലീനം ചിത്തം കോസജ്ജപാതതോ രക്ഖണവസേന പഗ്ഗണ്ഹാതി. സമ്പഹംസേതീതി സമപ്പവത്തചിത്തം തഥാപവത്തിയം പഞ്ഞായ തോസേതി ഉത്തേജേതി വാ. യദാ വാ പഞ്ഞാപയോഗമന്ദതായ ഉപസമസുഖാനധിഗമേന വാ നിരസ്സാദം ചിത്തം ഭാവനായ ന പക്ഖന്ദതി, തദാ ജാതിആദീനി സംവേഗവത്ഥൂനി പച്ചവേക്ഖിത്വാ സമ്പഹംസേതി സമുത്തേജേതി. അജ്ഝുപേക്ഖതീതി യദാ പന ചിത്തം അലീനം അനുദ്ധതം അനിരസ്സാദം ആരമ്മണേ സമപ്പവത്തം സമ്മദേവ ഭാവനാവീതിം ഓതിണ്ണം ഹോതി, തദാ പഗ്ഗഹനിഗ്ഗഹസമ്പഹംസനേസു കിഞ്ചി ബ്യാപാരം അകത്വാ സമപ്പവത്തേസു അസ്സേസു സാരഥീ വിയ അജ്ഝുപേക്ഖതി, ഉപേക്ഖകോവ ഹോതി. പണീതാധിമുത്തികോതി പണീതേ ഉത്തമേ മഗ്ഗഫലേ അധിമുത്തോ നിന്നപോണപബ്ഭാരോ.

സീതിഭാവസുത്തവണ്ണനാ നിട്ഠിതാ.

൨-൧൧. ആവരണസുത്താദിവണ്ണനാ

൮൬-൯൫. ദുതിയേ അച്ഛന്ദികോതി കത്തുകമ്യതാകുസലച്ഛന്ദരഹിതോ. ഉത്തരകുരുകാ മനുസ്സാ അച്ഛന്ദികട്ഠാനം പവിട്ഠാ. ദുപ്പഞ്ഞോതി ഭവങ്ഗപഞ്ഞായ പരിഹീനോ. ഭവങ്ഗപഞ്ഞായ പന പരിപുണ്ണായപി യസ്സ ഭവങ്ഗം ലോകുത്തരസ്സ പച്ചയോ ന ഹോതി, സോപി ദുപ്പഞ്ഞോ ഏവ നാമ. അഭബ്ബോ നിയാമം ഓക്കമിതും കുസലേസു ധമ്മേസു സമ്മത്തന്തി കുസലേസു ധമ്മേസു സമ്മത്തനിയാമസങ്ഖാതം അരിയമഗ്ഗം ഓക്കമിതും അധിഗന്തും അഭബ്ബോ. ന കമ്മാവരണതായാതിആദീസു അഭബ്ബവിപരിയായേന അത്ഥോ വേദിതബ്ബോ. ചതുത്ഥാദീനി ഉത്താനത്ഥാനി.

ആവരണസുത്താദിവണ്ണനാ നിട്ഠിതാ.

സീതിവഗ്ഗവണ്ണനാ നിട്ഠിതാ.