൭-൮. പഠമഅനാഗതഭയസുത്താദിവണ്ണനാ

൭൭-൭൮. സത്തമേ വിസേസസ്സ പത്തിയാ വിസേസസ്സ പാപുണനത്ഥം. വീരിയന്തി പധാനവീരിയം. തം പന ചങ്കമനവസേന കരണേ ‘‘കായിക’’ന്തിപി വത്തബ്ബതം ലഭതീതി ആഹ – ‘‘ദുവിധമ്പീ’’തി. സത്ഥകവാതാതി സന്ധിബന്ധനാനി കത്തരിയാ ഛിന്ദന്താ വിയ പവത്തവാതാ. തേനാഹ – ‘‘സത്ഥം വിയാ’’തിആദി. കതകമ്മേഹീതി കതചോരകമ്മേഹി. തേ കിര കതകമ്മാ യം നേസം ദേവതം ആയാചിത്വാ കമ്മം നിപ്ഫന്നം, തസ്സ ഉപകാരത്ഥായ മനുസ്സേ മാരേത്വാ ഗലലോഹിതാനി ഗണ്ഹന്തി. തേ ‘‘അഞ്ഞേസു മനുസ്സേസു മാരിയമാനേസു കോലാഹലം ഉപ്പജ്ജിസ്സതി, പബ്ബജിതം പരിയേസന്തോ നാമ നത്ഥീ’’തി മഞ്ഞമാനാ ഭിക്ഖൂ ഗഹേത്വാ മാരേന്തി. തം സന്ധായേതം വുത്തം. അകതകമ്മേഹീതി അടവിതോ ഗാമം ആഗമനകാലേ കമ്മനിപ്ഫത്തത്ഥം പുരേതരം ബലികമ്മം കാതുകാമേഹി. തേനേവാഹ – ‘‘ചോരികം കത്വാ നിക്ഖന്താ കതകമ്മാ നാമാ’’തിആദി. അട്ഠമേ നത്ഥി വത്തബ്ബം.

പഠമഅനാഗതഭയസുത്താദിവണ്ണനാ നിട്ഠിതാ.