൩-൪. പഠമധമ്മവിഹാരീസുത്താദിവണ്ണനാ

൭൩-൭൪. തതിയേ നിയകജ്ഝത്തേതി അത്തനോ സന്താനേ. മേത്തായ ഉപസംഹരണവസേന ഹിതം ഏസന്തേന. കരുണായ വസേന അനുകമ്പമാനേന. പരിഗ്ഗഹേത്വാതി പരിതോ ഗഹേത്വാ, ഫരിത്വാതി അത്ഥോ. പരിച്ചാതി പരിതോ കത്വാ, സമന്തതോ ഫരിത്വാ ഇച്ചേവ അത്ഥോ. ‘‘പടിച്ചാ’’തിപി പാഠോ. മാ പമജ്ജിത്ഥാതി ‘‘ഝായഥാ’’തി വുത്തസമഥവിപസ്സനാനം അനനുയുഞ്ജനേന അഞ്ഞേന വാ കേനചി പമാദകാരണേന മാ പമാദം ആപജ്ജിത്ഥ. നിയ്യാനികസാസനേ അകത്തബ്ബകരണം വിയ കത്തബ്ബാകരണമ്പി പമാദോതി. വിപത്തികാലേതി സത്തഅസപ്പായാദിവിപത്തിയുത്തേ കാലേ. സബ്ബേപി സാസനേ ഗുണാ ഇധേവ സങ്ഗഹം ഗച്ഛന്തീതി ആഹ ‘‘ഝായഥ മാ പമാദത്ഥ…പേ… അനുസാസനീ’’തി. ചതുത്ഥേ നത്ഥി വത്തബ്ബം.

പഠമധമ്മവിഹാരീസുത്താദിവണ്ണനാ നിട്ഠിതാ.